ଆତଙ୍କବାଦୀ ସଙ୍ଗଠନ ହେଜବୁଲ୍ଲା ଉପରେ ଇସ୍ରାଏଲର ଏୟାରଷ୍ଟ୍ରାଇକ୍, ୨୭୪ ମୃତ

ନୂଆଦିଲ୍ଲୀ:  ହେଜବୁଲ୍ଲା ଉପରେ ଇସ୍ରାଏଲ ସେନାର ଏୟାର ଷ୍ଟ୍ରାଇକ । ଅଢ଼େଇ ଶହରୁ ଅଧିକ ଲୋକଙ୍କ ମୃତ୍ଯୁ । ୭ ଶହରୁ ଅଧିକ ଲୋକ ଆହତ । ଲେବାନନର ଦକ୍ଷିଣ ଅଞ୍ଚଳରେ ସକାଳୁ ଚାଲିଛି ଜୋରଦାର ଆକ୍ରମଣ । ବର୍ତ୍ତମାନ ସୁଦ୍ଧା ୨୭୪ ଜଣଙ୍କ ମୃତ୍ଯୁ ହୋଇଥିବା ଜଣାପଡିଛି । ମୃତକଙ୍କ ମଧ୍ୟରେ ମହିଳା, ଶିଶୁ ଓ ମେଡିକାଲ କର୍ମଚାରୀ ରହିଛନ୍ତି ।

ଗାଜା-ଇସ୍ରାଏଲ ମଧ୍ୟରେ ଯୁଦ୍ଧ ଆରମ୍ଭ ପରଠାରୁ ଏହା ସବୁଠାରୁ ଭୟାନକ ଆକ୍ରମଣ ବୋଲି କୁହାଯାଉଛି । ପାଖାପାଖି ଲେବାନନର ୩ ଶହରୁ ଅଧିକ ସ୍ଥାନକୁ ଟାର୍ଗେଟ କରି ହୋଇଛି ଏହି ଏୟାର ଷ୍ଟ୍ରାଇକ । ମିସାଇଲ ଓ ରକେଟ ଦ୍ଵାରା ଏହି ଆକ୍ରମଣ କରାଯାଇଛି । ଆକ୍ରମଣ ପୂର୍ବରୁ ଲେବାନନର ବାସିନ୍ଦାଙ୍କୁ ଇସ୍ରାଏଲ ପକ୍ଷରୁ ଆଲର୍ଟ ମେସେଜ୍ ମଧ୍ୟ ପଠାଯାଇଥିଲା ।

ଇସ୍ରାଏଲ ଆକ୍ରମଣ ପରେ ଲେବାନନରେ ଆଜି ଓ ଆସନ୍ତାକାଲି ପାଇଁ ସମସ୍ତ ସ୍କୁଲକୁ ବନ୍ଦ କରିଦିଆଯାଇଛି । ଲୋକଙ୍କୁ ଯଥା ସମ୍ଭବ ଘରେ ରହିବାକୁ ପରାମର୍ଶ ଦେଇଛି ଲେବାନନ ସରକାର । ଦୋକାନ ବଜାର ମଧ୍ୟ ବନ୍ଦ ରଖିବାକୁ ସରକାର ନିର୍ଦ୍ଦେଶ ଦେଇଛନ୍ତି ।

ଇସ୍ରାଏଲର ଏହି ଆକ୍ରମଣ ପରେ ହେଜବୁଲ୍ଲା ମଧ୍ୟ ପ୍ରତି ଆକ୍ରମଣ କରିଛି । ଏୟାର ଷ୍ଟ୍ରାଇକ ପରେ ଲେବାନନ ତରଫରୁ ୩୫ ରକେଟ ମାଡ଼ କରାଯାଇଥିଲା । ତେବେ ଇସ୍ରାଏଲରେ କ୍ଷୟକ୍ଷତି ନେଇ କୌଣସି ସୂଚନା ମିଳିନାହିଁ । ରାଜଧାନୀ ବେରୁତ ଓ ଅନ୍ୟ ଅଂଚଳରେ ଲୋକଙ୍କୁ ଲ୍ଯାଣ୍ଡଲାଇନ ଜରିଆରେ ଆକ୍ରମଣ ନେଇ ଆଲର୍ଟ ମେସେଜ ଆସିଥିଲା । କିଛି ଦିନ ପୂର୍ବୁର ହେଜବୁଲ୍ଲାକୁ ଟାର୍ଗେଟ କରି ପେଜର ଓ ୱାକିଟକି ହମଲା ହୋଇଥିଲା । ଏଥିରେ ୩୦ରୁ ଅଧିକ ଲୋକଙ୍କ ମୃତ୍ଯୁ ଘଟିଥିବା ବେଳେ ୩ ହଜାରରୁ ଅଧିକ ଲୋକ ଆହତ ହୋଇଥିଲେ ।