ଏସୀୟ କ୍ରୀଡ଼ା: ପାକିସ୍ତାନକୁ ରେକର୍ଡ ବ୍ୟବଧାନରେ ହରାଇଲା ଭାରତୀୟ ହକି ଦଳ

ହଙ୍ଗଝୋଉ: ଅଧିନାୟକ ହରମନପ୍ରୀତ ସିଂଙ୍କ ଚାରୋଟି ଗୋଲ ସହାୟତାରେ ଭାରତୀୟ ହକି ଦଳ ଏସୀୟ କ୍ରୀଡ଼ାରେ ପାକିସ୍ତାନକୁ ବଡ଼ ବ୍ୟବଧାନ ୧୦-୨ରେ ପରାଜିତ କରିଛି । ଏହି ବୃହତ ବିଜୟ ସହ ଭାରତ ସେମିଫାଇନାଲରେ ମଧ୍ୟ ସ୍ଥାନ ପକ୍କା କରିଛି । ପାକିସ୍ତାନ ବିପକ୍ଷରେ ଗୋଲ ବ୍ୟବଧାନ ହିସାବରେ ଏହା ଭାରତର ସବୁଠୁ ବଡ଼ ବିଜୟ ଅଟେ । ହରମନପ୍ରୀତ ୧୧ତମ ମିନିଟ, ୧୭ତମ, ୩୩ତମ ଏବଂ ୩୪ତମ ମିନିଟରେ ଗୋଲ୍ କରିଥିଲେ । ସେହିପରି ବରୁଣ କୁମାର (୪୧ତମ ଏବଂ ୫୪ତମ ମିନିଟ) ଦୁଇଟି ଗୋଲ୍ କରିଥିଲେ ।

ମନଦୀପ ସିଂ (୮ତମ ମିନିଟ, ସୁମିତ (୩୦ତମ ମିନିଟ), ରାମେଶ୍ୱର ସିଂ (୪୬ତମ ମିନିଟ) ଏବଂ ଲଲିତ କୁମାର (୪୯ତ ମିନିଟ) ଗୋଲ୍ କରିଥିଲେ । ପାକିସ୍ତାନ ବିପକ୍ଷରେ ଭାରତର ଏହା ପୂର୍ବରୁ ବଡ଼ ବିଜୟର ବ୍ୟବଧାନ ୨୦୧୭ରେ ୭-୧ ଥିଲା । ପାକିସ୍ତାନ ମଧ୍ୟ ଏହି ବ୍ୟବଧାନରେ ଭାରତ ବିରୋଧରେ ସବୁଠୁ ବଡ଼ ବିଜୟ ଲାଭ କରିଥିଲା । ପାକିସ୍ତାନ ଏହି ବିଜୟ ୧୯୮୨ରେ ଦିଲ୍ଲୀରେ ହୋଇଥିଲା ଏସିଆନ ଗେମ୍ସର ଫାଇନାଲରେ ହାସଲ କରିଥିଲା । ଭାରତ ଶନିବାର ୪୧ ବର୍ଷ ପୂର୍ବର ସେହି ଅପମାନଜନକ ପରାଜୟର ପ୍ରତିଶୋଧ ନେଇଛି । ଭାରତୀୟ ଦଳ ଲଗାତାର ଚାରି ବିଜୟ ପରେ ୧୨ ଅଙ୍କ ସହ ପୁଲ-ଏରେ ନିଜର ଶୀର୍ଷ ସ୍ଥାନ ପକ୍କା କରିନେଇଛି । ଦଳକୁ ନିଜର ଶେଷ ମୁକାବିଲାରେ ୨ ଅକ୍ଟୋବରରେ ବାଂଲାଦେଶକୁ ସାମ୍ନା କରିବାକୁ ଅଛି ।