ମମିତା ହତ୍ୟା ମାମଲା: କେ ଗାଁ ଆଇଆଇସି ନିଲମ୍ବିତ

ବଲାଙ୍ଗିର: ମମିତା ମେହେର ହତ୍ୟା ମାମଲାରେ ବଡ଼ ଧରଣର କାର୍ଯ୍ୟାନୁଷ୍ଠାନ । କେ ଗାଁ ଆଇଆଇସି ଡମୁ ପରଜା ନିଲମ୍ବିତ । କଳାହାଣ୍ଡି ଏସପି ଶ୍ରବଣ ବିବେକ ଦେଲେ ସୂଚନା । କର୍ତ୍ତବ୍ୟରେ ଅବହେଳା ପାଇଁ ଡମୁଙ୍କୁ ନିଲମ୍ବିତ କରାଯାଇଛି । ନିଖୋଜ ନେଇ ପ୍ରଥମେ ପରିବାର ଲୋକେ କେ ଗାଁ ଥାନା ଅଧିକାରୀ ଡମୁ ପରଜାଙ୍କୁ ଭେଟିଥିଲେ । ହେଲେ ଥାନା ଅଧିକାରୀ ଅଭିଯୋଗ ରଖିନଥିବା ନେଇ ଅଭିଯୋଗ କରିଥିଲେ ପରିବାର ଲୋକ ।

ସୂଚନାଯୋଗ୍ୟ ମମିତା ହତ୍ୟା ମାମଲାର ମୁଖ୍ୟ ଅଭିଯୁକ୍ତ ଗୋବିନ୍ଦ ସାହୁଙ୍କୁ ୫ ଦିନିଆ ରିମାଣ୍ଡରେ ନେଇଛି ପୋଲିସ । ପରକୀୟା ପ୍ରୀତି ଭୟରେ ମମିତାଙ୍କୁ ଗାଡ଼ି ଭିତରେ ଯୋଜନାବଦ୍ଧ ଭାବେ ଅଭିଯୁକ୍ତ ଗୋବିନ୍ଦ ସାହୁ ହତ୍ୟା କରିଥିବା ଉତ୍ତରାଞ୍ଚଳ ଡିଆଇଜି ଦୀପକ କୁମାର ଖୁଲାସା କରିଥିଲେ ।

ଗୋବିନ୍ଦଙ୍କ ପରକୀୟା ପ୍ରୀତି ସମ୍ପର୍କ ବିଷୟରେ ଜାଣିଥିଲେ ମମିତା । ସେଥିପାଇଁ ତାଙ୍କୁ ରାସ୍ତାରୁ ହଟାଇ ଦେବା ଲାଗି ଷଡ଼ଯନ୍ତ୍ର ରଚା ଯାଇଥିଲା । ହତ୍ୟା ପରେ ପ୍ରମାଣ ନଷ୍ଟ ପାଇଁ ଉଦ୍ୟମ କରିଥିଲା ଅଭିଯୁକ୍ତ । ପୋଲିସ ୧୩ ତାରିଖରେ ଗୋବିନ୍ଦଙ୍କୁ ଉଠାଇ ନେଇଥିବା ବେଳେ ୧୭ ତାରିଖ ରାତିରେ ସେ ଜେଲ ପାଚେରି ଡେଇଁ ପଳାଇଥିଲା । ୧୯ ତାରିଖରେ ଆଖୁ କିଆରିରୁ ଗୋବିନ୍ଦକୁ ଧରିଥିଲା ପୋଲିସ ।