ଦେଶୀ କରୋନା ଭ୍ୟାକ୍ସିନକୁ ନେଇ ଭଲ ଖବର, ନାହିଁ କୌଣସି ସାଇଡ୍ ଇଫେକ୍ଟ

ଦେଶୀ କରୋନା ଭ୍ୟାକ୍ସିନକୁ ନେଇ ଶୁକ୍ରବାର ଦିନ ହରିଆନାର ରୋହତକରୁ ଆସିଛି ଭଲ ଖବର । ରୋହତକର ପିଜିଆଇରେ ଭଲ୍ୟୁଣ୍ଟର୍ସଙ୍କ ପ୍ରଥମ ବ୍ୟାଚକୁ ଆଜି ପ୍ରଥମ ଡୋଜ୍ ଦିଆଯାଇଥିଲା ।କୋଭାକ୍ସିନର ପ୍ରଥମ ଡୋଜକୁ ତିନି ଜଣ ଭଲ୍ୟୁଣ୍ଟରଙ୍କ ଶରିର ସହଜତାର ସହ ସ୍ୱୀକାର କରିଛି ବୋଲି ହରିଆନା ସ୍ୱାସ୍ଥ୍ୟମନ୍ତ୍ରୀ ଅନିଲ ବିଜ୍ କହିଛନ୍ତି ।ସେମାନଙ୍କଠାରେ କୌଣସି ସାଇଡ୍ ଇଫେକ୍ଟ ଦେଖିବାକୁ ମିଳିନଥିଲା ବୋଲି ଜଣା ପଡିଛି । ୧୮ରୁ ୫୫ ବର୍ଷୀୟ ସୁସ୍ଥ ଲୋକଙ୍କ ଏହି ଭ୍ୟାକ୍ସିନର ଦୁଇଟି ଡୋଜ୍ ଦିଆଯିବ । ଫେଜ୍ ୱାନ୍ ଟ୍ରାଏଲରେ ଦ୍ୱିତୀୟ ଡୋଜ୍ ୧୪ ଦିନ ପରେ ଦିଆଯିବ । ମୋଟ ୧୧୨୫ ଜଣ ଭଲ୍ୟୁଣ୍ଟର୍ସଙ୍କ ଉପରେ ଏହି ଅଧ୍ୟୟନ ହେବ । ପ୍ରଥମ ପର୍ଯ୍ୟାୟରେ ୩୭୫ ଜଣ ସାମିଲ ହେବେ । ସେହିଭଳି ଦ୍ୱିତୀୟ ଫେଜରେ ୭୫୦ ଜଣ ସାମିଲ ହେବେ । ଟେଷ୍ଟ୍ ମଧ୍ୟରେ ୪:୧ର ରେସିଓ ରହିବ । ଅର୍ଥାତ ଯଦି ୪ ଜଣ ରୋଗୀଙ୍କୁ ଭ୍ୟାକ୍ସିନ୍ ଦିଆଯିବ ତେବେ ତିନି ଜଣଙ୍କୁ ପ୍ରକୃତରେ ଟିକା ଦିଆଯିବ,ଚତୁର୍ଥ ଜଣଙ୍କୁ କେବଳ ଟିକା ଦିଆଯିବାର ନାଟକ କରାଯିବ । ଏହାକୁ ମନୋବିଜ୍ଞାନ ଭାଷାରେ placebo କୁହାଯାଏ ।

