କଳାହାଣ୍ଡି : ଇନ୍ଦ୍ରାବତୀ ଜଳ ଭଣ୍ଡାର । ଦେଶରେ ପ୍ରମୁଖ ଜଳ ବିଦ୍ୟୁତ ପ୍ରକଳ୍ପ । କଳାହାଣ୍ଡି ଜିଲ୍ଲାରେ ଜଳସେଚନ ଓ ବିଦ୍ୟୁତ ଉତ୍ପାଦନ ପାଇଁ ଇନ୍ଦ୍ରାବତୀ ଜଳଭଣ୍ଡାର ପ୍ରକଳ୍ପ ନିର୍ମାଣ ହୋଇଥିଲା । ହେଲେ ଅନ୍ୟକୁ ଖୁସି ଦେଉଥିବା ପ୍ରକଳ୍ପ ଏବେ ସ୍ଥାନୀୟ ଲୋକଙ୍କ ଲାଗି ଦୁଃଖର କାରଣ ପାଲଟିଛି। ୪୨ଟି ଗାଁର ଲୋକେ ବାହ୍ଯ ଜଗତରୁ ବିଚ୍ଛିନ୍ନ ହୋଇ କାଳ କାଟୁଛନ୍ତି। ସରକାରଙ୍କ ବିକାଶମୁଖୀ ଯୋଜନା ସେମାନଙ୍କ ଲାଗି ଅପହଞ୍ଚ। ପୂର୍ବ ସରକାର ଇନ୍ଦ୍ରାବତୀର ଡି. ଚେପଟା ଘାଟ ଠାରୁ କେ.ଚେପଟା ଘାଟର ଗୋଲାଗଡ ନଦୀରେ ପୋଲ ନିର୍ମାଣ ପାଇଁ ୫ କୋଟି ୪୪ ଲକ୍ଷ ଟଙ୍କା ବ୍ୟୟବରାଦ କରିଥିଲେ । ଗ୍ରାମ୍ୟ ଉନ୍ନୟନ ବିଭାଗ ଦ୍ଵାରା ଟେଣ୍ଡର ହୋଇ କାମ ଆରମ୍ଭ ହେଲା । ହେଲେ ୪ଟି ଖୁଣ୍ଟ ନିର୍ମାଣ କରି ଭୁଲ ଡିଜାଇନ ନାଁରେ କାମ ବନ୍ଦ କରିଦିଆଯାଇଛି । ଫଳରେ ମଉଳି ଯାଇଛି ଇନ୍ଦ୍ରାବତୀ ବୁଡି ଅଞ୍ଚଳବାସୀଙ୍କ ସ୍ଵପ୍ନ ।
ଅଞ୍ଚଳବାସୀଙ୍କ ଲାଗି ସାହା ଦେଶୀ ଡଙ୍ଗା ଓ ମୋଟର ଚାଳିତ ଡଙ୍ଗା। ଦୁର୍ଘଟଣାରେ ବି ଗଲାଣି ଅନେକ ଜୀବନ। ପ୍ରଶାସନ ନିକଟରେ ଅଭିଯୋଗ କଲେ ବି ଫଳ ଶୂନ। ସେପଟେ ସରକାରଙ୍କୁ ଜଣାଇଲେ ସୁଦ୍ଧା କେହି କର୍ଣ୍ଣପାତ କରୁନାହାନ୍ତି କହିଛନ୍ତି ସ୍ଥାନୀୟ ବିଧାୟକ। ବିତୁଛି ସମୟ, ହଟୁନି ଦୁଃଖ। ଇନ୍ଦ୍ରାବତୀ ପ୍ରକଳ୍ପ ବିସ୍ଥାପିତ ପରିବାରଙ୍କ ଦୁଃଖ କେବେ ଦୂରହେବ ତାହାକୁ ଅପେକ୍ଷା।
