ବିଶ୍ୱରେ ଏମିତି ଏକ ସ୍ଥାନ ଅଛି ଯେଉଁଠି ବଞ୍ଚିବାକୁ ହେଲେ ୨୪ ଘଣ୍ଟା ପିନ୍ଧିବାକୁ ପଡ଼େ ମାସ୍କ
1 min read
ଇଜୁ: ଭାରତରେ କରୋନା ରୋଗୀଙ୍କ ସଂଖ୍ୟା କ୍ରମାଗତ ଭାବେ ବୃଦ୍ଧି ପାଉଛି । ଏଭଳି ପରିସ୍ଥିତିରେ ପ୍ରାୟ ସବୁ ରାଜ୍ୟ ମାସ୍କ ପିନ୍ଧିବା ବାଧ୍ୟତାମୂଳକ କରିଛନ୍ତି । ଆଜି ଲୋକମାନେ କରୋନା ଭୂତାଣୁକୁ ଏଡାଇବା ପାଇଁ ମାସ୍କ ପିନ୍ଧିଛନ୍ତି, କିନ୍ତୁ ଆପଣ ଜାଣନ୍ତି କି ଦୁନିଆରେ ଏପରି ଏକ ସ୍ଥାନ ଅଛି ଯେଉଁଠାରେ ଲୋକମାନେ ଜୀବିତ ରହିବାକୁ ୨୪ ଘଣ୍ଟା ପାଇଁ ମାସ୍କ ପିନ୍ଧନ୍ତି । ଆସନ୍ତୁ ଜାଣିବା ଏମିତି ଏକ ସ୍ଥାନ ଯେଉଁଠାରେ ବଞ୍ଚିବା ପାଇଁ ମାସ୍କ ଜରୁରୀ ।
କରୋନା ଭାଇରସକୁ ଏଡାଇବା ପାଇଁ N95 କିମ୍ବା ମାସ୍କ ପିନ୍ଧାଯାଉଥିବାବେଳେ ଜାପାନର ମିଆକେଜିମା ଇଜୁ ଦ୍ୱୀପରେ ରହୁଥିବା ଲୋକମାନେ ଦୀର୍ଘ ୨୪ଘଣ୍ଟା ଧରି ମାସ୍କ ପିନ୍ଧିଥାନ୍ତି । ପୁଣି ଏଗୁଡ଼ିକ ସାଧାରଣ ମାସ୍କ ନୁହେଁ । ଏହି ମାସ୍କଗୁଡ଼ିକୁ ‘ଗ୍ୟାସ୍ ମାସ୍କ’ କୁହାଯାଏ ।
ଏଠାରେ ଲୋକମାନେ କାହିଁକି ପିନ୍ଧନ୍ତି ମାସ୍କ ?
ପୃଥିବୀରେ ଏପରି ପରିସ୍ଥିତି ଉପୁଜେ, ଯେଉଁଥିରେ ଜଣେ ବ୍ୟକ୍ତିକୁ ବଞ୍ଚିବାକୁ ହେଲେ ଅନେକ ଉପାୟ ଅବଲମ୍ବନ କରିବାକୁ ପଡିଥାଏ । ଠିକ୍ ସେମିତି ମିଆକେଜିମା ଇଜୁ ଦ୍ୱୀପରେ ରହୁଥିବା ଲୋକମାନେ ଏକ ଭୟଙ୍କର ପରିସ୍ଥିତି ଦେଇ ଗତି କରୁଛନ୍ତି ସେଥିପାଇଁ ସେଠାରେ ରହୁଥିବା ଲୋକମାନଙ୍କୁ ମାସ୍କ ପିନ୍ଧିବାକୁ ପଡ଼ୁଛି ।
ଏହି ଦ୍ୱୀପରେ ବାସ କରୁଥିବା ଲୋକଙ୍କୁ ଜୀବିତ ରହିବା ପାଇଁ ସେମାନଙ୍କୁ ସର୍ବଦା ଗ୍ୟାସ୍ ମାସ୍କ ପିନ୍ଧିବାକୁ ପଡେ, କାରଣ ଏଠାରେ ବାୟୁରେ ଥିବା ବିଷାକ୍ତ ଗ୍ୟାସର ପରିମାଣ ସାଧାରଣ ସ୍ତରଠାରୁ ବହୁତ ଅଧିକ ରହିଥାଏ ।
ଏଠାରେ ବାୟୁ କାହିଁକି ବିଷାକ୍ତ?