୧୪ ସହରରେ ମାନବ ପରୀକ୍ଷଣରେ ‘ସେଫ୍ଟି ଓ ସ୍କ୍ରିନିଂ’ ପରୀକ୍ଷଣ ଉପରେ ଜୋର

ପ୍ରଥମ ଟ୍ରାଏଲକୁ ସେଫ୍ଟି ଓ ସ୍କ୍ରିନିଂ ଏଇଥିପାଇଁ କୁହାଯାଏ ଯେ, ଏହି ପର୍ଯ୍ୟାୟରେ କମ ଡୋଜ୍ ଭ୍ୟାକ୍ସିନ ଦେଇ ଭଲ୍ୟୁଣ୍ଟରଙ୍କ ଉପରେ ଏହାର ପ୍ରଭାବକୁ ନୀରିକ୍ଷଣ କରାଯାଏ । ଭ୍ୟାକ୍ସିନର କୌଣସି ସାଇଡ୍ ଇଫେକ୍ଟ (ପାର୍ଶ୍ୱ ପ୍ରତିକ୍ରିୟା) ଅଛି କି ନାହିଁ ? କୋଭିଡ୍-୧୯ ବ୍ୟତିତ ଏହାର ଲିଭର ଓ ଫୁସଫୁସ୍ ଉପରେ କେଉଁଭଳି ପ୍ରଭାବ ପଡୁଛି ତାକୁ ଏହି ପର୍ଯ୍ୟାୟରେ ଦେଖାଯାଏ ।

ସମସ୍ତ ତଥ୍ୟ ଉପରେ  ICMR ବୈଜ୍ଞାନିକଙ୍କ ନଜର

ICMR ସେହି ଅନୁଷ୍ଠାନକୁ ବାଛିଛି ଯେଉଁଠାରେ କ୍ଲିନିକାଲ ଫାର୍ମାକଲୋଜି ଅଙ୍ଗ ରହିଛି ଓ ମାନବ ପରୀକ୍ଷଣ ଅଭିଜ୍ଞତା ଥିବା ବିଶେଷଜ୍ଞ ରହିଥିବେ । ତରବରିଆ ଟ୍ରାଏଲ କରାଯାଇ ନଥାଏ । କାରଣ ଏହା ଜରିଆରେ ସୁନିଶ୍ଚିତ କରାଯାଇଥାଏ ଯେ, ଭ୍ୟାକ୍ସିନ ମଣିଶଙ୍କ ପାଇଁ କେତେ ସୁରକ୍ଷିତ । ଟ୍ରାଏଲର ସମସ୍ତ ବିବରଣି ଆଇସିଏମଆରକୁ ପଠାଯିବ ।

କେତେ ଦିନରେ ଆସିବ ଭ୍ୟାକ୍ସିନ୍ ?

ବର୍ତ୍ତମାନର ନିୟମ ଅନୁସାରେ ପ୍ରଥମ ପର୍ଯ୍ୟାୟ ସରିବା ପାଇଁ ଅତିକମରେ ୧ ମାସ ସମୟ ଲାଗିବ । ଏଥିରୁ ମିଳିଥିବା ଡାଟାକୁ ଡ୍ରଗ୍ କଣ୍ଟ୍ରୋଲର ଅଫ୍ ଇଣ୍ଡିଆକୁ ଦିଆଯିବ । ତା’ପରେ ପରବର୍ତ୍ତି ପର୍ଯ୍ୟାୟ ପାଇଁ ଅନୁମତି ମିଳିବ । ଫେଜ୍ ୧ ଓ ଫେଜ୍ ୨ରେ ମୋଟାମୋଟି ୧ ବର୍ଷ ୩ ମାସ ଲାଗିବ ।

କେତେ ଟଙ୍କାରେ ମିଳିବ କରୋନା ଭ୍ୟାକ୍ସିନ୍ ?

