ନନ୍ଦିଘୋଷ ବ୍ୟୁରୋ: ଆସନ୍ତା ଆଇପିଏଲ ସିଜିନ ଲାଗି ଏବେଠାରୁ ଆରମ୍ଭ ହୋଇଛି ଚର୍ଚ୍ଚା । ସମସ୍ତ ଫ୍ରାଞ୍ଚାଇଜ୍ ନିଜକୁ ମଜବୁତ କରିବା ଲାଗି ଆରମ୍ଭ କରିଛନ୍ତି ପ୍ରୟାସ । ନିଲାମୀ ଆରମ୍ଭ ହେବା ପୂର୍ବରୁ ରାଜସ୍ଥାନ ଏବଂ ଚେନ୍ନାଇ ମଧ୍ୟରେ ହେଉଥିବା ଚର୍ଚ୍ଚା ବେଶ ଗୁରୁତ୍ବ ବହନ କରୁଛି । ଯଦିଓ ଅଫିସିଆଲି ଏଯାବତ କୌଣସି ଘୋଷଣା ହୋଇନାହିଁ । ମାତ୍ର ଜାଡେଜା ରାଜସ୍ଥାନ ରୟାଲ୍ସକୁ ଯାଉଥିବାବେଳେ ସାମସନ ଚେନ୍ନାଇକୁ ଆସିବେ ।
କୁହାଯାଉଛି କି, ଜାଡେଜାଙ୍କ ଅଭିଜ୍ଞତା ଲାଗି ରାଜସ୍ଥାନ ତାଙ୍କୁ ଅଧିନାୟକ ପଦ ଦେଇପାରେ । ସେପଟେ କୁହାଯାଉଥିଲା କି, ଚଳିତ ସିଜିନରେ ପରାଗ କିମ୍ବା ଜୟସ୍ବାଲ ରାଜସ୍ଥାନର ଅଧିନାୟକ ପଦ ସମ୍ଭାଳିପାରନ୍ତି । ଏପରିକି ଏକ ଇଣ୍ଟରଭିୟ୍ୟୁ ସମୟରେ ଜୟସ୍ବାଲ ଅଧିନାୟକ ହେବାକୁ ଇଛା ରଖିଥିବା ମଧ୍ୟ ପ୍ରକାଶ କରିଛନ୍ତି । ତେବେ ଜାଡେଜାଙ୍କୁ ଯଦି ଅଧିନାୟକ କରିବ ତାହେଲେ ଏହି ଦୁଇ ଖେଳାଳିଙ୍କ ଆଶା ଏକପ୍ରକାର ମଉଳି ଯିବ । ଅନ୍ୟପଟେ ଜାଡେଜା ପୂର୍ବରୁ ସିଏସକେ ପାଇଁ ଅଧିନାୟକ ଭାବେ ଖେଳିଛନ୍ତି । ମାତ୍ର ଅଧିନାୟକ ଭାବେ ତାଙ୍କ ରେକର୍ଡ ଭଲ ନାହିଁ । ଏଣୁ ଆଗାମୀ ଦିନରେ କଣ ନିଷ୍ପତ୍ତି ହେଉଛି ଏହା ଉପରେ ରହିଛି କ୍ରୀଡ଼ାପ୍ରେମୀଙ୍କ ନଜର ।
