ଆମେରିକା: ଆସନ୍ତାକାଲି ଆମେରିକାର ୪୬ତମ ରାଷ୍ଟ୍ରପତି ଭାବେ ଶପଥ ନେବେ ଜୋ ବିଡେନ୍। ଶପଥଗ୍ରହଣ ଉତ୍ସବକୁ ଗୋଟିଏ ଦିନ ବାକିଥିବା ବେଳେ, ଓ୍ୱାସିଂଟନ ଡିସି ଓ ଏହାର ଆଖପାଖରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି। ସୁରକ୍ଷା ପାଇଁ ନ୍ୟାସନାଲ ଗାର୍ଡଙ୍କୁ ମୁତୟନ କରାଯାଇଛି। ଆଜି ସନ୍ଧ୍ୟା ସୁଦ୍ଧା ବିଦାୟୀ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ହ୍ୱାଇଟ୍ ହାଉସ୍ ଛାଡ଼ି ପାରନ୍ତି ବୋଲି କୁହାଯାଉଛି। ପୂର୍ବରୁ ଟ୍ରମ୍ପ ମିଲିଟାରୀ ଷ୍ଟାଇଲରେ ବିଦାୟୀ ସମାରୋହ ପାଇଁ ଦାବି କରିଥିଲେ। ହେଲେ ପେଣ୍ଟାଗନ୍ ଏ ନେଇ ମନା କରିଦେଇଥିଲା।
ସେପଟେ ବିଡେନଙ୍କ ଶପଥ ଗ୍ରହଣ ଉତ୍ସବରେ ହିଂସା ଆଶଙ୍କା ଥିବାରୁ ଓ୍ୱାସିଂଟନ ଡିସିର କ୍ୟାପିଟୋଲ ବିଲ୍ଡିଂକୁ ବନ୍ଦ କରି ଦିଆଯାଇଛି। ଏଥର ବିଡେନଙ୍କ ସରକାରରେ ୨୦ ଜଣ ଭାରତୀୟ ବଂଶୋଦ୍ଭବଙ୍କୁ ସ୍ଥାନ ମିଳିଛି। ସେମାନଙ୍କ ମଧ୍ୟରେ ୧୩ ଜଣ ମହିଳା ଥିବା ବେଳେ, ମୋଟ୍ ୧୭ ଜଣ ହ୍ୱାଇଟ୍ ହାଉସର ଗୁରୁତ୍ୱପୂର୍ଣ୍ଣ ପଦବୀରେ ନିଯୁକ୍ତି ପାଇଛନ୍ତି। ଆମେରିକାର ପୂରା ଜନସଂଖ୍ୟାରେ ମାତ୍ର ୧ ପ୍ରତିଶତ ଭାରତୀୟ ବଂଶୋଦ୍ଭବ ଥିବା ବେଳେ ହାଇଟ୍ ହାଉସ୍ରେ ସେମାନଙ୍କ ଦବ୍ଦବା ବଢୁଛି।
ଉପରାଷ୍ଟ୍ରପତି ଭାବେ ଭାରତୀୟ ବଂଶୋଦ୍ଭବ କମଲା ହାରିଶ ନିର୍ବାଚନ ଜିତିଥିବା ବେଳେ ଏହା ପୁଣି ଥରେ ଭାରତୀୟଙ୍କ ବଂଶୋଦ୍ଭବଙ୍କ ପାଇଁ ଆଣିଛି ଖୁସି ଖବର। ଏଥିସହ ଜୋ ବିଡେନଙ୍କ ପତ୍ନୀ ଜିଲ୍ ବିଡେନଙ୍କ ନୀତି ନିର୍ଦ୍ଦେଶକ ଭାବେ ଜଣେ ଭାରତୀୟ- ଆମେରିକୀୟଙ୍କୁ ନିଯୁକ୍ତି ମିଳିଛି।