ଭାରତରେ ପିଲାଙ୍କୁ ଜନ୍ମରୁ ଅନେକ ପ୍ରକାରର ଟିକା ଲଗାଯାଇଥାଏ । ବଜାରରେ ଯାହାର ମୁଲ୍ୟ ୫୦ ଟଙ୍କାରୁ ୬ ହଜାର ଟଙ୍କା ପର୍ଯ୍ୟନ୍ତ ଯାଇଥାଏ । ଉଦାହରଣ ସ୍ୱରୁପ ରୋଟାଭାଇରସ ୨ ଟିକା ୬୮୯ ଟଙ୍କାରୁ ୧୪୯୯ଟଙ୍କାରେ ମିଳିଥାଏ । ଏମିତିରେ ପ୍ରଶ୍ନ ଉଠିବ ଯେ,ଟିକା ବଜାରକୁ ଆସିଲେ କେତେ ଟଙ୍କା ପଡିବ । ମହାମାରୀର ରୂପକୁ ଦେଖିଲେ ଲାଗୁଛି ଅଧିକାଂଶ ଦେଶ ଏହାକୁ ମାଗଣାରେ ବାଣ୍ଟିବେ । ଦୁନିଆର ସବୁଠୁ ବଡ ଭ୍ୟାକ୍ସିନ୍ ନିର୍ମାତା ସିରମ ଇନଷ୍ଟିଚ୍ୟୁଟ୍ ଅଫ୍ ଇଣ୍ଡିଆର ଚେୟାରମ୍ୟାନ୍ ଆଦର ପୁନାବାଲାଙ୍କ ଅନୁସାରେ ତାଙ୍କ କମ୍ପାନୀର ଭ୍ୟାକ୍ସିନର ମୂଲ୍ୟ ପାଖାପାଖି ୧ ହଜାର ଟଙ୍କା ହେବ । ତେବେ ସେ ଏହା ମଧ୍ୟ କହିଛନ୍ତି ଯେ, ସରକାର ଏହାକୁ ମାଗଣାରେ ବାଣ୍ଟିବେ ।

ଭ୍ୟାକ୍ସିନକୁ କେମିତି ବିକଶିତ କରାଯାଏ ?

ଭ୍ୟାକ୍ସିନ ବିକାଶର ଅନେକ ସ୍ତର ଥାଏ । ପ୍ରାରମ୍ଭିକ ସ୍ତରରେ ଲ୍ୟାବ ଭିତରେ ଭ୍ୟାକ୍ସିନର ବିକାଶ ହୋଇଥାଏ । ପରେ ଏହାକୁ ମୁଶା ଓ ମାଙ୍କଡଙ୍କ ଉପରେ ପରିକ୍ଷା କରାଯାଏ । ଏହାପରେ ମାନବ ପରୀକ୍ଷଣ ହୋଇଥାଏ ।  ପ୍ରଥମ ପର୍ଯ୍ୟାୟରେ ବିଫଳତା ହାର ୩୭ ପ୍ରତିଶତ ହୋଇଥାଏ । ଫେଜ୍ ୨ରେ ଶତାଧିକ ସୁସ୍ଥ ଲୋକଙ୍କୁ ଭ୍ୟାକ୍ସିନ୍ ଦେଇ ସେମାନଙ୍କ ଉପରେ ଏହାର ପ୍ରଭାବକୁ ପର୍ଯ୍ୟବେକ୍ଷଣ କରାଯାଏ । ଅଧିକାଂଶ ଭ୍ୟାକ୍ସିନ ଏହି ପର୍ଯ୍ୟାୟରେ ବିଫଳ ହୋଇଥାନ୍ତି । ଦ୍ୱିତୀୟ ଫେଜରେ ବିଫଳତା ହାର ୬୯ ପ୍ରତିଶତ ଥାଏ ।  ତୃତୀୟ ପର୍ଯ୍ୟାୟରେ ଭ୍ୟାକ୍ସିନ ହାଜରରୁ ଅଧିକଙ୍କୁ ଦିଆଯାଏ । ଏହି ପର୍ଯ୍ୟାୟରେ ବିଫଳତା ହାର ୪୨ ପ୍ରତିଶତ ରହିଥାଏ । ସାଧାରଣତଃ ଗୋଟିଏ ଭ୍ୟାକ୍ସିନକୁ ବଜାରକୁ ଆସିବାକୁ ଅତି କମରେ ୨ବର୍ଷ ଓ ସର୍ବାଧିକ ୧୦ ବର୍ଷ ଲାଗିଥାଏ ।