ଦିନ କେଇଟା ପରେ ୨୦୨୫-୨୬ ଯାତ୍ରା ଋତୁ। ଦର୍ଶକଙ୍କ ସାମ୍ନାକୁ ଆସିବେ ଯାତ୍ରା ପାର୍ଟି। ମଞ୍ଚରେ ଦେଖାଇବେ ନିଜନିଜ ନାଟକର ଜଲଓ୍ବା। ଏଥିପାଇଁ ଏବେ ଆଖଡ଼ା ଶାଳରେ ଚାଲିଛି ଜୋରଦାର ପ୍ରସ୍ତୁତି। ଏ ଦୃଶ୍ୟ ହେଉଛି ଯାଜପୁର ଜିଲ୍ଲା କଳିଙ୍ଗନଗର ଶିଳ୍ପାଞ୍ଚଳର ବଙ୍ଗଳା ଛକ ଠାରେ ଥିବା ଯାତ୍ରା ଧଉଳି ଗଣନାଟ୍ୟ କ୍ୟାମ୍ପର। ଯାତ୍ରା ଧଉଳି ତାର ଚଳିତବର୍ଷର ପ୍ରଥମ ନାଟକ ଚଣ୍ଡାଶୋକର ପ୍ରସ୍ତୁତି ଚଳାଇଛି। ହର ବାରିକଙ୍କ କାହାଣୀ ଓ ନିର୍ଦ୍ଦେଶନାରେ ଐତିହାସିକ ନିକଟ “ଚଣ୍ଡାଶୋକ” କୁ ସମ୍ପୂର୍ଣ୍ଣ ପ୍ରସ୍ତୁତ କରାଯାଇ ଫାଇନାଲ ଟଚ୍ ଦିଆଯାଉଛି। ଚଳିତବର୍ଷ ଏହି ଅପେରାରେ ବହୁ ନାମିଦାମୀ କଳାକାର ସାମିଲ ହୋଇଛନ୍ତି। ତେବେ ଚଳିତବର୍ଷ ଦର୍ଶକଙ୍କ ରୁଚି ଅନୁସାରେ ନାଟକ ପ୍ରସ୍ତୁତ କରାଯାଇଥିବା କଳାକାରମାନେ କହିଛନ୍ତି।
ଯାତ୍ରା ଇତିହାସରେ ପ୍ରଥମ ଥର ଚଳିତବର୍ଷ ଯାତ୍ରା ମଞ୍ଚରେ ଘୋଡ଼ା ଦେଖିବାକୁ ପାଇବେ ଦର୍ଶକ। ଯାତ୍ରା ଧଉଳି ର ପ୍ରଯୋଜକ ବିଶ୍ବଜିତ ରାଜ୍ କିଛି ନୂଆ କରିବାର ଚିନ୍ତା କରିଥିଲେ। ପରେ ଐତିହାସିକ କଳିଙ୍ଗ ଯୁଦ୍ଧକୁ ନେଇ ଏକ ନାଟକ ପ୍ରସ୍ତୁତ କରିବାକୁ ଲେଖକ ହର ବାରିକଙ୍କୁ କହିଥିଲେ। ପରେ ଚଣ୍ଡାଶୋକ ନାମରେ ଏହି ନାଟକ ପ୍ରସ୍ତୁତ କରାଯାଇଥିଲା। ଏହି ନାଟକକୁ ନେଇ ସମସ୍ତେ ବେଶ୍ ଉତ୍ସାହିତ ଥିବାବେଳେ ଏହା ଦର୍ଶକଙ୍କୁ ଖୁବ୍ ମନୋରଞ୍ଜନ ଦେବ ବୋଲି ପ୍ରଯୋଜକ, ନିର୍ଦ୍ଦେଶକ ଓ କଳାକାରମାନେ ଆଶାବାଦୀ ଅଛନ୍ତି।
