ମନମୋହିଲା ଧଉଳି ଗଣନାଟ୍ଯର ନାଟକ ‘ଚଣ୍ଡାଶୋକ’

ଭୁବନେଶ୍ୱର : ଯାତ୍ରା ରଙ୍ଗମଞ୍ଚରେ ସମ୍ରାଟ ଅଶୋକଙ୍କ କାହାଣୀ । ଅଶୋକଙ୍କ ସାମରିକ ଅଭିଯାନ, ପରବର୍ତ୍ତୀ ସମୟରେ ଚଣ୍ଡାଶୋକରୁ ଧର୍ମାଶୋକରେ ପରିବର୍ତ୍ତନ ପରି ଗାରିମାମୟ ଇତିହାସକୁ ନାଟକ ମାଧ୍ୟମରେ ଅତି ଚମତ୍କାର ଢଙ୍ଗରେ ପରିବେଷଣ କଲେ ଧଉଳି ଗଣନାଟ୍ୟ କଳାକାର । ଭୁବନେଶ୍ୱର ସାଲିଆ ସାହି ଦୋଳଗୋବିନ୍ଦ ଯାତ୍ରା କମିଟି ପକ୍ଷରୁ ୪ଦିନିଆ ଏହି ଯାତ୍ରାର ଅନ୍ତିମ ସନ୍ଧ୍ୟାରେ ମଞ୍ଚସ୍ଥ ହେଲା ନାଟକ ଚଣ୍ଡାଶୋକ । ନିର୍ଦ୍ଦେଶନା ହର ବାରିକ ଦେଇଥିଲା ବେଳେ ପ୍ରଯୋଜକ ଥିଲେ ବିଶ୍ୱଜିତ ରାଜ । ସଙ୍ଗୀତ ମିହିର ମହାନ୍ତି, ନୃତ୍ୟ ଶୁଭେନ୍ଦୁ ଓ ସହ ନିର୍ଦ୍ଦେଶନା ଭାର ସମ୍ଭାଳିଥିଲେ ଅମର ସାହୁ । ସମ୍ରାଟ ଅଶୋକଙ୍କ ଭୂମିକାରେ ରୁଦ୍ରଙ୍କ ଚମତ୍କାର ଅଭିନୟ ଦର୍ଶକଙ୍କୁ ବିମୋହିତ କରିଥିଲା ।

ସାଲିଆ ସାହିର ୧୮ ବର୍ଷର ଅନୁଷ୍ଠାନ ଦୋଳ ଗୋବିନ୍ଦ ଯାତ୍ରା କମିଟି ପକ୍ଷରୁ ଚଳିତବର୍ଷ ଆୟୋଜିତ ଏହି ୪ ଦିନିଆ ଯାତ୍ରା ଉଦଯାପିତ ହୋଇଯାଇଛି । ଅନ୍ତିମ ସନ୍ଧ୍ୟାରେ ମୁଖ୍ୟ ଅତିଥି ଭାବେ ନନ୍ଦିଘୋଷ ଟିଭିର ମୁଖ୍ୟ ସମ୍ପାଦକ ଶିଶିର ଭଟ୍ଟମିଶ୍ର ଯୋଗ ଦେଇଥିଲେ । କାର୍ଯ୍ଯକ୍ରମରେ ନାଟକର ନିର୍ଦ୍ଦେଶକ ଓ କମିଟିର ସମସ୍ତ କର୍ମକର୍ତ୍ତା ଉପସ୍ଥିତ ଥିଲେ । ଆଧୁନିକତାର ଛାପରେ ଧଉଳି ଗଣନାଟ୍ୟର ନାଟକ ଚଣ୍ଡାଶୋକ ଦର୍ଶକଙ୍କୁ ସେହି କଳିଙ୍ଗ ଯୁଦ୍ଧର ବିଭୀଷିକାକୁ ପୁଣି ମନେ ପକାଇ ଦେଇଛି ।