’କାଳିଆ’ ଟଙ୍କା ଫେରାଇବାକୁ ଚିଠି: ମାତ୍ର ଦୁଇ ପ୍ରତିଶତଙ୍କୁ ଭୁଲରେ ମିଳିଛି ଅର୍ଥ

ଭୁବନେଶ୍ୱର, ବଲାଙ୍ଗୀର: ଚିହ୍ନଟ ହେଲେ ଅଯୋଗ୍ୟ କାଳିଆ ହିତାଧିକାରୀ । ତୁରନ୍ତ ଟଙ୍କା ଫେରସ୍ତ କରିବାକୁ କୃଷି ବିଭାଗ ପକ୍ଷରୁ ଏମାନଙ୍କୁ ପତ୍ର ଲେଖାଯାଇଛି । ଗତ ବର୍ଷ କାଳିଆ ଟଙ୍କା ମିଳିଥିବା ସମୟରେ ଏପରି କିଛି ଚାଷୀ ଥିଲେ, ଯେଉଁମାନଙ୍କୁ ଟଙ୍କା ମିଳିବାର ନଥିଲା । ହେଲେ ପଞ୍ଜିକରଣ ବେଳେ ସେମାନଙ୍କ ନାଁ ଥିବାରୁ ଟଙ୍କା ପାଇଥିଲେ । ସାରା ରାଜ୍ୟରେ ଏପରି ମାତ୍ର ଦୁଇ ପ୍ରତିଶତ ଚାଷୀ ଅଛନ୍ତି ଯେଉମାନେ ଟଙ୍କା ଫେରାଇବେ ।

ଚାଷୀଙ୍କୁ ଆର୍ଥିକ ପ୍ରୋତ୍ସହନ ପାଇଁ କାଳିଆ ଯୋଜନା ଆରମ୍ଭ କରିଥିଲେ ରାଜ୍ୟ ସରକାର । ସବୁ ବର୍ଗର ଚାଷୀ ତାଲିକାରେ ରହି ୫୧ଲକ୍ଷ ୫ ହଜାର ୨୯୦ ଚାଷୀ ଏହି ଯୋଜନାର ଲାଭ ପାଇଲେ । ରବି ଓ ଖରିଫ ଋତୁ ପାଇଁ ୫ ହଜାର ଟଙ୍କା ଲେଖାଏଁ ଟଙ୍କା ମିଳିଲା । ହେଲେ ଏହି ତାଲିକାରୁ ୨ ପ୍ରତିଶତ ଚାଷୀ ଅଯୋଗ୍ୟ ବାହାରିଛନ୍ତି ।

ଏମାନେ ପୂର୍ବରୁ ଚାଷୀ ଭାବେ ପଞ୍ଜିକରଣ ହୋଇଥିଲେ । କାଳିଆ ଯୋଜନା ସମୟରେ ସୋମନଙ୍କ ସ୍ଥିତି ସୁଧୁରିଥିଲା । ହେଲେ ପାଖାପାଖି ୧ଲକ୍ଷ ୬ ହଜାର ୬୩୧ ଅଯୋଗ୍ୟ ହିତାଧିକାରୀଙ୍କ ଖାତାକୁ ଟଙ୍କା କାଳିଆ ଟଙ୍କା ଚାଲିଯାଇଛି । ଯାହାକୁ ଫେରାଇବା ପାଇଁ କୃଷି ବିଭାଗ ପକ୍ଷରୁ ଚିଠି ସହ ରିଫଣ୍ଡ ବ୍ୟାଙ୍କ ଆକାଉଣ୍ଟ ନମ୍ବର ଅଯୋଗ୍ୟ ହିତାଧିକାରୀଙ୍କ ପାଖକୁ ପଠାଯାଇଛି ।

କଳାହାଣ୍ଡ, ବଲାଙ୍ଗୀର, ବରଗଡ଼ ପରି ସାରା ରାଜ୍ୟରେ ଏପରି ଅଯୋଗ୍ୟ ହିତାଧିକାରୀଙ୍କ ତାଲିକା ପ୍ରସ୍ତୁତ ହୋଇଛି । ଜିଲ୍ଲା କୃଷି ଅଧିକାରୀଙ୍କ ଜରିଆରେ ଏମାନଙ୍କ ସୂଚନା ଦିଆଯାଇଛି । ଚିଠି ତଳେ ଦିଆଯାଇଥିବା ବ୍ୟାଙ୍କ ଆକାଉଣ୍ଟରେ ସେମାନେ ଟଙ୍କା ଫେରାଇବେ । ଏ ନେଇ ଏକ ପୋର୍ଟାଲ କରାଯାଇଛି । ଚିଠି ମିଳିବାର ଏକ ମାସ ଭିତରେ ଟଙ୍କା ଫେରାଇବା ପାଇଁ କୃଷି ବିଭାଗ ଅଯୋଗ୍ୟ ହିତାଧିକାରୀଙ୍କ ପାଇଁ ଡେଡଲାଇନ ସ୍ଥିର କରିଛନ୍ତି । ଏହା ପରେ ଜିଲ୍ଲା କୃଷି ଅଧିକାରୀଙ୍କୁ ତଥ୍ୟ ସହ ଫେରସ୍ତ ସଂପର୍କରେ ଅବଗତ କଲେ, ତାଲିକାରୁ ନାଁ କାଟ ହେବ ।