କଳାହାଣ୍ଡି: ମମିତା ମେହେର ହତ୍ୟା ମାମଲାରେ କଳାହାଣ୍ଡିରେ ବିଜେପି ବନାମ ସାମ୍ବାଦିକ । ରାଜ୍ୟ ସଭାପତି ସମୀର ମହାନ୍ତି ଡାକିଥିବା ସାମ୍ବାଦିକ ସମ୍ମିଳନୀରେ ମୁହାଁମୁହିଁ ହେଲେ ବିଜେପି ନେତା ଓ ସାମ୍ବାଦିକ । ଆଜି ରାଜ୍ୟ ସଭାପତିଙ୍କ ନେତୃତ୍ୱରେ ଏକ ଟିମ୍ ପହଞ୍ଚିଥିଲା କଳାହାଣ୍ଡିରେ । ଘଟଣାସ୍ଥଳ ପରିଦର୍ଶନ ପରେ ପ୍ରେସମିଟର ଆୟୋଜନ କରିଥିଲା । ହେଲେ ସାମ୍ବାଦିକମାନେ ଏହାକୁ ବୟକଟ୍ କରିଥିଲେ । ଜିଲ୍ଲା ବିଜେପି ଉପସଭାପତି ଅଜୟ ପାଣିଗ୍ରାହୀ କ୍ଷମା ନମାଗିବା ପର୍ଯ୍ୟନ୍ତ ବିଜେପିର କୌଣସି କଥାକୁ ରିପୋର୍ଟିଂ କରାଯିବ ନାହିଁ ବୋଲି ରୋକଠୋକ୍ ଶୁଣାଇଥିଲେ ।
ଗତକାଲି କାର୍ଯ୍ୟରତ ସାମ୍ବାଦିକଙ୍କୁ ନେଇ ଆପତ୍ତିଜନକ ମନ୍ତବ୍ୟ ଦେଇଥିବା ଅଜୟ ଆଜି କ୍ଷମା ମାଗିଲେ ସତ, ହେଲେ ଯେଉଁ ଶୈଳୀରେ କ୍ଷମା ମାଗିଲେ, ତାହା ଉପସ୍ଥିତ ସାମ୍ବାଦିକଙ୍କୁ ଆହୁରି ଉତକ୍ଷିପ୍ତ କରିଥିଲା । ଯାହାକୁ ନେଇ ବିଜେପି ନେତା ଓ ରିପୋର୍ଟରଙ୍କ ମଧ୍ୟରେ ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଥିଲା । ତେବେ ଜିଲ୍ଲା ବିଜେପିର ଅନ୍ୟ ନେତା ଭୁଲ୍ ମାଗିବା ପରେ ପରିସ୍ଥିତି ସ୍ୱାଭାବିକ ହୋଇଥିଲା ଓ ସାମ୍ବାଦିକ ସମ୍ମିଳନୀ ଆରମ୍ଭ ହୋଇଥିଲା ।
