‘ଥଣ୍ଡା-ଜର’ ଔଷଧ ସହ ବଢ଼ିବ ୮୦୦ ମେଡିସିନର ଦାମ

ନୂଆଦିଲ୍ଲୀ: ଆହୁରି ବାଧିବ ଦରବୃଦ୍ଧି । ପେଟ୍ରୋଲ୍-ଡିଜେଲ୍ ସହ ଗ୍ୟାସ୍ ଦର ବଢ଼ି ଚାଲିଥିବା ବେଳେ ଏପ୍ରିଲରୁ ମହଙ୍ଗା ହେବ ଔଷଧ ଦର । କେତେକ ଔଷଧର ଦରବୃଦ୍ଧି ପ୍ରସ୍ତାବକୁ କେନ୍ଦ୍ର ସରକାର ଅନୁମତି ଦେଇଛନ୍ତି । ଯାହାପରେ ଏପ୍ରିଲ୍ ୧ରୁ ପ୍ରାୟ ୮୦୦ ଔଷଧର ମୂଲ୍ୟ ୧୦.୭ ପ୍ରତିଶତ ପର୍ଯ୍ୟନ୍ତ ବଢ଼ିପାରେ । ନ୍ୟାସନାଲ୍ ଫାର୍ମାସ୍ୟୁଟିକାଲ୍ ପ୍ରାଇସିଂ ଅଥରିଟି ୨୫ ମାର୍ଚ୍ଚରେ ମୂଲ୍ୟ ବୃଦ୍ଧି ନେଇ ଘୋଷଣା କରିଥିଲେ ।

କେଉଁ ଔଷଧର ବଢ଼ିବ ଦର ?

ଜର, ହୃଦରୋଗ, ଉଚ୍ଚ ରକ୍ତଚାପ, ଚର୍ମ ରୋଗ ଓ ଆନିମିଆ ରୋଗ ଚିକିତ୍ସା ପାଇଁ ବ୍ୟବହୃତ ଔଷଧ ଦାମ ବଢ଼ିବ । ଅର୍ଥାତ୍ ପାରାସିଟାମଲ୍, ସିପରୋଫ୍ଲୋକ୍ସାସିନ୍ ହାଇଡ୍ରୋକ୍ଲୋରାଇଡ୍, ମେଟ୍ରୋନିଡାଜୋଲ, ଫିନାଇଟୋଇନ୍ ସୋଡିୟମ୍ ଭଳି ଔଷଧ ଦାମ ମହଙ୍ଗା ହୋଇଯିବ । ଏହାବାଦ କରୋନା ମହାମାରୀର ଚିକିତ୍ସା ପାଇଁ ବ୍ୟବହୃତ ଔଷଧର ଦାମ ମଧ୍ୟ ବଢ଼ିଯିବ ।

ପ୍ରତିବର୍ଷ NPPA ଔଷଧ ଦର ପରିବର୍ତ୍ତନ କରିଥାଏ । ଔଷଧ ପ୍ରସ୍ତୁତିରେ ବ୍ୟବହୃ ସାମଗ୍ରୀର ବଢ଼ିଥିବା ଦାମକୁ ନେଇ ସ୍ଥିର ହୁଏ ନୂଆ ଦର । କୌଣସି ଔଷଧର ଦାମ ବର୍ଷକ ମଧ୍ୟରେ ୧୦ ପ୍ରତିଶତରୁ ଅଧିକ ବଢ଼ି ପାରିବ ନାହିଁ । ଏନେଇ NPPA ମାର୍ଚ୍ଚ ୨୫ରେ ଏକ ନୋଟିସ୍ ଜାରି କରିଥିଲା । ଡିପିସିଓ ନିୟମ ଅନୁସାରେ NPPA ଔଷଧ ଦର ବୃଦ୍ଧି କରିଥାଏ । ୨୦୧୩ରେ ଡିପିସିଓ ନିୟମ ଅନୁସାରେ, କୌଣସି ଔଷଧ ଧାର୍ଯ୍ୟ ମୂଲ୍ୟ ଠାରୁ କମ୍ ଦରରେ ବିକ୍ରି ହେବ ।

ସରକାର ଭିନ୍ନ ଭିନ୍ନ ଯୋଜାନ ପାଇଁ ଜେନେରିକ୍ ଔଷଧ କିଣନ୍ତି ଏବଂ ସେହି ଔଷଧକୁ ସରକାରୀ ମେଡିକାଲରେ ମାଗଣାରେ ଦେଇଥାନ୍ତି । ସେଡ୍ୟୁଲ୍ ଔଷଧରେ ଅତ୍ୟାବଶ୍ୟକୀୟ ଡ୍ରଗ୍ସ ମଧ୍ୟ ରହିଛି । ଏହାର ଦାମ୍ ବୃଦ୍ଧି ସରକାରଙ୍କ ଅନୁମୋଦନ ପରେ ହିଁ ହୋଇଥାଏ ।

ବିଗତ ୨ ବର୍ଷ ମଧ୍ୟରେ ଔଷଧ ପ୍ରସ୍ତୁତିରେ ବ୍ୟବହାର କରାଯାଉଥିବା ସାମଗ୍ରୀର ଦର ୧୫ରୁ ୧୩୦ ପ୍ରତିଶତ ବଢ଼ିଛି । ପାରାସିଟାମଲ୍ ଦର ମଧ୍ୟ ୧୩୦ ପ୍ରତିଶତ ବୃଦ୍ଧି ପାଇଛି । ଏହାବାଦ ସିରପ୍ ଓ ଓରାଲ୍ ଡ୍ରପ୍ ସହ ଅନ୍ୟ ଔଷଧରେ ବ୍ୟବହୃତ ଗ୍ଲିସରିନ୍ ଦାମ ୨୬୩ ପ୍ରତିଶତ ପର୍ଯ୍ୟନ୍ତ ବୃଦ୍ଧି ପାଇଛି । କଞ୍ଚାମାଲ ଦରବୃଦ୍ଧି ପରେ ଗତବର୍ଷ ଫାର୍ମା କମ୍ପାନୀ ଔଷଧ ଦର ବୃଦ୍ଧି ଦାବି କରିଥିଲେ ।