ନନ୍ଦିଘୋଷ ବ୍ୟୁରୋ: କୋଲକାତା ଆରଜି କର ମେଡିକାଲ କଲେଜ ଓ ହସ୍ପିଟାଲ ଟ୍ରେନି ଡାକ୍ତରଙ୍କୁ ଦୁଷ୍କର୍ମ ଓ ହତ୍ଯା ଘଟଣା । ଆଜି ବିଶ୍ବର ବିଭିନ୍ନ ଦେଶରେ ଉଠିବ ପ୍ରତିବାଦର ଝଡ଼ । ସାରା ଦେଶରେ ଚହଳ ସୃଷ୍ଟି କରିବା ସହ ଅଧିକାଂଶ ରାଜ୍ଯରେ ବିକ୍ଷୋଭ ଓ ଆନ୍ଦୋଳନର କାରଣ ପାଲଟିଥିବା ଏହି ଘଟଣା ଏବେ ଆନ୍ତର୍ଜାତିକ ରୂପ ନେଇଛି । ଜଷ୍ଟିସ ଫର୍ ଅଭୟା ନାମରେ ସାରା ବିଶ୍ବରେ ଏହି ପ୍ରତିବାଦ କରିବା ଲାଗି ଆହ୍ବାନ ଦିଆଯାଇଛି। ଆମେରିକା, ବ୍ରିଟେନ, କାନାଡା, ଆୟାରଲ୍ଯାଣ୍ଡ, ଜର୍ମାନୀ, ନେଦରଲ୍ଯାଣ୍ଡସ, ସୁଇଜରଲ୍ଯାଣ୍ଡ, ସୁଇଡେନ, ଚେକ୍, ସ୍ପେନ, ଅଷ୍ଟ୍ରେଲିଆ, ନ୍ଯୁଜିଲ୍ଯାଣ୍ଡ, ଜାପାନ ଆଦି ଦେଶରେ କରାଯିବ ବିକ୍ଷୋଭ। ବିଭିନ୍ନ ଆନ୍ତର୍ଜାତିକ ସଂଗଠନ ପକ୍ଷରୁ ଏହି ଆହ୍ବାନ ଦିଆଯାଇଛି। ପ୍ରାୟ ମାସକ ତଳେ କୋଲକାତାର ଏହି ଘଟଣା ସାରା ଦେଶକୁ ଦୋହଲାଇଦେଇଥିଲା। କେବଳ ଡାକ୍ତର ନୁହନ୍ତି, ସାଧାରଣ ନାଗରିକ, ଛାତ୍ରଛାତ୍ରୀ, ମହିଳା, ସାମାଜିକ କର୍ମୀ ଆନ୍ଦୋଳନକୁ ଓହ୍ଲାଇଥିଲେ। ସ୍ଥିତି ଏପରି ହୋଇଥିଲା ଯେ ପଶ୍ଚିମବଙ୍ଗ ବିଧାନସଭାରେ ଦୋଷୀସାବ୍ଯସ୍ତ ଦୁଷ୍କର୍ମକାରୀଙ୍କୁ ଫାଶୀଦଣ୍ଡ ଦେବା ସଂକ୍ରାନ୍ତ ସ୍ବତନ୍ତ୍ର ବିଲ୍ ଅପରାଜିତା ପାସ୍ ହୋଇଥିଲା। ସେପଟେ ଆଜି ବି ପଶ୍ଚିମବଙ୍ଗରେ ବିଭିନ୍ନ ସଂଗଠନ ପକ୍ଷରୁ ବିକ୍ଷୋଭ କରାଯିବ ବୋଲି ସୂଚନା ମିଳିଛି।
