ଆରମ୍ଭ ହେବ ମିଶନ ଗଗନୟାନ, ୨୧ ତାରିଖରେ ହେବ ବଡ଼ ପରୀକ୍ଷା

ନୂଆଦିଲ୍ଲୀ: ମହାକାଶ ବିଜ୍ଞାନ ଇତିହାସର ସବୁଠାରୁ ବଡ ମିଶନ ଗଗନାୟାନ ଆରମ୍ଭ କରିବାକୁ ଯାଉଛି ଭାରତ । ଇସ୍ରୋ ଏହି ମିଶନ ପରୀକ୍ଷାମୂଳକ ଭାବେ ଆରମ୍ଭ କରିବ । ଏହା ସଫଳ ହେଲେ ଗଗନାୟାନରେ ମହାକାଶକୁ ଯିବେ ମହାକାଶଚାରୀ ।

ଯାନ ପଠାଇବା ପୂର୍ବରୁ ପ୍ରାୟ ୨୦ଟି ବଡ଼ଧରଣର ଟେଷ୍ଟ କରାଯିବ । ଟିଭି-ଡି୧ର ଟେଷ୍ଟ ଆସନ୍ତା ୨୧ ତାରିଖ ସକାଳ ୮ଟାରେ କରିବାକୁ ଧାର୍ଯ୍ୟ କରାଯାଇଛି  । ଶ୍ରୀହରିକୋଟାରୁ ଏହାକୁ ପରୀକ୍ଷଣ କରାଯିବ ।  ଚନ୍ଦ୍ରଯାନ-୩ର ସଫଳତା ପରେ ଭାରତୀୟ ବୈଜ୍ଞାନିକମାନଙ୍କ ମଧ୍ୟରେ ମହାକାଶ ପ୍ରତି ଉତ୍ସାହ ଅଧିକ ରହିଛି ।  ଆଦିତ୍ୟ L1 ର ସଫଳତା ସମଗ୍ର ବିଶ୍ବକୁ ଚକିତ କରିଛି। ଭାରତ ୨୦୩୫ ସୁଦ୍ଧା ସ୍ପେଶ୍ ଷ୍ଟେସନ୍ ଓ ୨୦୪୦ ସୁଦ୍ଧା ଚନ୍ଦ୍ରକୁ ମାନବ ପଠାଇବାକୁ ଲକ୍ଷ ରଖିଛି  ।

ଏହା ବ୍ୟତୀତ ଶୁକ୍ର ଓ ମଙ୍ଗଳ ଗ୍ରହ ମିଶନ ମଧ୍ୟ ଆରମ୍ଭ କରିବ ଇସ୍ରୋ । ତେଣୁ ଏବେଠାରୁ ତତ୍ପର ଅଛନ୍ତି ଇସ୍ରୋ ବୈଜ୍ଞାନିକ ।  ଏବେ ମହାକାଶରେ ଥିବା ଅନ୍ତର୍ଜାତୀୟ ମହାକାଶ କେନ୍ଦ୍ରକୁ ଉଭୟ ଆମେରିକା ଓ ରୁଷ ମିଳିତଭାବେ ପ୍ରତିଷ୍ଠା କରିଛନ୍ତି । ଏଥିରେ ୟୁରୋପୀୟ ମହାକାଶ ଏଜେନ୍ସି, ଜାପାନ ଓ କାନାଡାର ମହାକାଶ ଏଜେନ୍ସି ବି ସଂପୃକ୍ତ ଅଛନ୍ତି । ସେହିପରି ଚୀନ ମଧ୍ୟ ନିଜସ୍ବ ମହାକାଶ କେନ୍ଦ୍ର ସ୍ଥାପନ କରିସାରିଛି ।