ସ୍ୱୟଂଶାସିତ ମହାବିଦ୍ୟାଳୟର ଶ୍ରେଣୀଗୃହକୁ ମାଡ଼ି ଗଲାଣି ଗଛ ଲତା
ଯାଜପୁର: ସର୍ବପୂରାତନ କଲେଜର ଦୟନୀୟ ଚିତ୍ର । ଅବ୍ୟବସ୍ଥା ଭିତରେ ଯାଜପୁର ଜିଲ୍ଲାର ନରସିଂହ ଚୌଧୁରୀ ସ୍ୱୟଂଶାସିତ ମହାବିଦ୍ୟାଳୟ । ଘଞ୍ଚ ଜଙ୍ଗଲରେ ପରିଣତ ହେଲାଣି କଲେଜ । ଶ୍ରେଣୀଗୃହକୁ ମାଡ଼ି ଗଲାଣି ଗଛ ଲତା । ଭଙ୍ଗା ଦଦରା ଅବସ୍ଥା ପଡ଼ିଛି ସବୁକିଛି । ମହାବିଦ୍ୟାଳୟର ଅନ୍ଧାର କୋଠରୀ ପାଲଟିଛି ଅସମାଜିକ ଲୋକଙ୍କ ଆଡ୍ଡାସ୍ଥଳୀ ।
ଭୂତକୋଠି ପାଲଟିଛି କଲେଜ୍ । କ୍ଲାସରୁମରେ ଗଡୁଛି ମଦ ବୋତଲ । ଅନ୍ଧାର କୋଠରୀ ଅସାମାଜିକ ଲୋକଙ୍କ ଆଡ୍ଡାସ୍ଥଳୀ ପାଲଟିଛି । ଯାଜପୁର ନରସିଂହ ଚୌଧୁରୀ ସ୍ୱୟଂଶାସିତ କଲେଜରେ ଯେଉଁଠି ମଦ ବୋତଲ, ସେଇଠି ଗଢ଼ା ହେଉଛି ଛାତ୍ରଛାତ୍ରୀଙ୍କ ଭବିଷ୍ୟତ । ଭଙ୍ଗା ଟେବୁଲ ଚେୟାର ସାଙ୍ଗକୁ ମୁଣ୍ଡ ଉପରେ ଝୁଲୁଛି ଭଙ୍ଗା ପଙ୍ଖା । ଶୌଚାଳୟ ଅବସ୍ଥା ନକହିବା ଭଲ ।
କଲେଜର ପ୍ରତିଷ୍ଠାତା ନରସିଂହ ଚୌଧୁରୀଙ୍କ ପ୍ରତିମୂର୍ତ୍ତି ଗଛଲତା ଭିତରେ ଲୁଚି ଗଲାଣି । କ୍ଲାସ୍ ରୁମରେ ବି ମାଡ଼ିଗଲାଣି ଗଛ ଲତା । ବିଶୁଦ୍ଧ ପାନୀୟ ଜଳ ବ୍ୟବସ୍ଥା କରାଯାଇଥିଲେ ମଧ୍ୟ ତାହା କୌଣସି କାମରେ ଲାଗୁନି । ପାଞ୍ଚ ହଜାରରୁ ଅଧିକ ଛାତ୍ରଛାତ୍ରୀ ପଢୁଥିବା ଏହି କଲେଜକୁ ନୂଆ ଘର ପ୍ରଶାସନ ହସ୍ତାନ୍ତର କରୁ ନଥିବାରୁ ସମସ୍ୟା ଭୋଗୁଛନ୍ତି ଛାତ୍ରଛାତ୍ରୀ । ଜିଲ୍ଲାପାଳ କହିଛନ୍ତି, କାମ ସମ୍ପୂର୍ଣ୍ଣ ହେଲେ ଘର ହସ୍ତାନ୍ତର ହେବ ।
