‘ଓଡ଼ିଶା ନିଜ କ୍ଷମତା ବଳରେ ବିକାଶଶୀଳ ରାଜ୍ୟରେ ପରିଣତ ହୋଇଛି’

ଭୁବନେଶ୍ବର: ଜାତି ନନ୍ଦିଘୋଷ କନକ୍ଲେଭ୍ -୨୦୨୫ର ପ୍ରଥମ ଅଧିବେଶନ ଥିଲା ‘୨୦୩୬ ପାଇଁ ବିକାଶର ନକ୍ସା’ ପ୍ରସଙ୍ଗ । ଆଲୋଚନାରେ ଭାଗ ନେଇ ମତ ରଖିଛନ୍ତି ଅତିଥି । ରାଜ୍ୟ ଅବହେଳାର ଶିକାର ହୋଇ ବି କେମିତି ନିଜ କ୍ଷମତା ବଳରେ ଆଜି ଭାରତର ଏକ ବିକାଶଶୀଳ ରାଜ୍ୟରେ ପରିଣତ ହୋଇ ପାରିଛି ତା’ ଉପରେ ମତ ରଖିଛନ୍ତି ଅତିଥି ।

ବରିଷ୍ଠ ସାମ୍ଵାଦିକ ଦିଲ୍ଲୀପ ବିଷୋୟୀ କହିଛନ୍ତି, ୯୦ ବର୍ଷ ମଧ୍ୟରେ ଆମେ ଅବହେଳାର ଶିକାର ହୋଇଛୁ । ଓଡ଼ିଶା ନିଜ କ୍ଷମତା ବଳରେ ବିକାଶଶୀଳ ରାଜ୍ୟରେ ପରିଣତ ହୋଇଛି । ଖାଦ୍ୟାଭାବୁ କେହି ମରୁ ନଥିବେ, ଚିକିତ୍ସା ଅଭାବରୁ କେହି ଯନ୍ତ୍ରଣା ପାଉ ନଥିବେ । ସେମିତି ରାଜ୍ୟ ଯଦି ଆମେ ଦେଖିପାରିବା, ସେତେବେଳେ ଆମେ ବିକଶିତ ରାଜ୍ୟ କହି ପାରିବା ।

ସେହପରି ବରିଷ୍ଠ କଂଗ୍ରେସ ନେତା ପଞ୍ଚାନନ କାନୁନଗୋ ୨୦୩୬ ପାଇଁ ବିକାଶର ନକ୍ସା ପ୍ରସଙ୍ଗରେ ନିଜର ମତାମତ ରଖିଥିଲେ । ଏକ ରୁଗଣ ଅର୍ଥନୈତିକ ସ୍ଥିତିରେ ଓଡ଼ିଶା ଜନ୍ମ ନେଇଥିଲା । ଏବେ ବଳକା ରାଜ୍ୟରେ ଓଡ଼ିଶା ପରିଣତ ହୋଇଛି । ୨୦୩୬ ବଜେଟର ଆକଳନ ଯାହା ହେଉଛି ୩୨ ଲକ୍ଷ କୋଟିରୁ ୩୫ କୋଟି ଭିତରେ ଖର୍ଚ୍ଚ ହେବ । ଆଜିବି ଓଡ଼ିଶା ଏକ ପ୍ରକାର ଶୋଷଣର ଶିକାର ହୋଇଚାଲିଛି । ଇଚ୍ଛାଶକ୍ତି ଓ ରୋଡମ୍ୟାପ୍ ରହିଲେ ଆମେ ଆମ ଲକ୍ଷ୍ୟ ହାସଲ କରିପାରିବା ।

ଏହି ପ୍ରସଙ୍ଗରେ ନିଜର ମତାମତ ରଖିଛନ୍ତି ସିୱାଇଏସଡି ସହ-ପ୍ରତିଷ୍ଠାତା ଜଗଦାନନ୍ଦ । ଆଜି ସାରା ଦେଶରେ ମୁଣ୍ଡପିଛା କାର୍ବନ ଏମିସନ ଓଡ଼ିଶାରେ ସର୍ବାଧିକ । ୨୦୩୨ ବେଳକୁ ଚରମ ସୀମାରେ ପହଞ୍ଚିଥିବ ସ୍ଥିତି। ଜନସଂଖ୍ୟା ବଢୁଛି କିନ୍ତୁ ଜନସଂଖ୍ୟାର ହାର କମୁଛି । ୨୦୩୬ ବେଳକୁ ୧୫ ପ୍ରତିଶତରୁ ଅଧିକ ଲୋକ ୬୦ ବର୍ଷରୁ ଅଧିକା ହୋଇଥିବେ । ବିକଶିତ ଓଡ଼ିଶାରେ ଭଲ ବାସସ୍ଥାନର ଆବଶ୍ୟକତା ଅଛି । ଦୁର୍ବିପାକ ପ୍ରତିରୋଧର ଘରର ଆବଶ୍ୟକ ରହିଛି । ମହିଳାଙ୍କ ସୁରକ୍ଷିତ ସ୍ଵାସ୍ଥ୍ୟ ଓ ନିରାପତ୍ତା ବିକାଶର ଆଉ ଏକ ଚିତ୍ର । ଖଣି, ଖାଦାନକୁ ଆମେ ପର ପୀଢି ପାଇ ସଂରକ୍ଷିତ କରି ରଖିବାକୁ ପଡ଼ିବ । ପରିବେଶର ସୁରକ୍ଷା ମଧ୍ୟ ବିକଶିତ ଓଡ଼ିଶାର ଆଉ ଏକ ଦିଗ ବୋଲି ସେ କହିଥିଲେ ।