ଭିଜିଲାନ୍ସ ଜାଲରେ କନିଷ୍ଠ ଯନ୍ତ୍ରୀ, ଠିକାଦାରଙ୍କ ବିଲ୍ ପାସ୍ ପାଇଁ ନେଉଥିଲେ ଲାଞ୍ଚ
କଟକ: ଭିଜିଲାନ୍ସ ପଞ୍ଝାରେ କଟକ ପୂର୍ତ୍ତ ବିଭାଗର କନିଷ୍ଠ ଯନ୍ତ୍ରୀ । ଜେଇ ଧ୍ରୁବାନନ୍ଦ ରାଉତ ଭିଜିଲାନ୍ସ ହାତରେ ଧରା ପଡ଼ିଛନ୍ତି । କଟକ ବଡ଼ ମେଡ଼ିକାଲର ରେସେଡେନ୍ସିଆଲ୍ କୋଠାରେ ହୋଇଥିବା କାର୍ଯ୍ୟର ବିଲ୍ ପାଇଁ ଜଣେ ଠିକାଦାରଙ୍କ ଠାରୁ ୧୫ ହଜାର ଟଙ୍କା ଲାଞ୍ଚ ନେଉଥିଲେ ଧ୍ରୁବାନନ୍ଦ । ଟଙ୍କା ଲାଞ୍ଚ ନେବା ବେଳେ ଭିଜିଲାନ୍ସ ଧ୍ରୁବାନନ୍ଦଙ୍କୁ ତାଙ୍କ ଏସସିବି କ୍ୟାମ୍ପସ ସ୍ଥିତ ଅଫିସରୁ ଧରିଛି ।
ଧ୍ରୁବାନନ୍ଦଙ୍କ ସରକାରୀ ବାସଭବନ ସହ ମାହାଙ୍ଗା ଚମ୍ପତିପୁର ଗାଁରେ ଥିବା ପୈତୃକ ଘରେ ଭିଜିଲାନ୍ସର ୪ ଜଣିଆ ଟିମ୍ ରେଡ୍ କରିଛି । ଭିଜିଲାନ୍ସ ଧ୍ରୁବାନନ୍ଦଙ୍କୁ ଗିରଫ କରି କୋର୍ଟ ଚାଲାଣ କରିଥିବା ବେଳେ ଅଦାଲତ ମାର୍ଚ୍ଚ ୧୭ ଯାଏ ବିଚାର ବିଭାଗୀୟ ହାଜତକୁ ପଠାଇ ଦେଇଛନ୍ତି । ଏନେଇ ଭିଜିଲାନ୍ସ ପକ୍ଷରୁ ଦୁର୍ନୀତି ନିବାରଣ ଆଇନ୍ ୨୦୧୮ ଅନୁସାରେ ମାମଲା ରୁଜୁ କରାଯାଇଛି ।
