ଅଶାନ୍ତ ସମ୍ଭାଲ : ଇଣ୍ଟରନେଟ ସେବା ସମେତ ସମସ୍ତ ସ୍କୁଲ ଓ କଲେଜ ବନ୍ଦ

ନନ୍ଦିଘୋଷ ବ୍ୟୁରୋ: ଅଶାନ୍ତ ହୋଇପଡିଛି ଉତ୍ତରପ୍ରଦେଶର ସମ୍ଭାଲ । ମସଜିଦ ସର୍ଭେକୁ ନେଇ ଜାରି ରହିଛି ହିଂସା । ଉତ୍ତେଜନାକୁ ଦୃଷ୍ଟିରେ ଘଟଣାସ୍ଥଳରେ ରଖି ବ୍ୟାପକ ପୋଲିସ ମୁତୟନ ହୋଇଛନ୍ତି । ସ୍ଥିତି ଉତ୍ତେଜନାପୂର୍ଣ୍ଣ ଥିବାରୁ ୨୪ ଘଣ୍ଟା ଲାଗି ଇଣ୍ଟରନେଟ ସେବା ବନ୍ଦ ଏବଂ ସମସ୍ତ ସ୍କୁଲ ଓ କଲେଜ ବନ୍ଦ କରିବାକୁ ନିର୍ଦ୍ଦେଶ ଦେଇଛି ପ୍ରଶାସନ। ଉତ୍ତରପ୍ରଦେଶ ସମ୍ଭଲରେ ମସଜିଦ ସର୍ଭେକୁ ନେଇ ଉତ୍ତେଜନାରେ ବର୍ତ୍ତମାନ ସୁଦ୍ଧା ୪ ଜଣ ଲୋକଙ୍କ ମୃତ୍ଯ ହୋଇଛି। ୨୦ରୁ ଅଧିକ ଲୋକ ଆହତ ହୋଇଛନ୍ତି। ଲୋକଙ୍କ ଆକ୍ରମଣରେ ୩୦ରୁ ଅଧିକ ପୋଲିସ କର୍ମୀ ଆହତ ହୋଇଛନ୍ତି। ତେବେ ବର୍ତ୍ତମାନ ସୁଦ୍ଧା ୨୦ ଜଣଙ୍କୁ ଗିରଫ କରିଛି ପୋଲିସ।

ସମ୍ଭଲ ସାଂସଦ ଜିଆଉର ରେହମାନ ବର୍କ୍ ଏବଂ ସ୍ଥାନୀୟ ବିଧାୟକଙ୍କ ପୁଅ ସାହିଲ ଇକବାଲଙ୍କ ବିରୋଧରେ ମାମଲା ରୁଜୁ କରିଛି ପୋଲିସ। ହିଂସାକାଣ୍ଡ ଉସୁକାଇବା ଅଭିଯୋଗରେ ଉଭୟଙ୍କ ବିରୋଧରେ ମାମଲା ରୁଜୁ ହୋଇଛି। ବାହାର ଜନପ୍ରତିନିଧିଙ୍କୁ ସମ୍ଭଲକୁ ପ୍ରବେଶ ଉପରେ ଆସନ୍ତା ନଭେମ୍ବର ୩୦ ତାରିଖ ପର୍ଯ୍ଯନ୍ତ କଟକଣା ଲାଗିଛି। ମସଜିଦ ସର୍ଭେକୁ ନେଇ ବ୍ୟାପକ ହିଂସାକାଣ୍ଡ ପରେ ଫ୍ଲାଗ୍ ମାର୍ଚ୍ଚ କରିଛି ପୋଲିସ। ସ୍ଵାଭାବିକ ସ୍ଥିତି ଫେରାଇ ଆଣିବାକୁ ଜନତାଙ୍କୁ ଅପିଲ କରିଛି। ସମ୍ବଲରେ ପ୍ରତିଷ୍ଠିତ ଏକ ମସଜିଦକୁ ନେଇ କିଛି ଦିନ ଧରି ବିବାଦ ଲାଗି ରହିଛି।

ମୋଗଲ କାଳରେ ଏକ ମନ୍ଦିର ଭାଙ୍ଗି ସାହି ଜାମା ମସଜିଦ ନିର୍ମାଣ କରାଯାଇଥିଲା ବୋଲି ଅଭିଯୋଗ ଆସିବା ପରେ ଏହାକୁ ନେଇ ଲାଗି ରହିଛି ଉତ୍ତେଜନା। ମସଜିଦର ସର୍ଭେ ଲାଗି କୋର୍ଟ ନିର୍ଦ୍ଦେଶ ପରଠାରୁ ସେଠାରେ ଉତ୍ତେଜନା ଲାଗି ରହିଥିଲା।ଗତ ନଭେମ୍ବର ୧୯ରେ ସ୍ଥାନୀୟ ପୋଲିସ ଓ ଲୋକଙ୍କ ସହାୟତାରେ ମସଜିଦର ସର୍ଭେ କରାଯାଇଥିଲା। ସ୍ଥାନୀୟ ଲୋକଙ୍କ କହିବା ଅନୁସାରେ ୧୫୨୯ ଖ୍ରୀଷ୍ଟାବ୍ଦରେ ହରିହର ମନ୍ଦିରକୁ ଭାଙ୍ଗି ମୋଗଲ ସମ୍ରାଟ ଆକବର ସେଠାରେ ମସଜିଦ ନିର୍ମାଣ କରିଥିଲେ।