ମେହବୁବା ମୁଫତିଙ୍କ ବିବାଦୀୟ ବୟାନ ପରେ ବିଜେପିର ତୀବ୍ର ବିରୋଧ

ଶ୍ରୀନଗର: ଜାମ୍ମୁ ଓ କାଶ୍ମୀରର ପୂର୍ବତନ ମୁଖ୍ୟମନ୍ତ୍ରୀ ମେହବୁବା ମୁଫତି ଜାତୀୟ ପତାକାକୁ ନେଇ ଦେଇଥିବା ବିବାଦୀୟ ବୟାନ ପରେ ଜୋରଦାର ହଙ୍ଗାମା ଆରମ୍ଭ ହୋଇଛି । ଆଜି ଭାରତୀୟ ଜନତା ପାର୍ଟି କର୍ମକର୍ତ୍ତା ଶ୍ରୀନଗରରେ ବିରୋଧ ପ୍ରଦର୍ଶନ କରିଛନ୍ତି । ବିଜେପି ନେତାମାନେ ଲାଲଚୌକରେ ଜାତୀୟ ପତାକା ଉଡାଇବା ପାଇଁ ଚେଷ୍ଟା କରିଥିଲେ । କିନ୍ତୁ ସେଠାରେ ପୋଲିସ ପହଞ୍ଚି ସେମାନଙ୍କୁ ଅଟକାଇଥିବା ବେଳେ କିଛି କାର୍ଯ୍ୟକର୍ତ୍ତାଙ୍କୁ ଗିରଫ କରିଛି । ଏଥିସହ ପିଡିପି କାର୍ଯ୍ୟାଳୟ ଆଗରେ ଜାତୀୟ ପତାକା ଉଡାଇବା ସହ ଭାରତ ମାତା କି ଜୟ ନାରା ଦିଆଯାଇଥିଲା ।

#WATCH | Jammu and Kashmir: Police detain Bharatiya Janata Party (BJP) workers who were allegedly trying to hoist national flag at clock tower in Lal Chowk, Srinagar. pic.twitter.com/j8rUFH0kco

— ANI (@ANI) October 26, 2020

ନିକଟରେ ମେହବୁବା ମୁଫତି ନଜରବନ୍ଦୀରରୁ ବାହାରିବା ପରେ ଚଳଚଞ୍ଚଳ ହୋଇଛି କାଶ୍ମୀରରେ ରାଜନୀତି । ଦୁଇ ଦିନ ତଳେ ସେ କାଶ୍ମୀରର ପତାକା ନଫେରିଲେ ସେ ଜାତୀୟ ପତାକା ଧରିବେ ନାହିଁ ବୋଲି କହିଥିଲେ । କାଶ୍ମୀରର ସ୍ୱତନ୍ତ୍ର ପତାକା ତାଙ୍କ ପରିଚୟ ବୋଲି ମେହେବୁବା କହିଥିଲେ । କାଶ୍ମୀରରେ ଧାରା ୩୭୦ ନଫେରିବା ପର୍ଯ୍ୟନ୍ତ ଲଢେଇ ଜାରି ରହିବ ବୋଲି ମେହେବୁବା ମୁଫତି କହିଛନ୍ତି ।

ନଜରବନ୍ଦୀରରୁ ମୁକୁଳିବା ପରେ ମେହବୁବା ମୁଫତି ନିଜ ବୟାନ ଦ୍ୱାରା ହଇଚଇ ସୃଷ୍ଟି କରିଛନ୍ତି । ତାଙ୍କ କହିବାନୁସାରେ ଜାମ୍ମୁ କାଶ୍ମୀର ବ୍ୟତୀତ ସେ ଅନ୍ୟ କୌଣସି ପତାକା ଧରିବେ ନାହିଁ । ମେହବୁବାଙ୍କ ଏହି ବିବୃତ୍ତିକୁ ବିଜେପି ଦେଶଦ୍ରୋହୀ ବୋଲି କହିଛି । ବିଜେପି କହିଛି ଯେ, ପୃଥିବୀର କୌଣସି ଶକ୍ତି ଧାରା ୩୭୦ ଫେରାଇ ଆଣିପାରିବ ନାହିଁ । ରାଜ୍ୟ ବିଜେପି ସଭାପତି ରବୀନ୍ଦ୍ର ରାଇନା ଉପରାଜ୍ୟପାଳ ମନୋଜ ସିହ୍ନାଙ୍କୁ ଅନୁରୋଧ କରିଛନ୍ତି ଯେ, ଦେଶଦ୍ରୋହୀ ବୟାନ ପାଇଁ ମେହବୁବା ମୁଫତିଙ୍କୁ ଗିରଫ କରାଯାଉ ।