ନାଲକୋ ଘରୋଇକରଣକୁ ବିରୋଧ, ରାଜଧାନୀ ରାଜରାସ୍ତାରେ ବିକ୍ଷୋଭ

ଭୁବନେଶ୍ବର: ପ୍ରତିଷ୍ଠା ଦିନଠାରୁ ଲାଭରେ ଚାଲିଥିବା ଓଡ଼ିଶାର ଗର୍ବ ତଥା ନବରତ୍ନ କଂପାନୀ ନାଲକୋର ଘରୋଇକରଣ ନିଷ୍ପତ୍ତିକୁ ବିରୋଧ । ପ୍ରତିବାଦରେ ରାଜରାସ୍ତାକୁ ଓହ୍ଲାଇଛି ଆଇଏନଟିୟୁସି । ସଂଗଠନର ରାଷ୍ଟ୍ରୀୟ ଅଧ୍ୟକ୍ଷ ରାମଚନ୍ଦ୍ର ଖୁଣ୍ଟିଆଙ୍କ ଆହ୍ବାନରେ ଭୁବନେଶ୍ବର ସ୍ଥିତ ନାଲକୋ କର୍ପୋରେଟ କାର୍ଯ୍ୟାଳୟ ସମ୍ମୁଖରେ ତାଲା ବନ୍ଦ କରି ବିକ୍ଷୋଭ ପ୍ରଦର୍ଶନ କରାଯାଇଛି ।

ନାଲକୋ ଏକ ଲାଭଦାୟକ ସଂସ୍ଥା ହୋଇଥିବା ବେଳେ ଏହା ଅଧୀନରେ ହଜାର ହଜାର ଏକର ମୂଲ୍ୟବାନ ଜମି ରହିଛି । ଜମି ସମେତ ନାଲକୋର ମୂଲ୍ୟ ୩ ଲକ୍ଷ କୋଟିରୁ ୪ ଲକ୍ଷ କୋଟି ଟଙ୍କା ଥିବା ବେଳେ ଏହାକୁ ଶାଗମାଛ ମୂଲ୍ୟରେ ମାତ୍ର ୧୬ ହଜାର କୋଟିରେ କର୍ପୋରେଟ ହାଉସକୁ ଟେକିଦେବାକୁ ଉଦ୍ୟମ ଚାଲିଛି । ନାଲକୋକୁ କେନ୍ଦ୍ର ସରକାର ବିକ୍ରି କରିବାକୁ ଦୀର୍ଘ ବର୍ଷ ଧରି ଉଦ୍ୟମ କରିଆସୁଛନ୍ତି । ଶ୍ରମିକ ସଂଗଠନଙ୍କ ମିଳିତ ବିରୋଧ ଫଳରେ ଏଭଳି ଉଦ୍ୟମରୁ କେନ୍ଦ୍ର ସରକାର କ୍ଷାନ୍ତ ହୋଇଥିଲେ । ବର୍ତ୍ତମାନ ପୁଣି ବିମାନବନ୍ଦର, ବନ୍ଦର, ରେଳସେବା ଭଳି ଗୁରୁତ୍ବପୂର୍ଣ୍ଣ ତଥା ଲାଭଦାୟକ ସଂସ୍ଥାର ଘରୋଇକରଣ କରିବାକୁ କେନ୍ଦ୍ର ସରକାର ଅଣ୍ଟା ଭିଡିଛନ୍ତି। ଏହାକୁ ଆଦୌ ବରଦାସ୍ତ କରାଯିବ ନାହିଁ ଏବଂ ଏହାର ପ୍ରତିବାଦରେ ଆଗାମୀ ଦିନରେ ସମସ୍ତ ଶ୍ରମିକ ସଂଗଠନଙ୍କୁ ସାଙ୍ଗରେ ନେଇ ଦେଶବ୍ୟାପୀ ଆନ୍ଦୋଳନକୁ ବ୍ୟାପକ କରାଯିବ ବୋଲି ଆଇଏଡ଼ଟିୟୁସି ପକ୍ଷରୁ ଚେତାବନୀ ଦିଆଯାଇଛି ।