କେନ୍ଦ୍ର ଦେଉନି ଟିକା, ରାଜ୍ୟରେ ଟିକା ଅଭାବ କାରଣରୁ ଟିକାକରଣ ପ୍ରଭାବିତ

ଭୁବନେଶ୍ୱର: କେନ୍ଦ୍ର ଦେଉନି ଟିକା, ରାଜ୍ୟରେ ଟିକା ଅଭାବ ଯୋଗୁ ଟିକାକରଣ ପ୍ରଭାବିତ । ରାଜ୍ୟର ୭ଶହ ଟିକାକରଣ କେନ୍ଦ୍ର ବନ୍ଦ ହୋଇଥିବା ସୂଚନା ମିଳିଛି । କୋରାପୁଟ ଜିଲ୍ଲାରେ ପୂରା ବନ୍ଦ ହୋଇଯାଇଛି ଟିକାକରଣ । ଦୁଇଦିନ ଭିତରେ ଟିକା ନଆସିଲେ ରାଜ୍ୟରେ ଟିକାକରଣ ବନ୍ଦ ହୋଇଯିବ ବୋଲି ପରିବାର କଲ୍ୟାଣ ନିର୍ଦ୍ଦେଶକ ବିଜୟ ପାଣିଗ୍ରାହୀ କହିଛନ୍ତି ।

ଏଯାଏ କେନ୍ଦ୍ର କେବେ ଟିକାଦେବ ତାହା ସ୍ପଷ୍ଟ କରିନାହିଁ  । ରାଜ୍ୟ ପକ୍ଷରୁ ଚିଠି ଲେଖି ଅବଗତ କରାଯାଇଛି । ୧୦ଦିନ ପାଇଁ ୨୫ ଲକ୍ଷ ଟିକା କେନ୍ଦ୍ରକୁ ମାଗିଛି ରାଜ୍ୟ । ଗତକାଲି ୪ଶହ ଟିକାକରଣ କେନ୍ଦ୍ର ବନ୍ଦ ହୋଇଥିଲା । ମୋଟ୍ ୧୫ଶହ ଟିକାକରଣ କେନ୍ଦ୍ର ଥିଲା । ଟିକା ଅଭାବରୁ ୭ଶହ ଟିକାକରଣ କେନ୍ଦ୍ର ବନ୍ଦ ହୋଇଛି ।

କେନ୍ଦ୍ରକୁ ୨୫ ଲକ୍ଷ କୋଭିଡ୍ ଟିକା ମାଗିଛନ୍ତି ରାଜ୍ୟ ସରକାର । ସ୍ୱାସ୍ଥ୍ୟ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବଙ୍କ ପରେ ପୁଣି ଥରେ କେନ୍ଦ୍ରକୁ ଚିଠି ଲେଖିଛନ୍ତି ସ୍ୱାସ୍ଥ୍ୟମନ୍ତ୍ରୀ ନବ ଦାସ । ଆଗାମୀ ୧୦ ଦିନର ଟିକାକରଣ ପାଇଁ ଟିକା ଯୋଗାଇବାକୁ ଦାବି କରିଛନ୍ତ ସ୍ୱାସ୍ଥ୍ୟମନ୍ତ୍ରୀ ।  ଏବେ ରାଜ୍ୟରେ ଦୈନିକ ଅଢେଇ ଲକ୍ଷ ଲୋକଙ୍କୁ ଟିକାକରଣ କରାଯାଉଛି । ଆଜି ସୁଦ୍ଧା ୫ ଲକ୍ଷ ୩୪ ହଜାର କୋଭିଡ୍ ଟିକା ଡୋଜ ରାଜ୍ୟ ପାଖରେ ଅଛି ।

ଉପଲବ୍ଧ ଥିବା ଷ୍ଟକରେ ମାତ୍ର ଦୁଇ ଦିନ ପର୍ଯ୍ୟନ୍ତ ଟିକାକରଣ କରାଯାଇପାରିବ । ୯ ତାରିଖ ସୁଦ୍ଧା ଅଧିକ ଟିକା ନପହଞ୍ଚିଲେ ରାଜ୍ୟରେ କୋଭିଡ୍ ଟିକାକରାଣ ବାଧାପ୍ରାପ୍ତ ହେବ । ଦ୍ୱିତୀୟ ଡୋଜ୍ ନେବାକୁ ଥିବା ହିତାଧିକାରୀଙ୍କ ଟିକାଦାନ ବିଳମ୍ବ ହେବ । ଟିକା ଅଭାବରୁ ୭୦୦ ଟିକାଦାନ କେନ୍ଦ୍ରକୁ ବନ୍ଦ କରିବାକୁ ବାଧ୍ୟ ହୋଇଛୁ ବୋଲି ମନ୍ତ୍ରୀ ନବ ଦାସ କହିଛନ୍ତି ।