ନନ୍ଦିଘୋଷ ବ୍ୟୁରୋ : ଭାରତ-ପାକିସ୍ତାନ ମଧ୍ୟରେ ପୁଣି ବଢିଲା କୂଟନୈତିକ ଉତ୍ତେଜନା। ଅପରେସନ ସିନ୍ଦୂର ପରେ ଇସଲାମାବାଦସ୍ଥିତ ଭାରତୀୟ ଦୂତାବାସରେ ଭାରତୀୟ ପଦାଧିକାରୀଙ୍କୁ କରାଯାଉଛି ହଇରାଣ, ହରକତ। ଅପରେସନ ସିନ୍ଦୂରରେ ପାକିସ୍ତାନର ୯ଟି ଆତଙ୍କବାଦୀ ଶିବିର ଧ୍ବଂସ ହେବା ସହେ ୧୦୦ରୁ ଅଧିକ ଆତଙ୍କୀ ନିହତ ହେବା ପରେ କ୍ଷୁବ୍ଧ ହୋଇଛି ପାକିସ୍ତାନ। ଜବାବରେ କୂଟନୀତିଜ୍ଞମାନଙ୍କୁ କରିଛି ଟାର୍ଗେଟ। ଇସଲାମାବାଦସ୍ଥିତ ଭାରତୀୟ ଦୂତାବାସ ଓ କୂଟନୀତିଜ୍ଞଙ୍କ ବାସଭବନକୁ ଖବରକାଗଜ ବନ୍ଦ କରିଦିଆଯାଇଛି। ପ୍ରତିବାଦରେ ନୂଆଦିଲ୍ଲୀସ୍ଥିତ ପାକିସ୍ତାନୀ ଦୂତାବାସକୁ ବି ଖବରକାଗଜ ବନ୍ଦ କରିଛି ଭାରତ। ସେପଟେ ଭାରତୀୟ କୂଟନୀତିଜ୍ଞଙ୍କ ବାସଭବନ ଓ କାର୍ଯ୍ଯାଳୟକୁ ପାକିସ୍ତାନୀ ଅଧିକାରୀ ବେଆଇନ ପ୍ରବେଶ କରୁଥିବା ଅଭିଯୋଗ ପରେ କ୍ଷୁବ୍ଧ ହୋଇଛି ଭାରତ। ପାକିସ୍ତାନର ଏସବୁ ପଦକ୍ଷେପ ଭିଏନା କନଭେନସନର ନୀତିକୁ ଉଲ୍ଲଂଘନ କରୁଛି ବୋଲି ଭାରତ ଅଭିଯୋଗ କରିଛି। ଭାରତୀୟ କୂଟନୀତିଜ୍ଞଙ୍କ ନିରାପତ୍ତା ଓ ସ୍ବାଭିମାନର ସୁରକ୍ଷା ଦାବି କରିଛି ଭାରତ। ଇସଲାମାବାଦରେ ଭାରତୀୟ କୂଟନୀତିଜ୍ଞଙ୍କୁ ଗ୍ୟାସ, ପାଣି ସଠିକ୍ ଭାବେ ଯୋଗାଯାଉନାହିଁ। ଭାରତୀୟ କୂଟନୀତିଜ୍ଞଙ୍କୁ ଉଚିତ ସୁବିଧା ନଦେବା ଲାଗି ପାକିସ୍ତାନ କର୍ତ୍ତୃପକ୍ଷ ନିର୍ଦ୍ଦେଶ ଦେଇଥିବା କୁହାଯାଇଛି। ୨୦୧୯ରେ ବି ଭାରତର ସର୍ଜିକାଲ ଷ୍ଟ୍ରାଇକ ବେଳେ ଏହି ଧରଣର ଘଟଣା ଘଟିଥିବା କୁହାଯାଇଛି।
