ନନ୍ଦିଘୋଷ ବ୍ୟୁରୋ: ପାକିସ୍ତାନରେ ଫସି ରହିଥିବା ଜଣେ ଭାରତୀୟ ଝିଅକୁ ବଞ୍ଚାଇବାର କାହାଣୀ ବଖାଣୁଥିବା ଜନ୍ ଆବ୍ରାହମଙ୍କ ଫିଲ୍ମ ‘ଦି ଡିପ୍ଲୋମାଟ୍’କୁ ସେନ୍ସର ବୋର୍ଡରୁ ସବୁଜ ସଙ୍କେତ ମିଳିଛି । କିନ୍ତୁ ‘ଦି ଡିପ୍ଲୋମାଟ୍’ର ନିର୍ମାତାମାନଙ୍କୁ ମାର୍ଚ୍ଚ ପ୍ରଥମ ସପ୍ତାହରେ ଏହି ଫିଲ୍ମଟି ବୈଦେଶିକ ମନ୍ତ୍ରଣାଳୟର ଅଧିକାରୀମାନଙ୍କୁ ଦେଖାଇବାକୁ ପଡିଥିଲା । ବୈଦେଶିକ ମନ୍ତ୍ରଣାଳୟଙ୍କୁ ଫିଲ୍ମଟି ପ୍ରଦର୍ଶନ କରିବା ପରେ, କେନ୍ଦ୍ରୀୟ ଫିଲ୍ମ ପ୍ରମାଣନ ବୋର୍ଡ (CBFC) ନିର୍ମାତାମାନଙ୍କୁ ଫିଲ୍ମରେ ଏକ ଡିସକ୍ଳେମର ଯୋଡିବାକୁ କହିଛି ଯେଉଁଥିରେ ସ୍ପଷ୍ଟ ଭାବରେ ଉଲ୍ଲେଖ କରାଯାଇଛି ଯେ ସେମାନେ ପଡ଼ୋଶୀ ଦେଶମାନଙ୍କ ସହିତ ଭଲ ସମ୍ପର୍କ ବଜାୟ ରଖିବାକୁ ସମର୍ଥନ କରନ୍ତି।
ଏକ ରିପୋର୍ଟରେ ଅନୁଯାୟୀ ବୈଦେଶିକ ମନ୍ତ୍ରଣାଳୟର ପ୍ରଦର୍ଶନର ଉଦ୍ଦେଶ୍ୟ ଥିଲା ଯେ ଫିଲ୍ମର କାହାଣୀ ଯେମିତି ପାକିସ୍ତାନ ସହିତ ଭାରତର କୂଟନୈତିକ ସମ୍ପର୍କରେ ନକାରାତ୍ମକ ପ୍ରଭାବ ପକାଇବ ନାହିଁ। ଏହି କାରଣରୁ CBFC ଫିଲ୍ମ ସହିତ ଏକ ଡିସକ୍ଲେମର ଯୋଡିବାକୁ କହିଛି ।
ଫିଲ୍ମର କାହାଣୀ କ’ଣ?
‘ଦି ଡିପ୍ଲୋମାଟ୍’ରେ ଜନ୍ ଆବ୍ରାହମ୍ ଭାରତୀୟ ହାଇକମିଶନର କୂଟନୀତିଜ୍ଞ ଜେପି ସିଂହଙ୍କ ଭୂମିକାରେ ଅଭିନୟ କରୁଛନ୍ତି । ଏହି ଚଳଚ୍ଚିତ୍ରଟି ୨୦୧୭ ମସିହାର ଏକ ସତ୍ୟ ଘଟଣା ଉପରେ ଆଧାରିତ। ଏହି ଫିଲ୍ମଟି ସାଦିଆ ଖାତିବ ଅଭିନୀତ ଉଜମା ଅହମ୍ମଦ ଚରିତ୍ର ଉପରେ ଆଧାରିତ । ୨୦୧୭ ମସିହା ଯେତେବେଳେ ଉଜମା ଅହମ୍ମଦ ମାଲେସିଆରେ ପାକିସ୍ତାନୀ ନାଗରିକ ତାହିର ଅଲ୍ଲୀଙ୍କୁ ଭେଟିଥିଲେ। ତା’ପରେ ଦୁହେଁ ପରସ୍ପରକୁ ପ୍ରେମ କରି ବସିଥିଲେ। ତାହିର ପରେ ଉଜମାଙ୍କୁ ପାକିସ୍ତାନ ଡାକିଥିଲେ । ସେଠାରେ ଉଜମା ପହଞ୍ଚିବା ପରେ ଜଣାପଡ଼ିଥିଲା ଯେ ତାହିର ବିବାହିତ ଏବଂ ତାଙ୍କର ଚାରୋଟି ସନ୍ତାନ ଅଛନ୍ତି । ପରେ ତାହିର ତାଙ୍କୁ ନିର୍ଯାତନା ଦିଅନ୍ତି ଏବଂ ଜୋରଜବରଦସ୍ତି ବିବାହ କରନ୍ତି ।
