ଷ୍ଟେଜରୁ ପଡ଼ି କମ୍ପାନୀ ସିଇଓଙ୍କ ମୃତ୍ୟୁ; ରାମୋଜୀ ଫିଲ୍ମ ସିଟି ନାଁରେ ମାମଲା ରୁଜୁ

ହାଇଦ୍ରାବାଦ: ଷ୍ଟେଜରୁ ପଡ଼ି କମ୍ପାନୀ ସିଇଓଙ୍କ ମୃତ୍ୟୁ। କମ୍ପାନୀର ଏକ ଏରିଏଲ୍ ଷ୍ଟେଜ୍ କାର୍ଯ୍ୟକ୍ରମବେଳେ ଉପରୁ ଖସି ସିଇଓଙ୍କ ମୃତ୍ୟୁ ଘଟିଛି। ହାଇଦ୍ରାବାଦ ସ୍ଥିତ ଭିସଟେକ୍ସ ଏସିଆ ନାମକ କମ୍ପାନୀ ସିଇଓ ସଂଜୟ ଶାହାଙ୍କ ମୃତ୍ୟୁ ହୋଇଥିବା ଜଣାପଡିଛି। କମ୍ପାନୀର ରୌପ୍ୟ ଜୟନ୍ତୀ ଅବସରରେ ଆୟୋଜିତ କାର୍ଯ୍ୟକ୍ରମରେ ଯୋଗ ଦେଇଥିଲେ ସିଇଓ ସଂଜୟ ଶାହା ।

ହାଇଦ୍ରାବାଦ ସ୍ଥିତ ରାମୋଜୀ ଫିଲ୍ମ ସିଟିରେ ଚାଲିଥିଲା ଏହି କାର୍ଯ୍ୟକ୍ରମ। ଦୁଇ ଦିନ ଧରି ଏହି କାର୍ଯ୍ୟକ୍ରମ ଆୟୋଜନ ହେବାର ଥିଲା । ଏହି ଅଘଟଣ ସମୟରେ ପାଖାପାଖି ୭ଶହ କର୍ମଚାରୀ ବସିଥିଲେ। ଏରିଏଲ ଷ୍ଟେଜ ସୋ ଦେଖିବାକୁ ଲୋକେ ଏକାଠି ହୋଇଥିଲେ। ଏଥିଲାଗି ଏକ ସ୍ବତନ୍ତ୍ର ଷ୍ଟେଜ୍ ମଧ୍ୟ ପ୍ରସ୍ତୁତ କରାଯାଇଥିଲା । ଯାହାକୁ ୨୦ ଫୁଟ୍ ଉଚ୍ଚକୁ କ୍ରେନ ଜରିଆରେ ଉଠାଯାଇଥିଲା। ଏଥିଲାଗି ୬ ମିଲିମିଟର ଲୁହାର ତାର ବ୍ୟବହାର ହୋଇଥିଲା। ତେବେ ଦୁର୍ଭାଗ୍ୟବଶତଃ ଷ୍ଟେଜର ଗୋଟିଏ ପଟ ଲୁହା ତାର ଛିଡି ଯିବାରୁ ଷ୍ଟେଜରୁ ତଳକୁ ଖସି ପଡିଥିଲେ ସିଇଓ ସଂଜୟ ଶାହ । ତାଙ୍କ ସହ ଥିବା ଅନ୍ୟଜଣେ ବ୍ୟକ୍ତି ମଧ୍ୟ ତଳେ ପଡିଯାଇଥିଲେ।

ଏଥିରେ ଉଭୟ ଗୁରୁତର ଭାବେ ଆହତ ହୋଇ ମେଡିକାଲରେ ଭର୍ତ୍ତି ହୋଇଥିଲେ। ଚିକିତ୍ସାଧୀନ ଅବସ୍ଥାରେ ସଂଜୟଙ୍କ ମୃତ୍ୟୁ ଘଟିଛି। ପୋଲିସ ଏହି ଘଟଣାକୁ ନେଇ କମ୍ପାନୀ ପରିଚାଳନା କର୍ତ୍ତୃପକ୍ଷଙ୍କ ବିରୋଧରେ ମାମଲା ରୁଜୁ କରିଛି।