ତୁଟିଲା ୧୦ ବର୍ଷର ସମ୍ପର୍କ, ପାର୍ଟନରଙ୍କ ଠୁ ଅଲଗା ହେଲେ ଇଟାଲି ପ୍ରଧାନମନ୍ତ୍ରୀ

ନୂଆଦିଲ୍ଲୀ: ଜି-୨୦ ବୈଠକରେ ଯୋଗ ଦେବାକୁ ଭାରତ ଆସିବା ପରେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଥିଲେ ଇଟାଲୀ ପ୍ରଧାନମନ୍ତ୍ରୀ ଜର୍ଜିଆ ମେଲୋନି। ଏତେଦିନ ପରେ ତାଙ୍କ ସୋସିଆଲ୍ ମିଡ଼ିଆ ପୋଷ୍ଟକୁ ନେଇ ପୁଣିଥରେ ଚର୍ଚ୍ଚା ଆରମ୍ଭ ହୋଇଛି । କାରଣ ଦୀର୍ଘ ବର୍ଷର ସମ୍ପର୍କ ତାଙ୍କର ଭାଙ୍ଗି ଯାଇଛି । ସେ ସୋସିଆଲ୍ ମିଡିଆରେ ନିଜ ଜୀବନସାଥୀ ଠାରୁ ଦୂରେଇ ଯାଇଥିବା ନେଇ ପ୍ରକାଶ କରିଛନ୍ତି। ମେଲୋନି ବିବାହ କରିନଥିଲେ ହେଁ ୧୦ ବର୍ଷର ସମ୍ପର୍କ ମଧ୍ୟରେ ତାଙ୍କର ଏକ କନ୍ୟା ସନ୍ତାନ ରହିଛି।

ଟିଭି ସାମ୍ବାଦିକ ଆଣ୍ଡ୍ରେଆ ଜିଆମବ୍ରୁନୋ ସର୍ବସମ୍ମୁଖରେ ମହିଳାଙ୍କୁ ନେଇ ଆପତ୍ତିଜନକ ଶବ୍ଦ ପ୍ରୟୋଗ କରିଥିଲେ। ଏହାକୁ ନେଇ ବିବାଦ ମଧ୍ୟ ଦେଖିବାକୁ ମିଳିଥିଲା। ଖାଲି ଏତିକି ନୁହେଁ ଏହାପୂର୍ବରୁ ଅଗଷ୍ଟ ମାସରେ ସେ ଦେଇଥିବା ବୟାନ ବେଶ ବିବାଦୀୟ ହୋଇଥିଲା। ତେବେ ନିଜ ଫେସବୁକରେ ମେଲୋନି ଲେଖିଛନ୍ତି, “୧୦ ବର୍ଷ ହେଲା ଆଣ୍ଡ୍ରେଆ ଜିଆମବ୍ରୁନୋଙ୍କ ସହ ମୋର ଥିବା ସବୁ ସମ୍ପର୍କରେ ଏହି ଠାରେ ଶେଷ ହୋଇଛି।

ନିଜ ପୋଷ୍ଟରେ ସେ ଆହୁରି ମଧ୍ୟ ଲେଖିଛନ୍ତି, ‘ଆମେ ଏକାଠି ବିତାଇଥିବା ମୁହୂର୍ତ୍ତକୁ ମୁଁ ସମ୍ଭାଳି ରଖିବି। ଆମ ବନ୍ଧୁତାକୁ ମୁଁ ଅକ୍ଷୁଣ୍ଣ ରଖିବି। ଯେକୗେଣସି ପରିସ୍ଥିତିରେ ମଧ୍ୟ ମୁଁ ମୋ ୭ ବର୍ଷୀୟ ଝିଅର ରକ୍ଷା କରିବି । ଯିଏ ଉଭୟ ମା’ ଓ ବାପାଙ୍କୁ ଖୁବ୍ ଭଲ ପାଏ । ମୁଁ ଏହା ବିଷୟରେ ଆଉ କିଛି କହିବାକୁ ଚାହୁଁନି’।