କମ୍ପିବ କଳିଙ୍ଗ: ଆଜିଠୁ ଆରମ୍ଭ ହେବ ହକି ବିଶ୍ୱକପ୍

ଭୁବନେଶ୍ୱର: ଆଜିଠୁ କମ୍ପିବ କଳିଙ୍ଗ ଷ୍ଟାଡିୟମ । ଚାଲିବ ହକି ମହାସମର । ଡିସେମ୍ବର ୫ ଯାଏଁ କଳିଙ୍ଗରେ ଖେଳାଯିବ ଜୁନିୟର ହକି ବିଶ୍ୱକପ । କରୋନା ପାଇଁ ଉଦଘାଟନୀ ଉତ୍ସବକୁ ନିରାଡମ୍ବର କରାଯାଉଥିବାବେଳେ ଉଦଘାଟନି ମ୍ୟାଚରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ଏଫଆଇଏଚ୍ ସଭାପତି ନରିନ୍ଦ୍ରର ବାତ୍ରା ଉପସ୍ଥିତ ରହିବେ । କରୋନା ପାଇଁ ଦର୍ଶକଙ୍କୁ ମ୍ୟାଚ ଷ୍ଟାଡିୟମ ମଧ୍ୟକୁ ମନା ହୋଇଛି ।

ହାଇପ୍ରୋଫାଇଲ ବିଶ୍ୱକପ୍ ଲାଗି ସୁରକ୍ଷା ବଳୟରେ ରହିଛି ରାଜଧାନୀ । ସ୍ଥିତିର ସମୀକ୍ଷା କରିଛନ୍ତି ପୋଲିସ କମିଶନର । ଭୁବନେଶ୍ୱର ଡିସିପିଙ୍କ ପ୍ରତକ୍ଷ୍ୟ ତତ୍ତ୍ୱାବଧାନରେ ସୁରକ୍ଷା ବ୍ୟବସ୍ଥା ରହିବ । ହୋଟେଲ, ଷ୍ଟାଡିୟମ ଓ ରୁଟ ଲାଇନ ସବୁଠି ରହିବ ପୋଲିସର କଡ଼ା ନଜର । ସୁରକ୍ଷା ଲାଗି ୫ ଜଣ ଅତିରିକ୍ତ ଡିସିପି, ୮ ଜଣ ଡିଏସପି, ୨୬ ଜଣ ଆଇଆଇସି, ୭୨ ଜଣ ଅଫିସର, ୩୦ ହାବିଲଦାର ନିୟୋଜିତ ରହିବେ ।

ଷ୍ଟାଡିୟମ ଭିତରେ ଓ ବାହାରେ ୨୫ ପ୍ଳାଟୁନ ପୋଲିସ ଫୋର୍ସ ମୁତୟନ ହୋଇଛନ୍ତି । ସମସ୍ତ ପୋଲିସ କର୍ମଚାରୀଙ୍କ ଆରଟିପିସିଆର ଟେଷ୍ଟ କରାଯାଇଛି । ହକି ଇଣ୍ଡିଆର ସମସ୍ତ ନିୟମାବଳୀ ଅବଲମ୍ବନ କରିବେ ଖେଳାଳି । ଆଜି ଉଦଘାଟନୀ ଦିବସରେ ଖେଳାଯିବ ୫ଟି ମ୍ୟାଚ୍ । ପ୍ରଥମ ମ୍ୟାଚରେ ସକାଳ ସାଢ଼େ ୯ଟାରେ ଶକ୍ତିଶାଳୀ ବେଲଜିୟମକୁ ଭେଟିବ ଦକ୍ଷିଣ ଆଫ୍ରିକା । ସନ୍ଧ୍ୟା ୮ଟାରେ ଡିଫେଣ୍ଡିଂ ଚାମ୍ପିୟନ ଭାରତ ଓ ଫ୍ରାନ୍ସ ମଧ୍ୟରେ ହେବ ଟକ୍କର । ମଇଦାନରେ ଲଢେଇ ଲାଗି ଜୋରଦାର ଅଭ୍ୟାସ କରି ନିଜକୁ ପ୍ରସ୍ତୁତ କରିଛନ୍ତି ଖେଳାଳି । ନିଜ ମାଟିରେ ପ୍ରଥମ ମ୍ୟାଚ ଜିତି ବିଶ୍ୱକପ୍‌ରେ ଅଭିଯାନ ଆରମ୍ଭ ଲକ୍ଷ୍ୟରେ ଅଛି ଭାରତ ।

ଏଥିସହିତ ପଢ଼ନ୍ତୁ: ବଲାଙ୍ଗୀର-ସୋନପୁର ରାସ୍ତାରେ ମର୍ମନ୍ତୁଦ ସଡ଼କ ଦୁର୍ଘଟଣା: ଅକାଳେ ଚାଲିଗଲା ୩ଜୀବନ