ବୟସ ୬୧ ବର୍ଷ, ୮୮ ଥର ପାଇଁ ବିବାହ କରିବାକୁ ଯାଉଛନ୍ତି ଇଣ୍ଡୋନେସିଆର ଏହି ବ୍ୟକ୍ତି

ନନ୍ଦିଘୋଷ ବ୍ୟୁରୋ: ବୟସ ୬୧ ହେଲେ ବିବାହ କରିବାର ନିଶା ଯାଇନି । ୮୮ ଥର ପାଇଁ ବିବାହ କରିବାକୁ ଯାଉଛନ୍ତି ଜଣେ ବ୍ୟକ୍ତି । କଥାଟା ଆଶ୍ଚର୍ଯ୍ୟ ଲାଗୁଥିଲେ ବି ସତ । ୬୧ ବର୍ଷୀୟ ବ୍ୟକ୍ତି ୮୮ତମ ଥର ବିବାହ କରିବାକୁ ଯାଉଛନ୍ତି । ପୂର୍ବରୁ ୮୭ ବିବାହ କରି ଚର୍ଚ୍ଚାରେ ରହିଛନ୍ତି ବ୍ୟକ୍ତି ଜଣଙ୍କ । ବ୍ୟକ୍ତିଜଣଙ୍କର ନୂଆ ବଧୂ ହେଉଛି ତାଙ୍କ ପୂର୍ବ ପତ୍ନୀ, ଯାହାଙ୍କୁ ସେ ୮୬ତମ ବିବାହ କରିଥିଲେ ।

ମାତ୍ର ଏକ ମାସ ପର୍ଯ୍ୟନ୍ତ ଏମାନଙ୍କ ସମ୍ପର୍କ ଚାଲିଥିଲା । ସୂଚନାନୁଯାୟୀ, କାନ୍ ନାମରେ ପରିଚିତ ଏହି ବ୍ୟକ୍ତିଙ୍କ ଘର ଇଣ୍ଡୋନେସିଆର ମଜାଲେଙ୍ଗକାରେ ଅଟେ । ଏତେ ବିବାହ କରିଥିବା କାନ୍ ବୃତ୍ତିରେ ଜଣେ କୃଷକ ଅଟନ୍ତି । କାନ୍ ନିକଟରେ ଖୁଲାସା କରିଥିଲେ ଯେ ସେ ୧୪ ବର୍ଷ ବୟସରୁ ବିବାହ କରିବା ଆରମ୍ଭ କରିଥିଲେ । ତାଙ୍କର ପ୍ରଥମ ପତ୍ନୀ ତାଙ୍କଠୁ ଦୁଇ ବର୍ଷ ବଡ଼ ଥିଲେ । କିନ୍ତୁ ସେତେବେଳେ କାନଙ୍କ ଖରାପ ବ୍ୟବହାର ପାଇଁ ପ୍ରଥମ ପତ୍ନୀ ବିବାହର ମାତ୍ର ଦୁଇ ବର୍ଷ ପରେ ତଲାକ ଦେଇଥିଲେ । ଅବଶ୍ୟ କାନ ତଲାକକୁ ନେଇ ଆଉ କିଛି କହିବା ପାଇଁ ମନା କରିଦେଇଥିଲେ ।

ରିପୋର୍ଟ ଅନୁସାରେ, କାନ୍ କହିଛି ଯେ, ଏହାପରେ ମୁଁ ମହିଳାଙ୍କୁ ଆକର୍ଷିତ କରିବା ପାଇଁ ଆଧ୍ୟାତ୍ମିକ ପନ୍ଥା ଆପଣାଇଥିଲି । କିନ୍ତୁ ମୁଁ ଏପରି କାମ କରିବାକୁ ଚାହୁଁନାହିଁ ଯାହା ମହିଳାମାନଙ୍କ ପାଇଁ ଭଲ ନୁହେଁ । ମୁଁ ସେମାନଙ୍କ ଭାବନା ସହ ଖେଳିବାକୁ ଚାହିଁନାହିଁ । କିଛି ବି ଅନୈତିକ କରିବା ବଦଳରେ ମୁଁ ସେମାନଙ୍କୁ ବିବାହ କରିବା ଉତ୍ତମ ଭାବିଥାଏ । ବର୍ଷ ପରେ ବର୍ଷ ଆଧ୍ୟାତ୍ମିକ ବଳରେ ନୂଆ ନୂଆ ଝିଅ ମୋ ପ୍ରେମରେ ପଡ଼ିଥାନ୍ତି । ଏବଂ ମୁଁ ସେମାନଙ୍କୁ ବିଧିବଦ୍ଧ ବିବାହ କରିଥାଏ ।

ନିଜର ପୂର୍ବତନ ପତ୍ନୀଙ୍କ ଠାରୁ ଅଲଗା ହେବା ପରେ ପୁଣିଥରେ ତାଙ୍କୁ ବିବାହ କରିବାକୁ ନେଇ କାନ କୁହନ୍ତି ଯେ, ଆମଙ୍କୁ ଅଲଗା ହେବା ବହୁତ ସମୟ ହୋଇଗଲାଣି, କିନ୍ତୁ ଆମ ଭିତରେ ଭଲ ପାଇବା ଏବେବି ରହିଛି । ସେ ମୋତେ ଏବେବି ଭଲ ପାଉଛି । ଏତେଥର ବିବାହ କରିଥିବା କାନଙ୍କୁ ଲୋକମାନେ ପ୍ଲେ ବଏ କିଙ୍ଗ ନାଁରେ ଜାଣିଥାନ୍ତି । ତାଙ୍କ କହିବା ଅନୁଯାୟୀ ଯଦି କୌଣସି ମହିଳା ପୁଣିଥରେ ତାଙ୍କ ଜୀବନରେ ଆସିବାକୁ ଚାହେଁ ତେବେ ସେ ତାଙ୍କୁ ମନା କରନ୍ତି ନାହିଁ ।

ସୂଚନାଯୋଗ୍ୟ, ମିଜୋରାମର ଜିଓନା ଚନା ନାମକ ଜଣେ ୭୬ ବର୍ଷୀୟ ବୃଦ୍ଧ ଗତ ବର୍ଷ ମୃତ୍ୟୁବରଣ କରିଥିଲେ । ତାଙ୍କର ମଧ୍ୟ ୩୯ ସ୍ତ୍ରୀ ଓ ୯୪ ପିଲା ଥିଲା । ବିଶ୍ୱରେ ସବୁଠୁ ବଡ଼ ପରିବାର ରଖିଥିବାର ରେକର୍ଡ ତାଙ୍କ ପାଖରେ ଥିଲା । ଏକ ରିପୋର୍ଟ ଅନୁଯାୟୀ, ଚନାଙ୍କ ପରିବାରରେ ୧୬୭ ଜଣ ସଦସ୍ୟ ଅଛନ୍ତି ।