ଷ୍ଟେଜରେ ନୁହେଁ ମଇଦାନରେ ଭୋଟ୍ ମାଗିବେ ଜଲିଉଡ୍ କୁଇନ୍ ରାଣୀ ପଣ୍ଡା

ଭୁବନେଶ୍ୱର: ପୁଣି ଚର୍ଚ୍ଚାରେ ରାଣୀ ପଣ୍ଡା । କେତେବେଳେ ଅଶ୍ଲୀଳ ନୃତ୍ୟ ତ ଆଉ କେବେ ବିବାଦୀୟ ବୟାନ । ଏସବୁକୁ ନେଇ ଆଗରୁ ଚର୍ଚ୍ଚା ପରିସରରେ ରହୁଥିବା ରାଣୀ ପଣ୍ଡା ଏବେ ପ୍ରଂଶସା ସାଉଣ୍ଟୁଛନ୍ତି । ମହାମାରୀ କରୋନା କାଳରେ ଅସହାୟ ଗରିବଙ୍କୁ ସହାୟତା ଦେଇଥିବା ରାଣୀ ଏବେ ରାଜନୀତି ମୁହାଁ । ଉପନିର୍ବାଚନରେ ରାଣୀ ପଣ୍ଡା ପ୍ରଚାର କରିବେ । ତେବେ, କୌଣସି ରାଜନୈତିକ ଦଳ ପାଇଁ ନୁହେଁ ବରଂ ସ୍ୱାଧୀନ ପ୍ରାର୍ଥୀଙ୍କ ପାଇଁ ରାଜନୀତି ମଇଦାନକୁ ଓହ୍ଲାଇବେ ରାଣୀ ।

ଉପନିର୍ବାଚନକୁ ନେଇ ରାଜନୈତିକ ଉଷ୍ଣତା ବୃଦ୍ଧି ପାଇଛି । ନିଜ ହଟ୍ ଡ୍ୟାନ୍ସରେ ମଞ୍ଚ ଥରାଉଥିବା, ଦର୍ଶକଙ୍କୁ ଉଲ୍ଲସିତ କରୁଥିବା ରାଣୀ ଏଥର ଭୋଟରଙ୍କୁ ମନାଇବେ । ବାଲେଶ୍ୱର ଉପନିର୍ବାଚନରେ ପ୍ରଚାର କରିବେ ରାଣୀ ପଣ୍ଡା । ମିଳିଥିବା ସୂଚନା ମୁତାବକ ବାଲେଶ୍ୱର ଉପନିର୍ବାଚନରେ ପ୍ରାର୍ଥୀ ହୋଇଥିବା ୮୦ ବୟସ୍କ ସ୍ୱାଧୀନ ପ୍ରାର୍ଥୀ ବେଣୁଧର ବାରିକଙ୍କ ପାଇଁ ରାଣୀ ପଣ୍ଡା ଭୋଟ୍ ଭିକ୍ଷା କରିବେ । ତେବେ, ବେଣୁଧରଙ୍କ ଲାଗି ପ୍ରଚାର ପାଇଁ ରାଣୀ ପଣ୍ଡା କିଛି ପ୍ରାପ୍ୟ ନେବେ ନାହିଁ । ସମ୍ପୂର୍ଣ୍ଣ ମାଗଣାରେ ବେଣୁଙ୍କ ପାଇଁ ରାଣୀ ମାଗିବେ ଭୋଟ୍ ।

୮୦ ବୟସ୍କ ବେଣୁଧର ବାରିକ ସ୍ୱାଧୀନ ପ୍ରାର୍ଥୀ ଭାବେ ଛିଡ଼ା ହୋଇଛନ୍ତି । ତାଙ୍କ ଚିହ୍ନ ହେଉଛି କେଟିଲ୍ । ଚୁଟି କାଟିବାକୁ ପେସା କରିଥିବା ବେଣୁଧର ସମାଜରେ ପରିବର୍ତ୍ତନ ଆଣିବା ଲାଗି ବାଲେଶ୍ୱର ସଦର ବିଧାନସଭା ଆସନ ଲାଗି ଉପ ନିର୍ବାଚନରେ ପ୍ରାର୍ଥୀ ହୋଇଛନ୍ତି ।

ଏଥିସହ ପଢ଼ନ୍ତୁ- ପେସା ତାଙ୍କର ଚୁଟି କାଟିବା, ସମାଜ କଲ୍ୟାଣ ପାଇଁ ଓହ୍ଲାଇଛନ୍ତି ନିର୍ବାଚନ ମଇଦାନକୁ; ବୟସ ୮୦ !