ନନ୍ଦିଘୋଷ ବ୍ୟୁରୋ : ଇତିହାସ ରଚିଲା ଇସ୍ରୋ। ମହାକାଶରେ ସଫଳତାର ସହ ଡକିଂ ହେଲା ସ୍ପେଡେସ୍କ ସାଟେଲାଇଟ। ଫଳରେ ଡକିଂ କ୍ଷେତ୍ରରେ ବିଶ୍ବର ଚତୁର୍ଥ ରାଷ୍ଟ୍ରର ମର୍ଯ୍ଯାଦା ଲାଭ କରିଛି ଭାରତ। ଆଜି ଭୋରରେ ମହାକାଶରେ ଏହି ଡକିଂ ପ୍ରକ୍ରିୟା ଶେଷ ହୋଇଛି ବୋଲି କହିଛି ଇସ୍ରୋ। ଏହି ପ୍ରକ୍ରିୟାରେ ଟାର୍ଗେଟ ସାଟେଇଲାଇଟ ସହ ଚେଜର ସାଟେଲାଇଟର ସଂଯୋଗ ହୋଇଥିଲା। ସ୍ପେଡେକ୍ସ ମିଶନରେ ଦୁଇଟି ସାଟେଲାଇଟ SDX01 ଚେଜର ଓ SDX02 ଟାର୍ଗେଟ ସାଟେଲାଇଟର ଡକିଂ ସମ୍ଭବ ହୋଇଥିଲା।
ପ୍ରତି ସାଟେଲାଇଟର ଓଜନ ୨୨୦ କିଲୋଗ୍ରାମ ଲେଖାଏ ହୋଇଥିବାବେଳେ ଏହାର ଡକିଂ ପ୍ରକ୍ରିୟା ଅତ୍ଯନ୍ତ ସଫଳତାର ସହ ସମ୍ପନ୍ନ ହୋଇଥିଲା। ଗତବର୍ଷ ଡିସେମ୍ବର ୩୦ ତାରିଖରେ ଶ୍ରୀହରିକୋଟାସ୍ଥିତ ସତୀଶ ଧାୱନ ମହାକାଶ କେନ୍ଦ୍ରରୁ ପିଏସଏଲଭି ସି୬୦ ଜରିଆରେ ଏହି ଦୁଇଟି ସାଟେଲାଇଟକୁ ପଠାଯାଇଥିଲା। ଶେଷରେ ସର୍କୁଲାର ଅର୍ବିଟର ୪୭୫ କିଲୋମିଟରରେ ଏହି ଦୁଇଟି ସାଟେଲାଇଟ ଅବସ୍ଥାପିତ ହୋଇଛି। ଜାନୁଆରୀ ୭, ୯ ଓ ୧୧ ତାରିଖରେ ଡକିଂ ଲାଗି ଯୋଜନା କରାଯାଇଥିଲା। ମାତ୍ର ଯାନ୍ତ୍ରିକ କାରଣରୁ ଏହାକୁ ସ୍ଥଗିତ ରଖାଯାଇଥିଲା। ଏହି ପ୍ରକଳ୍ପ ସଫଳ ହେଲେ ଭବିଷ୍ୟତରେ ମହାକାଶ ଷ୍ଟେସନ ନିର୍ମାଣ, ଅଣକକ୍ଷପଥରେ ଇନ୍ଧନ ଯୋଗାଣ, ସାଟେଲାଇଟ ସର୍ଭିସିଂ ଆଦି କ୍ଷେତ୍ରରେ ସଫଳତା ମିଳିବ ।
ଏହି ଐତିହାସିକ ସଫଳତା ପରେ ଆମେରିକା, ଋଷ ଓ ଚୀନ ପରେ ଭାରତ ହୋଇଛି ଚତୁର୍ଥ ରାଷ୍ଟ୍ର। ଏହି ଅଭିଯାନ ବଳରେ ଚନ୍ଦ୍ରରୁ ନମୁନା ସଂଗ୍ରହ ହୋଇପାରିବା ସହ ୨୦୩୫ ସୁଦ୍ଧା ଭାରତ ନିଜର ଏକ ମହାକାଶ ଷ୍ଟେସନ ପ୍ରତିଷ୍ଠା କରିବା ସହଜ ହେବ। ସେହିପରି ୨୦୪୦ ସୁଦ୍ଧା ଚନ୍ଦ୍ରକୁ ମଣିଷ ପଠାଇବା ପ୍ରକ୍ରିୟା ବି ସହଜ ହେବ। ୨୦୧୧ରେ ଚୀନ ପ୍ରଥମ ଥର ଲାଗି ଡକିଂ ପ୍ରକ୍ରିୟା କରିଥିଲା। ଚନ୍ଦ୍ରଯାନ-୪ ପାଇଁ ମଧ୍ଯ ଏହା ଲାଭ ଦାୟକ ହେବ।
