ଶେଷ ଦିନିକିଆରେ ଅଷ୍ଟ୍ରେଲିଆ ଠୁ ହାରି ସିରିଜ କବଜା କଲା ଭାରତ

ରାଜକୋଟ: ଶେଷ ଦିନିକିଆରେ ଅଷ୍ଟ୍ରେଲିଆଠୁ ହାରିଲା ଭାରତ । ୬୬ ରନରେ ପରାଜିତ ହୋଇଛି ଟିମ୍ ଇଣ୍ଡିଆ । ୩୫୩ ରନର ଟାର୍ଗେଟକୁ ପିଛାକରି ୨୮୬ରନରେ ଅଲଆଉଟ ହୋଇଗଲା ରୋହିତ ବାହିନୀ । ଫଳରେ ଶେଷ ଦିନିକିଆ ହାରିବା ସହିତ ୩ଟିକିଆ ସିରିଜକୁ ୨-୧ରେ ଜିତିନେଇଛି ଭାରତ । ଶେଷ ଦିନିକିଆରେ ଆରମ୍ଭରୁ ଦମଦାର ପ୍ରଦର୍ଶନ କରିଥିଲେ ଅଷ୍ଟ୍ରେଲିଆ ।

ମିଚେଲ ମାର୍ସ, ଷ୍ଟିଭ୍ ସ୍ମିତ ଓ ଡେଭିଡ ଓ୍ବାର୍ଣ୍ଣରଙ୍କ ଚମତ୍କାର ପ୍ରଦର୍ଶନ ବଳରେ ବିଶାଳ ସ୍କୋର କରିଥିଲା ଅଷ୍ଟ୍ରେଲିଆ । ମିଚେଲ ୯୬ରନ କରିଥିବାବେଳେ ସ୍ମିଥ ୭୪, ଓ୍ବାର୍ଣ୍ଣର ୫୬ ଓ ମାର୍ନସ ୭୨ ରନ କରିଥିଲେ । ଫଳରେ ନିର୍ଦ୍ଧାରିତ ଓଭରରେ ୭ ଓ୍ବିକେଟ ହରାଇ ୩୫୨ ରନ କରିଥିଲା ଅଷ୍ଟ୍ରେଲିଆ । ଭାରତ ପକ୍ଷରୁ ବୁମରାହ ସର୍ବାଧିକ ୩ ଓ୍ବିକେଟ ନେଇଥିବାବେଳେ କୂଲଦୀପ ଯାଦବ ୨ଟି, ମହମ୍ମଦ ସିରାଜ ଓ ପ୍ରସିଦ୍ଧ କ୍ରୀଷ୍ଣା ଗୋଟିଏ ଲେଖାଏ ଓ୍ବିକେଟ ନେଇଥିଲେ ।

୩୫୩ରନର ଟାର୍ଗେଟ ନେଇ ପଡ଼ିଆକୁ ଓହ୍ଲାଇଥିଲା ଭାରତ । ଆରମ୍ଭକୁ କ୍ୟାପଟେନ ରୋହିତ ଶର୍ମା ଧୁଆଁଧାର ବ୍ୟାଟିଂ କରିଥିଲେ । ହେଲେ ମାସ୍କଓ୍ବେଲଙ୍କ ହାତରେ କ୍ୟାଚ ଦେଇ ପାଭିଲିୟନ ଫେରିଥିଲେ । ୫୭ ବଲରେ ୮୧ ରନ କରି ଆଉଟ ହୋଇଥିଲେ ରୋହିତ । ପରେ ନିୟମିତ ବ୍ୟବଧାନରେ ଟିମ୍ ଇଣ୍ଡିଆର ଓ୍ବିକେଟ ଗଡ଼ିଥିଲା । ବିରାଟ କୋହଲି ୬୧ ବଲରେ ୫୬ ରନ କରିଥିବାବେଳେ ଶ୍ରେୟସ ଆୟାର ୪୮, କେଏଲ ରାହୁଲ ୨୬ ଓ ରବୀନ୍ଦ୍ର ଜାଡେଜା ୩୫ ରନ କରିଥିଲେ । ୪୯ ଓଭର ୪ଟି ବଲକରେ ୨୮୬ ରନ କରି ଅଲଆଉଟ ହୋଇଯାଇଥିଲା ଟିମ୍ ଇଣ୍ଡିଆ ।