ଇଜୁ ଦ୍ୱୀପପୁଞ୍ଜ ଅନେକ ଛୋଟ ବଡ଼ ଦ୍ୱୀପପୁଞ୍ଜର ଏକ ସମୂହ । ସେଥିମଧ୍ୟରୁ କେବଳ ସାତଟି ଦ୍ୱୀପରେ ଲୋକମାନେ ବସବାସ କରନ୍ତି । ସେଥିମଧ୍ୟରୁ ଗୋଟିଏ ହେଉଛି ମିଆକେଜୀମା ଦ୍ୱୀପ ।
ଆଜି ଏହା ପର୍ଯ୍ୟଟନ ପାଇଁ ପ୍ରସିଦ୍ଧ । ଏଠାକୁ ଆସୁଥିବା ପ୍ରତ୍ୟେକ ପର୍ଯ୍ୟଟକଙ୍କ ପାଇଁ ମାସ୍କ ପିନ୍ଧିବା ବାଧ୍ୟତାମୂଳକ । ଏହି ଇଜୁ ଦ୍ୱୀପପୁଞ୍ଜ ଏକ ସକ୍ରିୟ ଆଗ୍ନେୟଗିରି ନିକଟରେ ଅବସ୍ଥିତ । ତେଣୁ ଏଠାକାର ଲୋକଙ୍କ ମନରେ ସର୍ବଦା ଆଗ୍ନେୟଗିରି ଉଦଗୀରଣର ଭୟ ରହିଥାଏ ।
ମିଆକେଜିମା ଦ୍ୱୀପର କଣ ରହିଛି ଇତିହାସ ?
ଯଦି ଆମେ ମିଆକେଜିମା ଦ୍ୱୀପର ଇତିହାସ ବିଷୟରେ କହିବା, ତେବେ ୨୦୦୦ ମସିହାରେ ଏକ ଭୟଙ୍କର ବିସ୍ଫୋରଣ ଆଗ୍ନେୟଗିରି ଉଦଗୀରଣ ଘଟିଥିଲା । ଏହି ବିସ୍ଫୋରଣ ଏତେ ବିପଜ୍ଜନକ ଥିଲା ଯେ ଏଠାକାର ଲୋକଙ୍କୁ ସେମାନଙ୍କ ଘର ଛାଡିବାକୁ ପଡିଥିଲା ।
ସେଠାକାର ଲୋକମାନେ କହିଥିଲେ ଯେ ଏହା ଏକ ବିସ୍ଫୋରଣ ନୁହେଁ ବରଂ ବିନାଶର ଦୃଶ୍ୟ । ଲାଗୁଥିଲା ଯେପରି ସବୁକିଛି ସରିଯାଇଛି, ଏହି ବିସ୍ଫୋରଣ ଦ୍ୱିପପୁଞ୍ଜର ଲୋକଙ୍କୁ ସେମାନଙ୍କ ଘର ଛାଡିବାକୁ ବାଧ୍ୟ କରିଥିଲା । ଏବଂ ସେଠାରୁ ବାହାରୁ ଥିବା ବିଷାକ୍ତ ଗ୍ୟାସ୍ ବାୟୁକୁ ମଧ୍ୟ ବିଷାକ୍ତ କରିଦେଇଥିଲା । ତେଣୁ ଏହି ଅଞ୍ଚଳରେ ବିମାନ ଉଡ଼ାଣ ମଧ୍ୟ ନିଷେଧ କରାଯାଇଥିଲା ।
