ଆତ୍ମହତ୍ୟା ଉଦ୍ୟମ ପଡିଲା ମହଙ୍ଗା ଏବେ ଦେବେ ୧୦ଲକ୍ଷ
ଆତ୍ମହତ୍ୟାରୁ କରୁଣ ଘଟଣା…ଆତ୍ମହତ୍ୟା କରୁଥିଲେ ଚାଷୀ, ଜୀବନ ବଞ୍ଚାଇଦେଲେ ପୋଲିସ…ଏବେ ଚାଷୀ ଗଣିବେ ମୋଟା ଅଙ୍କର ଟଙ୍କା…ଲକ୍ଷେ କି ଦୁଇ ଲକ୍ଷ ନୁହେଁ ପୁରା ୧୦ ଲକ୍ଷ ଟଙ୍କା ଗଣିବେ ଚାଷୀ ଜଣକ…ଜୀବନ ବଞ୍ଚାଇବାରେ ଲାଗିଥିବା ପୋଲିସକୁ ଖର୍ଚ୍ଚ ଦେବାକୁ ପଡ଼ିବ…ଏଥି ପାଇଁ ତାଙ୍କୁ ନୋଟିସ ମଧ୍ୟ ମିଳିଛି…ଏମିତି ଘଟଣା ଘଟିଛି ରାଜସ୍ଥାନର ଝୁଞ୍ଝୁନୁ ଅଞ୍ଚଳରେ…
ରାଜସ୍ଥାନର ଝୁଞ୍ଝୁନୁ ଅଞ୍ଚଳର ଜଣେ ଚାଷୀ ବିଦ୍ୟାଧର ଯାଦବ ଆତ୍ମହତ୍ୟା କରିବା ପାଇଁ ଧମକ ଦେଇଥିଲା । ହେଲେ, ପ୍ରଶାସନ ତାକୁ ବଞ୍ଚାଇ ଦେଇଛି ଏବଂ ଶାନ୍ତି ଭଙ୍ଗର ଅଭିଯୋଗରେ ଗିରଫ ମଧ୍ୟ କରିଛି । ଏବେ ଚାଷୀ ଜଣଙ୍କୁ ପ୍ରଶାସନ ନୋଟିସ ମଧ୍ୟ ପଠାଇଛି, ଯେଉଁଥିରେ ଉଲ୍ଲେଖ କରା ଯାଇଛି ଯେ ତାକୁ ବଞ୍ଚାଇବାରେ ପ୍ରାୟ ୧୦ ଲକ୍ଷ ଟଙ୍କା ଖର୍ଚ୍ଚ ହୋଇଛି। ଚାଷୀଙ୍କୁ ଏହି ଟଙ୍କା ଦେବାକୁ ପଡିବ ବୋଲି ନୋଟିସରେ କୁହାଯାଇଛି ।
କାହିଁକି ଆତ୍ମହତ୍ୟା କରିବା ପାଇଁ ଚାହୁଁଥିଲେ ?
ଝୁଞ୍ଝୁନୁରେ ଅଞ୍ଚଳରେ ଏକ ସିମେଣ୍ଟ ଫ୍ୟାକ୍ଟ୍ରି ଅଛି । ସିମେଣ୍ଟ ଫ୍ୟାକ୍ଟ୍ରିର ନିର୍ମାଣ ସମୟରେ ବିଦ୍ୟାଧର ଯାଦବଙ୍କ ଜମି ମଧ୍ୟ ଯାଇଥିଲା। ବିଦ୍ୟାଧରଙ୍କ ଅଭିଯୋଗ ଥିଲା ଯେ ତାଙ୍କୁ ଜମି ଏବଂ ଘରର ଉଚିତ ମୂଲ୍ୟ ଦିଆଯାଇନି। ସେ ଏହାକୁ ନେଇ ଅନେକ ବାର କମ୍ପାନୀ ସହିତ ଜିଲ୍ଲାର ଅଧିକାରୀଙ୍କୁ ମଧ୍ୟ ଜଣାଇଥିଲେ, କିନ୍ତୁ କିଛି ସୁଫଳ ମିଳିନଥିଲା।
ଜମିର ଉଚିତ ମୂଲ୍ୟ ନମିଳିବାରୁ ବିଦ୍ୟାଧର ଚିନ୍ତିତ ଥିଲେ। ତାଙ୍କ କହିବା ଅନୁସାରେ, ସେ ଅଫିସକୁ ଦୌଡ଼ି ଦୌଡ଼ି ଥକି ଯାଇଥିଲେ, କିନ୍ତୁ କେହି ମଧ୍ୟ ତାଙ୍କ ସମସ୍ୟାକୁ ବୁଝି ନଥିଲେ। ଯାହାଫଳରେ ସେ ଆତ୍ମହତ୍ୟା କରିବା ପାଇଁ ନିଷ୍ପତ୍ତି ନେଇଥିଲେ|
୧୧ ଡିସେମ୍ବରରେ ସେ ଫ୍ୟାକ୍ଟ୍ରି ବାହାରକୁ ଯାଇଥିଲେ ଏବଂ କହିଥିଲେ ଯେ ଯଦି ମୋ ଜମିର ଉଚିତ୍ ମୂଲ୍ୟ ନମିଳେ ପରିବାର ସହିତ ଏଠାରେ ଆତ୍ମହତ୍ୟା କରିବେ ବୋଲି ଧମକ ଦେଇଥିଲେ। ତା’ପରେ ଘଟଣା ସ୍ଥଳରେ ଥିବା ପୋଲିସ ତାକୁ ଗିରଫ କରିଥିଲା। ହେଲେ, ସେ ଏସ୍ଡିଏମ କୋର୍ଟରୁ ବେଲ୍ ମିଳିଥିଲା। ଏହି ଘଟଣାର ଗୋଟିଏ ଦିନ ପରେ ଜମିର ମୂଲ୍ୟ ବାବଦରେ ତାଙ୍କୁ ତିନି କୋଟି ଟଙ୍କା ମିଳିଥିଲା।
କାହିଁକି ଦେବେ ୧୦ ଲକ୍ଷ ଟଙ୍କା ?
ତେବେ ଏହି ଘଟଣାରେ ୯୯ ଜଣ ପୋଲିସକର୍ମୀଙ୍କୁ ନିୟୋଜିତ କରାଯାଇଥିଲା | ଏଥିରେ ଜଣେ ଏସ୍ପି, ଦୁଇ ଡିଏସ୍ପି ସହ ଅନ୍ୟାନ୍ୟ ଅଫିସରଙ୍କୁ ମଧ୍ୟ ନିୟୋଜିତ କରାଯାଇଥିଲା। କେତେକ ସରକାରୀ ଗାଡିକୁ ମଧ୍ୟ ବ୍ୟବହାର କରାଯାଇଥିଲା। ଏଥିରେ ପ୍ରାୟ 9 ଲକ୍ଷ 99 ହଜାର 577 ଟଙ୍କା ଖର୍ଚ୍ଚ ହୋଇଥିଲା। ଏବେ ନୋଟିସ ପଠାଇ ଚାଷୀଙ୍କୁ ଏହି ଟଙ୍କା ଦେବାକୁ କୁହାଯାଇଛି।
