ସ୍ତ୍ରୀ ସହ ଝଗଡ଼ାରୁ ଜାଳିଦେଲା ଘର, ଜୀଅନ୍ତା ଜଳିଗରେ ୪ ଶିଶୁ ସହ ୬ ଜଣ
ବେଙ୍ଗଳୁରୁ: ମଦ ନିଶା ମଣିଷକୁ କେଉଁ ସ୍ତରକୁ ବି ନେଇ ଯାଇପାରେ । ଜୀବନର ସବୁକିଛିକୁ ଓଜାଡ଼ି ଦେଇପାରେ ଏହି ନିଶା । ଏମିତି ଏକ ଘଟଣା ଦେଖିବାକୁ ମିଳିଛି କର୍ଣ୍ଣାଟକରେ । ମଦ ପିଇ ସ୍ତ୍ରୀ ସହ ଝଗଡ଼ା କରିଥିଲେ ସ୍ୱାମୀ । ଫଳରେ ଛୁଆଙ୍କୁ ନେଇ ସ୍ତ୍ରୀ ବାପଘରକୁ ପଳାଇଥିଲା । ଆଉ ମଦ ନିଶାରେ ସ୍ୱାମୀ ସ୍ତ୍ରୀ ସହ ୬ ଜଣଙ୍କୁ ଜାଳି ଦେଇଛି । କୋଡାଗୁ ଜିଲ୍ଲାର ପୋନ୍ନମ୍ପେଟ୍ ଥାନା ମୁଗଟାଗେରି ଗାଁରେ ଘଟିଛି ଏହି ବିଭତ୍ସ କାଣ୍ଡ ।
ପୋଲିସ ସୂଚନା ଅନୁସାରେ, ଶ୍ରମିକ ଶ୍ରେଣୀର ୫୦ ବର୍ଷୀଅ ୟେରାଭରା ବୋଜା ପ୍ରତିଦିନ ମଦ ପିଇ ସ୍ତ୍ରୀ ବେବି ସହ ଝଗଡ଼ା କରିଥାଏ । ଏମିତି ଝଗଡ଼ା ପାଇଁ ପ୍ରାୟ ସପ୍ତାହକ ତଳେ ବେବି ସ୍ୱାମୀଙ୍କୁ ଛାଡ଼ି ସେହି ଗାଁରେ ରହୁଥିବା ତାଙ୍କ ଭାଇଙ୍କ ଘରକୁ ପିଲାଛୁଆଙ୍କୁ ନେଇ ପଳାଇଥିଲେ । ସ୍ତ୍ରୀ ପଳାଇବା ପରେ ଶନିବାର ମଦ୍ୟପ ବୋଜା ରାତି ପ୍ରାୟ ୨ଟା ବେଳେ ଶ୍ୱଶୁର ଘରକୁ ଯାଇଥିଲା ।
ଘର ଉପରକୁ ଚଢ଼ିବା ସହ ଟାଇଲର କିଛି ଖଣ୍ଡ କାଢ଼ି ସ୍ତ୍ରୀ ଶୋଇଥିବା ଘରେ ପେଟ୍ରୋଲ୍ ଢ଼ାଳି ନିଆଁ ଲଗାଇ ଦେଇଥିଲା । ଆଉ ଏହି ନିଆଁରେ ୪ ଛୁଆଙ୍କ ସହ ୬ ଜଣଙ୍କ ମୃତ୍ୟୁ ହୋଇଛି । ଅନ୍ୟ ୪ ଜଣ ମେଡିକାଲ୍ ବେଡରେ ମୃତ୍ୟୁ ସହ ସଂଘର୍ଷ କରୁଛନ୍ତି । ବୋଜାର ସ୍ତ୍ରୀ ବେବି, ବୋଜାର ମାଉସୀ ଏରଭା ସହ ୪ ଛୁଆ ଜୀବନ୍ତ ଦଗ୍ଧ ହୋଇ ଯାଇଛନ୍ତି । ଗୁରୁତରଙ୍କୁ ମୟସୁରୁ ଏବଂ ମାଡିକେରି ମେଡିକାଲରେ ଭର୍ତ୍ତି କରାଯାଇଛି । ବୋଜାକୁ ଗିରଫ କରିବା ପାଇଁ ପୋଲିସ ଉଦ୍ୟମ କରୁଛି ।
