ଜଳେଶ୍ଵର : ଜରାଜୀର୍ଣ୍ଣ ଅବସ୍ଥାରେ କ୍ଲଷ୍ଟର ରୁରାଲ ହାଉସିଂ । କବାଟ ଝରକା ତାଡ଼ି ନେଇଗଲେଣି ଦୁର୍ବୃତ୍ତ । ସଂଜ୍ଞାହୀନ ଅବସ୍ଥାରେ ୪୭ଟି ପକ୍କା ଘର । ନିଘୋଡ଼ ନିଦ୍ରାରେ ପ୍ରଶାସନ । ଗରିବ ଓ ଭୂମିହୀନ ଲୋକଙ୍କ ରହଣି ପାଇଁ ବାଲେଶ୍ବର ଜିଲ୍ଲା ଜଳେଶ୍ଵର ବ୍ଳକ ଉଇନ୍ଦା ନିକଟରେ ନିର୍ମାଣ ହୋଇଥିଲା ୫୮ଟି ପକ୍କା ଘର । ୨୦୧୮ ମସିହାରେ ପ୍ରାୟ ୨ କୋଟି ଟଙ୍କାରେ କ୍ଲଷ୍ଟର ରୁରାଲ ହାଉସିଂ ପ୍ରକଳ୍ପ ମାଧ୍ୟମରେ ପକ୍କା ଘର ତିଆରି ହୋଇଥିଲା । ଯୋଜନା ଅନୁସାରେ ରାଜପୁର ଓ ଏନେମ୍ ପାଟଣା ଦୁଇଟି ପଞ୍ଚାୟତର ଗରିବ ଓ ଭୂମିହୀନ ଲୋକଙ୍କୁ ଘର ହସ୍ତାନ୍ତର ହୋଇଥାନ୍ତା । ହେଲେ ଘର ଗୁଡିକରେ ବିଦ୍ୟୁତ, ପାନୀୟ ଜଳ ଓ ପାଇଖାନା ବ୍ୟବସ୍ଥା ନଥିବାରୁ ତାହା ଲୋକଙ୍କ କାମରେ ନଲାଗି ପଡିରହିଛି ।
୫୮ଟି ଘର ଭିତରୁ ୧୧ଟି ଘରେ ଲୋକେ ରହୁଛନ୍ତି । ଅନ୍ୟ କୋଠା ଘର ଏବେ ଭୂତକୋଠି ଭାବେ ପଡ଼ି ରହିଛି । ଯେଉଁ ୧୧ ଟି ପରିବାର ସେଠି ରହୁଛନ୍ତି ସେମାନେ ବି ବହୁ ଦୁଃଖ କଷ୍ଟରେ କାଳ କାଟୁଛନ୍ତି । ଘର ଗୁଡିକରେ ପାନୀୟ ଜଳ ଓ ବିଦ୍ୟୁତ ସଂଯୋଗ ନଥିବାରୁ ଦୁର୍ଦ୍ଦଶାରେ ଦିନ କାଟୁଛନ୍ତି । ଅନ୍ୟପଟେ ବିଡିଓ ଚିରାଚରିତ ଢଙ୍ଗରେ ଟଙ୍କା ଆସିଲେ କାର୍ଯ୍ୟ ହେବ ବୋଲି କହିଛନ୍ତି । ସରକାର କେବେ କ୍ଲଷ୍ଟର ରୁରାଲ ହାଉସିଂ ପ୍ରକଳ୍ପର ପୁନରୁଦ୍ଧାର କରୁଛନ୍ତି ? ଭୂମିହୀନ ଲୋକଙ୍କୁ କେବେ ଥଇଥାନ କରୁଛନ୍ତି ? ତାକୁ ହିଁ ଅପେକ୍ଷା ।
ଭୂତକୋଠି ପାଲଟିଛି କ୍ଲଷ୍ଟର ରୁରାଲ ହାଉସିଂ…
