ହଟହଟା ହେଲେ ପରୀକ୍ଷାର୍ଥୀ, ଆଡମିଟ କାର୍ଡରେ ଥିବା ଠିକଣାରେ ନାହିଁ କେନ୍ଦ୍ର

ବଲାଙ୍ଗୀର: ଆଡମିଟ୍ କାର୍ଡରେ ଭୁଲ ଠିକଣାକୁ ନେଇ ହଟହଟା ଛାତ୍ରଛାତ୍ରୀ । ସ୍ଥାନୀୟ ପ୍ରଶାସନର ହସ୍ତକ୍ଷେପ ପରେ ବିଳମ୍ବରେ ପରୀକ୍ଷା ଦେଲେ ୩୩ ପରୀକ୍ଷାର୍ଥୀ । ଆଜି ଆରଆଇ ପରୀକ୍ଷା ଦେବାକୁ ବଲାଙ୍ଗୀର ଜିଲ୍ଲା ଟିଟିଲାଗଡ ମହିଳା ମହାବିଦ୍ୟାଳରେ ପହଞ୍ଚିଥିଲେ ଛାତ୍ରଛାତ୍ରୀ । ହେଲେ କଲେଜରେ କୌଣସି ପରୀକ୍ଷା କେନ୍ଦ୍ର ନଥିବାରୁ ଦେଶି ଛାତ୍ରଛାତ୍ରୀ ନିରାଶ ହୋଇଥିଲେ ।

ଆଡମିଟ୍ କାର୍ଡରେ ସରକାରୀ ମହିଳା ମହାବିଦ୍ୟାଳୟ ବଦଳରେ ଟିଟିଲାଗଡ଼ ରୋଡ ଲେଖାଯାଇଥିବାରୁ କଲେଜ ଆସି ନିରାଶ ହୋଇଥିଲେ ଛାତ୍ରଛାତ୍ରୀ । ବଲାଙ୍ଗୀର, ସୁନ୍ଦରଗଡ଼, ନୂଆପଡାର ଅନେକ ଛାତ୍ରଛାତ୍ରୀ ପରୀକ୍ଷା ଦେବାକୁ ଆସିଥିଲେ । ହେଲେ ଭୁଲ ଠିକଣା ଯୋଗୁଁ ପରୀକ୍ଷା ଦେବା ନେଇ ସୃଷ୍ଟି ହୋଇଥିଲା ଦ୍ବନ୍ଦ୍ବ । ସକାଳ ୧୦ଟାରୁ ପ୍ରଥମ ସିଟିଂ ଓ ଅପରାହ୍ନ ୩ଟାରୁ ଦ୍ବିତୀୟ ସିଟିଂ ପରୀକ୍ଷା ଥିଲା ।

ଶେଷରେ ଟିଟିଲାଗଡ଼ ଉପଜିଲ୍ଲାପାଳ ଓ ଥାନା ଅଧିକାରୀ ପହଞ୍ଚି ଛାତ୍ରଛାତ୍ରୀଙ୍କୁ ଏକ ଘରୋଇ ସ୍କୁଲ ବସରେ ବଲାଙ୍ଗୀର ପଠାଇଥିଲେ । ତ୍ରୁଟି ପାଇଁ ପିଲାମାନେ ବିଳମ୍ବରେ ପରୀକ୍ଷା ଦେଇଥିବାବେଳେ ଏଥିପାଇଁ ପିଲାଙ୍କୁ ୩ ଘଣ୍ଟା ଅତିରିକ୍ତ ସମୟ ଦିଆଯାଇଥିଲା ।