ଯନ୍ତ୍ରୀଙ୍କ ଝୁଲନ୍ତା ମୃତଦେହ ଉଦ୍ଧାର, ଆତ୍ମହତ୍ୟା ସନ୍ଦେହ
କେନ୍ଦୁଝର: ଚମ୍ପୁଆ ବ୍ଲକ୍ ଗ୍ରାମ୍ୟ ଜଳ ଯୋଗାଣ ଓ ପରିମଳ ବିଭାଗର ଜୁନିଅର ଇଞ୍ଜିନିୟର ରାମକୃଷ୍ଣ ସିଂଙ୍କ ଝୁଲନ୍ତା ମୃତଦେହ ଉଦ୍ଧାର କରାଯାଇଛି । ତାଙ୍କ ନିଜ ଗାଁ ଜୟନ୍ତୀପୁର ବୈତରଣୀ ନଦୀକୂଳରେ ଏକ ଗଛରୁ ଉଦ୍ଧାର କରାଯାଇଛି ମୃତଦେହ । ଏକ ପ୍ଲାଷ୍ଟିକ ଦଉଡ଼ିରେ ତାଙ୍କ ମୃତଦେହ ଗଛରେ ଝୁଲୁଥିବା ଅବସ୍ଥାରେ ଠାବ କରାଯାଇଥିଲା ।
ନିକଟରେ ଥିଲା ତାଙ୍କ ବାଇକ ଓ ହେଲମେଟ୍ । ଜୁନିଅର ଇଞ୍ଜିନିୟର ରାମକୃଷ୍ଣ ସିଂ ଗତକାଲିଠାରୁ ଚମ୍ପୁଆ ବ୍ଲକ୍ କଲୋନୀ ସରକାରୀ ବାସଭବନରୁ ନିଖୋଜ ଥିଲେ । ଘରେ ଛାଡ଼ି ଯାଇଥିଲେ ତାଙ୍କ ମୋବାଇଲ ଫୋନ୍ । ଘରଲୋକ ତାଙ୍କୁ ଚାରିଆଡ଼େ ଖୋଜା ଖୋଜି କରି କୌଣସି ଖବର ପାଇ ନଥିଲେ । ଆଜି ତାଙ୍କ ଗାଁ ଲୋକ ସକାଳୁ ବୈତରଣୀ ନଦୀକୁ ଗାଧୋଇବାକୁ ଯାଇ ଥିବାବେଳେ ଜୁନିଅର ଇଞ୍ଜିନିୟର ରାମକୃଷ୍ଣ ସିଂଙ୍କ ମୃତଦେହ ଝୁଲୁଥିବା ଦେଖିଥିଲେ ।
ଖବର ପାଇ ଚମ୍ପୁଆ ଥାନା ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି।