ଯେତେବେଳେ ଏହି ଉଦଗୀରଣ ହେଲା, ତେସେବେଳେ ଲାଭା ସହିତ ବହୁ ପରିମାଣର ବିଷାକ୍ତ ଗ୍ୟାସ୍ (ମୁଖ୍ୟତଃ ସଲଫର୍ ଡାଇଅକ୍ସାଇଡ୍) ବାହାରିଥିଲା, କେବଳ ସେତିକି ନୁହେଁ, ଆଗ୍ନେୟଗିରି ଶାନ୍ତ ହେବା ପରେ ମଧ୍ୟ ଏହି ବିଷାକ୍ତ ଗ୍ୟାସ୍ ବାହାରକୁ ଆସିଲା । ତେବେ ୨୦୦୦ ମସିହା ପୂର୍ବରୁ, ଏଠାରେ ଅନେକ ବଡ଼ ବିସ୍ଫୋରଣ ହୋଇଛି ।
ମିଆକେଜିମାରେ ଅବସ୍ଥିତ ଆଗ୍ନେୟଗିରି ଗତ ୫୦୦ ବର୍ଷ ମଧ୍ୟରେ ଅନେକ ଥର ବିସ୍ଫୋରଣ ହୋଇଛି । ସୂଚନା ଅନୁଯାୟୀ, ୧୯୪୦ ମସିହାରେ ହୋଇଥିବା ବିସ୍ଫୋରଣରେ ୧୧ ଜଣଙ୍କର ମୃତ୍ୟୁ ହୋଇଥିଲା। ଯାହା ପରେ ୧୯୬୨ ଏବଂ ୧୯୮୩ରେ ବିସ୍ଫୋରଣ ହୋଇଥିଲା ।
୨୦୦୦ରେ ଯେତେବେଳେ ଆଗ୍ନେୟଗିରି ଉଦଗୀରଣ ହେଲା, ସେତେବେଳେ ସେଠାରେ ରହିବାକୁ ବାରଣ କରାଯାଇଥିଲା । କିନ୍ତୁ ୨୦୦୫ ମସିହାରେ, ଲୋକମାନେ ଧୀରେ ଧୀରେ ବସବାସ କରିବାକୁ ଲାଗିଲେ ।
୨୦୦୫ ସୁଦ୍ଧା, ଅଧିକାଂଶ ଲୋକ ଦ୍ୱୀପକୁ ଫେରିବା ଆରମ୍ଭ କରିଥିଲେ । ୨୪ ଘଣ୍ଟା ପାଇଁ ଗ୍ୟାସ ମାସ୍କ ପିନ୍ଧିବାକୁ ସରକାର ଲୋକଙ୍କୁ ପରାମର୍ଶ ଦେଇଥିଲେ । ଏଥି ସହିତ ସରକାର ନିୟମିତ ଭାବେ ଲୋକଙ୍କ ସ୍ୱାସ୍ଥ୍ୟ ଯାଞ୍ଚ ମଧ୍ୟ କରୁଥିଲେ । ଯେଉଁ ଲୋକମାନେ ଗ୍ୟାସ ମାସ୍କ ପିନ୍ଧନ୍ତି ନାହିଁ ସେମାନଙ୍କୁ ଦ୍ୱୀପରେ ରହିବାକୁ ଦିଆଯାଇନଥିଲା ।
ଏକ ଜାତୀୟ ଗଣମାଧ୍ୟମ ରିପୋର୍ଟ ଅନୁଯାୟୀ, ୨୦୦୦ ମସିହାରେ ହୋଇଥିବା ବିସ୍ଫୋରଣ ସମୟରେ ୩,୬୦୦ ଲୋକଙ୍କୁ ଦ୍ୱୀପ ଛାଡିବାକୁ ପଡିଥିଲା। କାରଣ ଏଠାରେ ଥିବା ବିଷାକ୍ତ ବାୟୁ ଅନେକ ଲୋକଙ୍କ ଫୁସଫୁସକୁ ନଷ୍ଟ କରିଦେଇଥିଲା ।
ଆଜି ବି ଏଠାରେ ଲୋକମାନେ ପ୍ରତିକୂଳ ପରିସ୍ଥିତିରେ ଜୀବନ ବିତାଉଛନ୍ତି ?
