IPL 2020: ଧୋନି ନଟଆଉଟ୍, ତଥାପି ୭ ରନରେ ଚେନ୍ନାଇକୁ ହରାଇଲା ହାଇଦ୍ରାବାଦ
ଦୁବାଇ: ଆଇପିଏଲର ୧୩ତମ ସିଜିନର ୧୪ ତମ ମ୍ୟାଚରେ ସନରାଇଜର୍ସ ହାଇଦ୍ରାବାଦ, ଚେନ୍ନାଇ ସୁପର କିଙ୍ଗ୍ସକୁ ୭ ରନରେ ହରାଇଛି । ଟସ୍ ଜିତି ବ୍ୟାଟିଂ କରିଥିବା ହାଇଦ୍ରାବଦ ଚେନ୍ନାଇକୁ ୧୬୫ ରନର ଟାର୍ଗେଟ ଦେଇଥିଲା । ଜବାବରେ ଚେନ୍ନାଇ ୫ ୱିକେଟ ହରାଇ ୧୫୭ ରନ କରିବାରେ ସକ୍ଷମ ହୋଇଥିଲା ।
ଚେନ୍ନାଇ ଅଧିନାୟକ ମହେନ୍ଦ୍ର ସିଂହ ଧୋନି ନଟଆଉଟ୍ ରହି ପ୍ୟାଭିଲିୟନ୍ ଫେରଥିବା ବେଳେ ଦଳକୁ ଜିତାଇ ପାରିନଥିଲେ । ଷଷ୍ଠଥର ପାଇଁ ଧୋନି ଆଉଟ୍ ହୋଇ ନଥିଲେ ମଧ୍ୟ ଟିମ୍ ହାରି ଯାଇଛି । ଚଳିତ ଆଇପିଏଲ୍ ସିଜିନରେ ଏଭଳି ଦ୍ୱିତୀୟ ଥର ପାଇଁ ହୋଇଛି । ଏହା ପୂର୍ବରୁ ରାଜସ୍ଥାନ ରୟାଲ୍ସ ବିରୋଧରେ ୨୯ ରନ୍ କରି ଆଉଟ୍ ନହୋଇ ଧୋନି ପ୍ୟାଭିଲିୟନ ଫେରିଥିଲେ, ଟିମ୍ ହାରି ଯାଇଥିଲା ।
ହାଇଦ୍ରାବାଦ ଠାରୁ ମ୍ୟାଚ୍ ହାରିବା ସହ ଚେନ୍ନାଇ ଚଳିତ ସିଜିନରେ ତୃତୀୟ ଥର ପାଇଁ ପରାଜୟ ବରଣ କରିଛି । ଧୋନିଙ୍କ ନେତୃତ୍ୱାଧୀନ ଚେନ୍ନାଇ ସୁପର କିଙ୍ଗ୍ସ ଲଗାତାର ଦୁଇଥର ୨୦୧୦ ଓ ୨୦୧୧ରେ ଆଇପିଏଲ୍ ଚାମ୍ପିଅନ୍ ହୋଇଥିଲା । ୨୦୧୮ରେ ମଧ୍ୟ ଚାମ୍ପିଅନ୍ ବନିଥିଲା ଚେନ୍ନାଇ ।
