କାଳ ବୈଶାଖୀର କରାଳ ରୂପ: ମୟୂରଭଞ୍ଜରେ ବର୍ଷା ସହ କୁଆପଥର ମାଡ଼

ବାରିପଦା: କାଳ ବୈଶାଖୀର କରାଳ ରୂପ। ମୟୂରଭଞ୍ଜ ଜିଲ୍ଲାର କରଞ୍ଜିଆ, ବିଶୋଇ, ବାଙ୍ଗିରିପୋଷି, କୁଳିଅଣା ଓ ବାରିପଦା ବ୍ଲକରେ ବର୍ଷା ସହ କୁଆପଥର ମାଡ। ଉଡ଼ିଲା ଘରର ଛାତ। ଗଡ଼ିଲା ଅନେକ ଛୋଟ ବଡ ଗଛ। କୁଆପଥର ବର୍ଷାରେ ବିଛେଇ ହୋଇଛି ଧରିତ୍ରୀ ମାଟି। ଗୋଟେ ଗୋଟେ କୁଆପଥରର ଓଜନ ୨୫୦-୫୦୦ଗ୍ରାମ ପାଖାପାଖି। ସେପଟେ ଭାଙ୍ଗିଲା ବସର କାଚ। ରାଜା ବସ ବାରିପଦାରୁ ବିଶୋଇ ଅଭିମୁଖେ ଯାଉଥିବା ସମୟରେ ବିଶୋଇ ଛକ ନିକଟରେ କାଳ ବୈଶାଖୀ ହୋଇଥିଲା। ବଡ଼ ବଡ଼ କୁଆପଥର ମାଡ଼ରେ ବସର କାଚ ଭାଙ୍ଗି ଯାଇଥିଲା ଓ ଭିତରେ ଥିବା ଯାତ୍ରୀ ଆହତ ହୋଇଥିଲେ। ବିଶୋଇ ବ୍ଲକ ଅନ୍ତର୍ଗତ ଖଡମବେଡା ପଞ୍ଚାୟତର ଦୁଇ ଗ୍ରାମ ମୂଷାମାରୀ ଓ ପର୍ଶିଡି ଗାଁରେ କୁଆ ପଥର ମାଡ଼ରେ ବହୁ ଲୋକ ଆହତ ହୋଇଛନ୍ତି। ଆହତ ସମସ୍ତ ଯାତ୍ରୀ ଓ ଗ୍ରାମବାସୀଙ୍କୁ ବିଶୋଇ ପ୍ରାଥମିକ ଚିକିତ୍ସା କେନ୍ଦ୍ରରେ ଭର୍ତ୍ତି କରାଯାଇଛି।