ଗ୍ରାଉଣ୍ଡ ଆଟାକ ପୂର୍ବରୁ ଇସ୍ରାଏଲ ବିରୋଧରେ ଇରାନ କରିବ କି ଯୁଦ୍ଧ ଘୋଷଣା ?

ନୂଆଦିଲ୍ଲୀ: ଦିନ ଗଡ଼ିବା ସହ ଘନେଇବାରେ ଲାଗିଛି ଇସ୍ରାଏଲ-ପାଲେଷ୍ଟାଇନ୍ ବିବାଦ । ଇସ୍ରାଏଲର ଘନ ଘନ ଆକ୍ରମଣରେ ଛାରଖାର ହେଉଛି ଜୀବନ । ଗାଜାର ବିଭିନ୍ନ ସହରରେ ପଡ଼ିଛି କୁଢ଼ କୁଢ଼ ଶବ । ଏମିତି ସ୍ଥିତିରେ ଯୁଦ୍ଧର ସ୍ଥିତି ଆହୁରି ଭୟାବହ ହେବାକୁ ଯାଉଛି । କାରଣ ଇସ୍ରାଏଲ-ହମାସ ଯୁଦ୍ଧରେ ଏବେ ଇରାନର ଏଣ୍ଟ୍ରି ହେବାକୁ ଯାଉଛି । ଦିନେ ଦୁଇଦିନ ମଧ୍ୟରେ ଇରାନ ତରଫରୁ ଆସିଥିବା ବୟାନରୁ ଜଣାପଡୁଛି, ଖୁବଶୀଘ୍ର ଇସ୍ରାଏଲ ଉପରେ ଆକ୍ରମଣ କରିପାରେ ଇରାନ ।

ସୋମବାର ଇରାନ ବିଦେଶ ମନ୍ତ୍ରୀ ହୋସେନ ମିରାବଦୋଲ୍ଲା ହିୟାନ କହିଥିଲେ, ‘ଇସ୍ରାଏଲକୁ ଗାଜାରେ ଗ୍ରାଉଣ୍ଡ ଆଟାକ୍ ପାଇଁ ଅନୁମତି ଦିଆଯିବ ନାହିଁ । ଯଦି ଇସ୍ରାଏଲ ଏମିତି କରୁଛି , ତେବେ ପରିଣାମ ଭୋଗିବାକୁ ପଡ଼ିବ ।’ ସେହିପରି ଆଜି ଇରାନର ସୁପ୍ରିମ ଲିଡର ଆୟାତୁଲ୍ଲା ଅଲି ଖାମେନେଇ କହିଛନ୍ତି, ‘ଯଦି ଗାଜା ଉପରେ ଇସ୍ରାଏଲର ଆକ୍ରମଣ ଜାରି ରହିଲା ତେବେ ସାରା ଦୁନିଆର ମୁସଲମାନ ଓ ଇରାନର ରେଜିଷ୍ଟାନ୍ସ ଫୋର୍ସକୁ କେହି ଅଟକାଇ ପାରିବେ ନାହିଁ ।’

ଯେକୌଣସି ସମୟରେ ଇସ୍ରାଏଲ ଉପରେ ହୋଇପାରେ ଆକ୍ରମଣ

ଇରାନ ସରକାରଙ୍କ ଟିଭି ଶୋ’ରେ ଇରାନ ବିଦେଶ ମନ୍ତ୍ରୀ କହିଛନ୍ତି, ‘ଯେକୌଣସି ସମୟରେ ଇରାନ ତରଫରୁ ବ୍ୟାପକ ସ୍ତରରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇପାରେ । ରେଜିଷ୍ଟାନ୍ସ ଫୋର୍ସ ଇସ୍ରାଏଲ ସରକାରଙ୍କୁ ଗାଜାରେ କୌଣସି ପ୍ରକାର ଆକ୍ରମଣ ପାଇଁ ଅନୁମତି ଦେବ ନାହିଁ । ଆମ ପାଇଁ ସବୁ ବିକଳ୍ପ ଖୋଲା ରହିଛି । ଗାଜାବାସୀଙ୍କ ବିରୋଧରେ ହେଉଥିବା ଯୁଦ୍ଧ ଅପରାଧକୁ ନେଇ ଆମେ ଚୁପ ବସି ପାରିବୁ ନାହିଁ ।’