ଏସିଆନ ଗେମ୍ସ: ପ୍ରଥମ ଦିନରେ ଭାରତକୁ ୫ ପଦକ

ହାଙ୍ଗଝୁ: ଚୀନର ହାଙ୍ଗଝୁରେ ଚାଲିଥିବା ୨୦୨୩ ଏସିଆନ ଗେମ୍ସରେ ଭାରତର ଭଲ ଆରମ୍ଭ । ପ୍ରଥମ ଦିନରେ ବର୍ତ୍ତମାନ ସୁଦ୍ଧା ଭାରତ ୫ଟି ପଦକ ହାସଲ କରିଥିଛି । ଏଥିରେ ୩ଟି ରୌପ୍ୟ ପଦକ ଥିବା ବେଳେ ଦୁଇଟି ବ୍ରୋଞ୍ଜ ରହିଛି ।

ଏୟାର ରାଇଫଲ ଓ ରୋଇଂରେ ଭାରତକୁ ୩ଟି ସିଲଭର ମେଡାଲ ମିଳିଛି । ସେହିପରି ଏହି ଦୁଇ ଇଭେଣ୍ଟରେ ଦୁଇଟି ବ୍ରୋଞ୍ଜ ମଧ୍ୟ ମିଳିଛି ।

ମହିଳା ୧୦ ମିଟର ଏୟାର ରାଇଫଲରେ ମେହୁଲି ଘୋଷ, ରମିତା ଓ ଆଶି ଚୌକସି ରୌପ୍ୟ ପଦକ ହାସଲ କରିଛନ୍ତି ।  ମହିଳା ୧୦ ମିଟର ଏୟାର ରାଇଫଲରେ ରମିତା ଜିନ୍ଦଳଙ୍କୁ ବ୍ରୋଞ୍ଜ ପଦକରେ ସନ୍ତୁଷ୍ଟ ହେବାକୁ ପଡ଼ିଛି ।

ରୋଇଂର ପୁରୁଷ ଲାଇଟଓ୍ବେଟ ଡବଲ ସ୍କଲରେ ଅର୍ଜୁନ ଲାଲ ଓ ଅରବିନ୍ଦ ସିଂହ ରୌପ୍ୟ ପଦକ ହାସଲ କରିଛନ୍ତି । ମେନ୍ସ ପେୟାର ରୋଇଂରେ ବାବୁଲାଲ ଯାଦବ ଏବଂ ଲାଖ ରାମ ବ୍ରୋଞ୍ଜ ପଦକ ହାସଲ କରିଛନ୍ତି । ମେନ୍ସ ଏଇଟରେ ଭାରତ ରୌପ୍ୟ ପଦକ ହାସଲ କରିଛି । ଏହି ଟିମରେ ନିରଜ, ନରେଶ କଲଓ୍ବାନିଆ, ନେତୀଶ କୁମାର, ଚରଣଜିତ ସିଂ, ଜସବିନ୍ଦର ସିଂ, ଭୀମ ସିଂ, ପୁନିତ କୁମାର ଏବଂ ଆଶିଷ ସଦସ୍ୟ ଥିଲେ ।

ସେହିପରି କ୍ରିକେଟରେ ବାଂଲାଦେଶକୁ ହରାଇ ଭାରତୀୟ ମହିଳା କ୍ରିକେଟ୍ ଟିମ୍ ଫାଇନାଲରେ ପ୍ରବେଶ କରିଛି । ହକିରେ ଭାରତ ଉଜବେଗିସ୍ତାନକୁ ୧୬-୦ ଗୋଲରେ ହରାଇ ଧମାକଦାର ଆରମ୍ଭ କରିଛି ।