ଉଜମା ଅହମ୍ମଦ ଘରକୁ ଫେରିବାକୁ ଚାହୁଁଥିବା ବେଳେ କୌଣସି ପ୍ରକାରେ ସେଠାରୁ ଖସି ପଳାଇ ଆସି ଭାରତୀୟ ଦୂତାବାସରେ ପହଞ୍ଚିଥିଲେ । କୂଟନୀତିଜ୍ଞ ଜେପି ସିଂହଙ୍କୁ ଭେଟି ତାଙ୍କୁ ସମ୍ପୂର୍ଣ୍ଣ ଘଟଣା ବିଷୟରେ କହି ସାହାଯ୍ୟ ମାଗୁଛନ୍ତି । ତା’ପରେ ଜେପି ସିଂହ ତାଙ୍କୁ ସେଠାରୁ କିପରି ବାହାର କରି ଭାରତ ପଠାଉଛନ୍ତି ତାହାକୁ ନେଇ ଫିଲ୍ମର କାହାଣୀ ଆଧାରିତ । ରିପୋର୍ଟ ଅନୁଯାୟୀ ‘‘ଏହି ଫିଲ୍ମଟି ଅନ୍ତର୍ଜାତୀୟ କୂଟନୀତି ଉପରେ କେନ୍ଦ୍ରିତ ହୋଇଥିବାରୁ, ଏକ ଦୃଶ୍ୟ ଏବଂ ଅଡିଓରେ ଡିସକ୍ଲେମର ଯୋଡାଯିବାକୁ କୁହାଯାଇଛି । ଯାହା ନିଶ୍ଚିତ କରିବ ଯେ ଯଦିଓ ଫିଲ୍ମଟି ଏକ ସତ୍ୟ ଘଟଣା ଦ୍ୱାରା ଅନୁପ୍ରାଣିତ, ଏହା ଭୂରାଜନୈତିକ ଉତ୍ତେଜନାକୁ ନାଟକୀୟ କରିଥାଏ ଏବଂ ଭାରତ ସରକାରଙ୍କ ମତକୁ ପ୍ରତିଫଳିତ କରୁନାହିଁ।” ଏହି ଚଳଚ୍ଚିତ୍ରଟି କେବଳ ପାକିସ୍ତାନରେ ଘଟିଥିବା ଏକ ଘଟଣା ଉପରେ ଆଧାରିତ। ଏପରି ପରିସ୍ଥିତିରେ, ଏହି ଦିଗକୁ ଗୁରୁତ୍ୱ ଦେବା ଗୁରୁତ୍ୱପୂର୍ଣ୍ଣ କାରଣ ଦୁଇ ଦେଶ ମଧ୍ୟରେ ସମ୍ପର୍କ ସହିତ ଜଡିତ ବିଷୟଗୁଡ଼ିକ ଅତ୍ୟନ୍ତ ସମ୍ବେଦନଶୀଳ ।
କଟାଯାଇଛି ଏହି ଦୃଶ୍ୟ
ଏହା ବ୍ୟତୀତ ସେନ୍ସର ବୋର୍ଡ ନିର୍ମାତାଙ୍କୁ ଫିଲ୍ମର ଚରିତ୍ରଗୁଡ଼ିକର ପ୍ରକୃତ ନାମ ବ୍ୟବହାର କରିବାକୁ ଅନୁମତି ମଧ୍ୟ ଦେଇଛି । ନିର୍ମାତାମାନେ ଆବଶ୍ୟକୀୟ କାଗଜପତ୍ର ଉପସ୍ଥାପନ କରିବା ପରେ ସେନ୍ସର ବୋର୍ଡ ଏହି ନିଷ୍ପତ୍ତି ନେଇଛି । ଫିଲ୍ମର ଏକ ଦୃଶ୍ୟ ଯେଉଁଥିରେ ଜଣେ ଛୋଟ ପୁଅ ଜଣେ ମହିଳାଙ୍କୁ ହତ୍ୟା କରୁଛି ତାହାକୁ କଟାଯାଇଛି ଏବଂ ଏକ ଅପମାନଜନକ ଶବ୍ଦକୁ ମଧ୍ୟ ମ୍ୟୁଟ୍ କରାଯାଇଛି ।
କେବେ ମୁକ୍ତିଲାଭ କରିବ ‘ଦି ଡିପ୍ଲୋମାଟ୍’ ?
ଏହି ଫିଲ୍ମଟି ଶିବମ୍ ନାୟାରଙ୍କ ଦ୍ୱାରା ନିର୍ଦ୍ଦେଶିତ। ଏହା ୧୪ ମାର୍ଚ୍ଚ ୨୦୨୫ରେ ହୋଲି ଅବସରରେ ପ୍ରେକ୍ଷାଳୟରେ ମୁକ୍ତିଲାଭ କରିବ । ଜନ୍ ଏବଂ ସାଦିଆଙ୍କ ବ୍ୟତୀତ କୁମୁଦ ମିଶ୍ର, ଶାରିବ ହାଶମୀ, ରେବତୀ (ସୁଷମା ସ୍ୱରାଜ) ଏବଂ ଶହର ଶାହନାଜ ଭଳି କଳାକାର ଏଥିରେ ଗୁରୁତ୍ୱପୂର୍ଣ୍ଣ ଭୂମିକାରେ ଅଭିନୟ କରିଛନ୍ତି।
