ଆଜି ବିଜେପିରେ ଯୋଗଦେବେ ଜ୍ୟୋତିରାଦିତ୍ୟ ସିନ୍ଧିଆ !

ଆଜି ବିଜେପିରେ ମିଶିବେ କଂଗ୍ରେସର ପୂର୍ବତନ ନେତା ଜ୍ୟୋତିରାଦିତ୍ୟ ସିନ୍ଧିଆ । ଆଜି ବିଜେପି ବିଦ୍ଧିବଦ୍ଧ ଭାବେ ଏନେଇ ଘୋଷଣା କରିବ ବୋଲି ଜଣାପଡ଼ିଛି । ବିଜେପି ମୁଖ୍ୟକାର୍ଯ୍ୟାଳୟରେ ନିର୍ବାଚନ କମିଟିର ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହୋଇଥିଲା । ଏଥିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ଗୃହମୃନ୍ତ୍ରୀ ଅମିତ ଶାହା, ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଏବଂ ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡ। ଉପସ୍ଥିତ ଥିଲେ ।

ଆଗାମୀ ରାଜ୍ୟସଭା ନିର୍ବାଚନ ପାଇଁ ବୈଠକରେ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇଥିବା କୁହାଯାଉଛି । ଏଥିସହ ବିଜେପିରେ ମିଶିଲେ ଜ୍ୟୋତିରାଦିତ୍ୟ ସିନ୍ଧିଆଙ୍କୁ ରାଜ୍ୟସଭା ପଠାଇବାକୁ ମଧ୍ୟ ସ୍ଥିର ହୋଇଥିବା ଜଣାପଡ଼ିଛି । ଆଜି ମିଶ୍ରଣପର୍ବ ପରେ ଏହା ସ୍ପଷ୍ଟ ହେବ । ରାଜ୍ୟସଭାକୁ ସିନ୍ଧିଆଙ୍କୁ ପଠାଇ କେନ୍ଦ୍ରରେ ଗୁରୁତ୍ୱପୂର୍ଣ୍ଣ ଦାୟିତ୍ୱ ଦିଆଯାଇପାରେ ବୋଲି ରାଜନୀତିକ ମହଲରେ ଚର୍ଚ୍ଚା ହେଉଛି । ମଧ୍ୟପ୍ରଦେଶ କଂଗ୍ରେସରୁ ୨୨ ବିଧାୟକଙ୍କ ଇସ୍ତଫା ପରେ ସଂଖ୍ୟା ଏବେ ୯୨କୁ ଖସିଆସିଛି । ଅନ୍ୟପକ୍ଷରେ ବିଜେପିର ଏବେ ବିଧାନସଭାରେ ୧୦୭ ଜଣ ବିଧାୟକ ଅଛନ୍ତି । ବର୍ତ୍ତମାନ ପରିସ୍ଥିତିରେ ସରକାର ଗଠନ କରିବା ପାଇଁ ୧୦୫ ବିଧାୟକଙ୍କ ସମର୍ଥନ ଆବଶ୍ୟକ । ନିଜର ବିଧାୟକଙ୍କ ସହ ବିଏସପି, ଏସପି ଓ ସ୍ୱାଧୀନ ପ୍ରର୍ଥୀଙ୍କ ସମର୍ଥନରେ ବିଜେପି ଆରାମ୍‌ରେ ସରକାର ଗଠନ କରିପାରିବ । ସେପଟେ କଂଗ୍ରେସର ବିଧାୟକ ଦଳର ବୈଠକ ପରେ ମୁଖ୍ୟମନ୍ତ୍ରୀ କମଳନାଥ କହିଛନ୍ତି ଯେ ଏବେ ବି ତାଙ୍କ ପାଖରେ ବହୁମତ ଅଛି ।