ଯେକୌଣସି ବ୍ୟକ୍ତିଙ୍କ ପାଇଁ ସବୁଠାରୁ ପ୍ରିୟ ସ୍ଥାନ ହେଉଛି ସେମାନଙ୍କର ଘର, ଏପରି ପରିସ୍ଥିତିରେ, ଏଠାରେ ଲୋକମାନେ ଚାହିଁଲେ ବି ନିଜ ଘର ଛାଡି ପାରୁ ନାହାଁନ୍ତି । ତେଣୁ ଆଜି ବି ସେ ମାସ୍କ ୨୪ଘଣ୍ଟା ମାସ୍କ ପିନ୍ଧିବାର କଡ଼ା ନିୟମ ସହ ଲୋକେ ଜୀବନ ବିତାଉଛନ୍ତି । କେବଳ ସେତିକି ନୁହେଁ ବିବାହ ସମୟରେ ଉଭୟ ବର କନ୍ୟା ଗ୍ୟାସ ମାସ୍କ ପିନ୍ଧିବାକୁ ବାଧ୍ୟ ହୋଉଛନ୍ତି । ଯଦିଓ ଆପଣ ଏହି ଚିତ୍ରକୁ ଅଦ୍ଭୁତ ମନେ କରନ୍ତି, କିନ୍ତୁ ଏହି ବିବାହ ଏକ ସାଧାରଣ ବିବାହ ଭଳି ଥିଲା ।
ଆପଣଙ୍କୁ କହି ରଖୁଛୁ ଯେ, ଏହି ଦ୍ୱୀପର ମୁଖ୍ୟ ଆକର୍ଷଣ ହେଉଛି ଖାଲି ଘର, ଯାହାର ମାଲିକମାନେ ଏହି ଦ୍ୱୀପକୁ କେବେ ଫେରି ନାହାଁନ୍ତି, ଏହି ଘର ଗୁଡ଼ିକ ଲାଭା ଦ୍ୱାରା ନଷ୍ଟ ହୋଇଯାଇଛି ସତ କିନ୍ତୁ ଏଗୁଡ଼ିକଦେଖିବାକୁ ସୁନ୍ଦର ଲାଗେ । ପର୍ଯ୍ୟଟକଙ୍କ ପାଇଁ ଗ୍ୟାସ୍ ମାସ୍କ ଏଠାରେ ବାସିନ୍ଦାଙ୍କ ଆୟର ଏକ ମୁଖ୍ୟ ଉତ୍ସ ।
ବର୍ତ୍ତମାନ ଏହି ଦ୍ୱୀପରେ ରୋମାଞ୍ଚକ ପୂର୍ଣ୍ଣ ଦୃଶ୍ୟ ଦେଖିବାକୁ ପର୍ଯ୍ୟଟକମାନେ ଆସନ୍ତି । ଏବଂ ଏହି ପର୍ଯ୍ୟଟକମାନେ ଦ୍ୱୀପରେ ପହଞ୍ଚିବା ପରେ ସେମାନଙ୍କୁ ଗ୍ୟାସ୍ ମାସ୍କ ପିନ୍ଧିବାକୁ ପଡ଼ିଥାଏ । ଏଥିପାଇଁ ଏଠାରେ ଥିବା ଷ୍ଟୋର୍ଗୁଡିକରେ ଥରେ ବ୍ୟବହାର କରାଯାଉଥିବା ମାସ୍କ ଉପଲବ୍ଧ ହୋଇଥାଏ । ଟୁରିଷ୍ଟ ୱାର୍ଲଡରେ ଏହା “GAS MASK TOURISM” ଭାବରେ ପ୍ରସିଦ୍ଧ ।
