ଖାଙ୍କଡେଶ୍ବର ପୀଠର ନବକଳେବର, ମୁଖ୍ୟମନ୍ତ୍ରୀ ଏବଂ 5T ଅଧ୍ୟକ୍ଷଙ୍କୁ ସ୍ଥାନୀୟ ଲୋକଙ୍କ କୃତଜ୍ଞତା

ଯାଜପୁର: ବଦଳିଛି ଶୈବପୀଠର ଚିତ୍ର । ଯାଜପୁର ଜିଲ୍ଲା କୋରାଇ ବ୍ଲକ ସାହାପୁରରେ ଥିବା ଖାଙ୍କଡେଶ୍ବର ପୀଠର ହୋଇଛି ବିକାଶ । ମନ୍ଦିରର ନବକଳେବର ହେବା ସହ ନିର୍ମାଣ ହୋଇଛି ଯଜ୍ଞ ଗୃହ ଓ ପୁଷ୍କରିଣୀ । ମୁଖ୍ୟମନ୍ତ୍ରୀଙ୍କ ସ୍ବତନ୍ତ୍ର ସହାୟତା ଯୋଜନାରେ ପୀଠର ନବୀକରଣ କରାଯାଇଛି । ଯାହାକୁ ନେଇ ବେଶ୍ ଖୁସି ସ୍ଥାନୀୟ ବାସିନ୍ଦା । ଦୀର୍ଘ ଦିନର ଦାବି ପୂରଣ ହୋଇଥିବାରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ 5T ଅଧ୍ୟକ୍ଷ କାର୍ତ୍ତିକ ପାଣ୍ଡିଆନଙ୍କୁ କୃତଜ୍ଞତା ଜଣାଇଛନ୍ତି ଲୋକେ ।

ଶୈବପୀଠର ବିକାଶ ପାଇଁ ପୂର୍ବରୁ ସ୍ଥାନୀୟ ଲୋକେ ଜିଲ୍ଲା ପ୍ରଶାସନ ନିକଟରେ ଦାବି କରି ଆସୁଥିଲେ ।  5T ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ୍ ଯାଜପୁର ଜିଲ୍ଲା ଗସ୍ତରେ ଯାଇଥିବା ସମୟରେ ଏହି ପୀଠର ବିକାଶ ପାଇଁ ସ୍ଥାନୀୟ ଲୋକେ ଦାବିପତ୍ର ଦେଇଥିଲେ । କାର୍ତ୍ତିକ ପାଣ୍ଡିଆନ୍ ଏହାକୁ ଗୁରୁତର ସହ ନେଇ ପୀଠର ବିକାଶ କରିବା ପାଇଁ ପ୍ରତିଶ୍ରୁତି ଦେଇଥିଲେ । ଖୁବ୍ କମ୍ ଦିନ ମଧ୍ୟରେ ପୀଠର ନବୀକରଣ ଓ ପୁନରୁଦ୍ଧାର ପାଇଁ ୧୦ ଲକ୍ଷ ଟଙ୍କା ଅର୍ଥ ମଞ୍ଜୁର କରିଥିଲେ ।