IPL 2023: ଋତୁରାଜଙ୍କ ବିସ୍ଫୋରକ ବ୍ୟାଟିଂ, ଗୁଜରାଟକୁ ୧୭୯ ରନର ବିଜୟ ଲକ୍ଷ୍ୟ ଦେଲା ଚେନ୍ନାଇ
ଅହମ୍ମଦାବାଦ: ଆଇପିଏଲ ୨୦୨୩ର ପ୍ରଥମ ମ୍ୟାଚରେ ଗୁଜରାଟ ଟାଇଟନ୍ସ ଆଗରେ ୧୭୯ ରନର ବିଜୟ ଲକ୍ଷ୍ୟ ଦେଇଛି ଚେନ୍ନାଇ ସୁପରକିଙ୍ଗସ । ଅହମ୍ମଦାବାଦର ନରେନ୍ଦ୍ର ମୋଦି ଷ୍ଟାଡିୟମରେ ଚେନ୍ନାଇ ସୁପରକିଙ୍ଗସ ଟସ୍ ହାରି ପ୍ରଥମେ ବ୍ୟାଟିଂ କରି ୨୦ ଓଭରରେ ୭ ୱିକେଟ୍ ବିନିମୟରେ ୧୭୮ ରନ୍ ସଂଗ୍ରହ କରିଛି । ଚେନ୍ନାଇ ପାଇଁ ଓପନର ଋତୁରାଜ ଗାୟକ୍ୱାଡ ସବୁଠୁ ଅଧିକ ୯୨ ରନ୍ କରିଛନ୍ତି । ମୋଇନ ଅଲୀ ୨୩ ରନ୍ କରିଥିଲେ । ସେହିପରି ଗୁଜରାଟ ଟାଇଟନ୍ସ ପକ୍ଷରୁ ମହମ୍ମଦ ସାମୀ, ରଶିଦ ଖାନ ଏବଂ ଅଲଜାରି ଜୋଶେଫ ୨ଟି ଲେଖାଏଁ ୱିକେଟ୍ ହାସଲ କରିଛନ୍ତି ।
ଟସ୍ ହାରି ବ୍ୟାଟିଂ ପାଇଁ କ୍ରୀଜକୁ ଓହ୍ଲାଇଥିବା ଚେନ୍ନାଇ ସୁପରକିଙ୍ଗସର ଆରମ୍ଭ ଖରାପ ରହିଥିଲା । ଡେଭୋନ କନୱେ ତୃତୀୟ ଓଭରରେ ହିଁ ମହମ୍ମଦ ସାମୀଙ୍କ ଓଭରରେ ଆଉଟ୍ ହୋଇଯାଇଥିଲେ । ତାଙ୍କ ପରେ ମୋଇନ ଅଲୀ ଟିମକୁ ଭଲ ଆରମ୍ଭ ଦେଇଥିଲେ । ୧୭ ଟିଲରେ ସେ ୨୩ ରନ୍ ସଂଗ୍ରହ କରିଥିଲେ । ପାୱାର ପ୍ଲେର ଶେଷ ଓଭରରେ ମୋଇନ ଅଲୀ ରଶିଦ ଖାନଙ୍କ ବଲରେ ଆଉଟ୍ ହୋଇଯାଇଥିଲେ । ଏହାପରେ ଦଳ ୬ ଓଭରରେ ୨ ୱିକେଟ ବିନିମୟରେ ୫୧ ରନ୍ ସଂଗ୍ରହ କରଥିଲା । ହେଲେ ଋତୁରାଜ ଗାୟକ୍ୱାଡ ବିସ୍ଫୋରକ ପାରି ଜାରି ରଖିଥିଲେ ।
୫୦ ଟି ବଲ୍ ଖେଳି ଗାୟକ୍ୱାଡ ଦ୍ରୁତତମ ୯୨ ରନ୍ ସଂଗ୍ରହ କରିଥିଲେ । ଅଲଜାରିଙ୍କ ଓଭରରେ ସେ କ୍ୟାଚ୍ ଆଉଟ୍ ହୋଇ ପାଭେଲିଅନ୍ ଫେରିଯାଇଥିଲେ । ଅନ୍ୟମାନଙ୍କ ମଧ୍ୟରେ ଅମ୍ବାତି ରାୟୁଡୁ ୧୨ ରନ୍ ଏବଂ ଶିଭମ ଦୁବେ ୧୯ ରନ୍ କରିଥିଲେ । ଇନିଂସ ଶେଷ ବେଳକୁ ମହେନ୍ଦ୍ର ସିଂ ଧୋନୀ ଏବଂ ମିଚେଲ ସାଣ୍ଟନର କ୍ରୀଜରେ ଦଣ୍ଡାୟମାନ ଥିଲେ । ଧୋନୀ ୭ ଟି ବଲରେ ୧୪ ରନ୍ କରି ଅପରାଜିତ ରହିଥିଲେ । ଏବେ ଗୁଜୁରାଟ ଟାଇଟନ୍ସକୁ ଜିତିବାକୁ ହେଲେ ନିର୍ଦ୍ଧାରିତ ୨୦ ଓଙକକେ ୧୭୯ ରନ୍ ସଂଗ୍ରହ କରିବାକୁ ହେବ ।
