ଭିନ୍ନକ୍ଷମ ଓ ବୃଦ୍ଧଙ୍କ ପାଇଁ ଘରକୁ ପଠାଯିବ ବାଲାଟ ପେପର !
ଜଗତସିଂହପୁର: ତିର୍ତ୍ତୋଲ ବିଧାନସଭା ଉପ ନିର୍ବାଚନ ପାଇଁ ପ୍ରସ୍ତୁତି ଆରମ୍ଭ ହୋଇଯାଇଛି । ଭିନ୍ନକ୍ଷମ, କରୋନା ରୋଗୀ, ୮୦ ବର୍ଷରୁ ଉର୍ଦ୍ଧ୍ୱ ଭୋଟର କିପରି ଭୋଟ ଦେବେ, ସେଥିପାଇଁ ସେମାନଙ୍କ ଇଚ୍ଛା ପଚାରିବାକୁ ସମସ୍ତ ବ୍ଲକ ତରଫରୁ ଅଧିକାରୀମାନେ ଘର ଘର ବୁଲିଛନ୍ତି । ସେମାନେ ବାଲଟ ପେପରରେ ଭୋଟ ଦେବେ ନା ମତଦାନ କେନ୍ଦ୍ରକୁ ଯାଇ ଭୋଟ ଦେବେ ସେନେଇ ଲିଖିତ ଭାବେ ବ୍ଲକ ଅଧିକାରୀ ତଥ୍ୟ ସଂଗ୍ରହ କରୁଛନ୍ତି । ଯେଉଁମାନେ ବାଲଟ ପେପରେ ଭୋଟ ଦେବାକୁ ଇଚ୍ଛା ପ୍ରକାଶ କରିଛନ୍ତି ସେମାନଙ୍କ ଘରକୁ ନିର୍ବାଚନ ଦିନ ବାଲଟ ପେପର ପଠାଯିବ । ତିର୍ତ୍ତୋଲ ବ୍ଲକର ୧୬୦ଟି ବୁଥ୍ରୁ ଏଭଳି ରିପୋର୍ଟ ଅଣାଯାଉଛି ।
ଅନ୍ୟପଟେ ଉପ ନିର୍ବାଚନ ପାଇଁ ସରଗରମ ହେଉଛି ତିର୍ତ୍ତୋଲ ରାଜନୀତି । ସବୁ ରାଜନୈତିକ ଦଳର ନଜର ଏବେ ତିର୍ତ୍ତୋଲ ଉପରେ । ଏହି କ୍ରମରେ ବିଜେଡିର ବରିଷ୍ଠ ନେତା ସଞ୍ଜୟ ଦାସ ବର୍ମା ରଘୁନାଥପୁର ବ୍ଲକ ଗସ୍ତ କରି ଦଳୀୟ କର୍ମୀଙ୍କ ସହ ଆଲୋଚନା କରିଛନ୍ତି । କିଭଳି ଉପନିର୍ବାଚନରେ ଦଳ ବିଜୟ ଲାଭ କରିବ ସେ ନେଇ ଆଗ ଧାଡ଼ିର ନେତା ଓ କର୍ମୀଙ୍କ ସହ ଆଲୋଚନା କରିଥିଲେ ସଞ୍ଜୟ ଦାସବର୍ମା ।
