ପାକିସ୍ତାନକୁ ପାନେ ଦେବାକୁ ଭାରତର ନୂଆ ଯୋଜନା

ପାକିସ୍ତାନରେ ପାଣି ପାଇଁ ହାହାକାର ହୋଇପାରେ । ବୁଲି ବୁଲି ଟଙ୍କା ମାଗୁଥିବା ପାକିସ୍ତାନୀ ପ୍ରଧାନମନ୍ତ୍ରୀ ଇମ୍ରାନ୍ ଖାଁ ପାଣି ପାଇଁ ବାର ଦୁଆର ବୁଲିପାରନ୍ତି । ଆତଙ୍କବାଦୀ କାରଖାନା ପାକିସ୍ତାନ ପାଇଁ ଏମିତି ପରିସ୍ଥିତି ବି ସୃଷ୍ଟି ହେବା ଆଶଙ୍କା ରହିଛି । କାରଣ ପାକିସ୍ତାନକୁ ସବକ୍ ଶିଖାଇବାକୁ ମୋଦି ସରକାର ପାକିସ୍ତାନକୁ ପାଣି ବନ୍ଦ କରିବାକୁ ଯାଉଛନ୍ତି I

ହରିୟାଣାର ଚରକି ଦାଦ୍ରୀରେ ନିର୍ବାଚନ ପ୍ରଚାର ବେଳେ ପ୍ରଧାନମନ୍ତ୍ରୀ ମୋଦି କହିଛନ୍ତି, ଭାରତରୁ ପାକିସ୍ତାନ ବୋହି ଯାଉଥିବା ପାଣିକୁ ସଂରକ୍ଷଣ କରାଯିବ I ଭାରତର କୃଷକ ଏହି ସଂରକ୍ଷିତ ପାଣି ବ୍ୟବହାର କରି ଭଲ ଫସଲ ଉତ୍ପାଦନ କରିବେ I ଏ ଦିଗରେ ମୁଁ କାମ ଆରମ୍ଭ କରିଛି I ଆପଣମାନଙ୍କ ଆଶୀର୍ବାଦ ଓ ଭଲ ପାଇବା ମୋ ସରକାର ସହ ଏମିତି ଅତୁଟ ରହିଲେ ଏହା ସମ୍ଭବ ହେବ I

ପ୍ରଧାନମନ୍ତ୍ରୀ କହିଛନ୍ତି ବିଗତ ୭୦ ବର୍ଷ ହେଲା ଆପଣଙ୍କ ହକ୍, ଅଧିକାରର ପାଣି ପାକିସ୍ତାନକୁ ବୋହି ଯାଉଛି। କିନ୍ତୁ, ଏ ମୋଦି ଏହି ସ୍ରୋତକୁ ବନ୍ଦ କରିବା ସହ ହରିୟାଣାର ଚାଷୀମାନଙ୍କ ନିକଟରେ ପହଞ୍ଚାଇବ I ହରିୟାଣା ସହ ଏହାର ସୁଫଳ ରାଜସ୍ଥାନର ଚାଷୀଙ୍କୁ ମଧ୍ୟ ମିଳିବ I ଏ ଦିଗରେ ପଦକ୍ଷେପ ନିଆଯାଇ କାମ ଆରମ୍ଭ ହୋଇଛି I

ଗତ ଫେବ୍ରୁଆରୀ ମାସରେ ପୁଲୱାମା ଆତଙ୍କବାଦୀ ଆକ୍ରମଣରେ ୪୦ ଜଣ ଯବାନ ସହିଦ ହେବା ପରେ ସେତେବେଳର କେନ୍ଦ୍ର ଜଳ ସଂପଦ ମନ୍ତ୍ରୀ ନୀତିନ ଗଡ଼କରୀ କହିଥିଲେ ଆମ ସରକାର ପାକିସ୍ତାନକୁ ପ୍ରବାହିତ ପାଣିକୁ ବନ୍ଦ କରିବାକୁ ବାଟ ଖୋଜୁଛି । ଇଣ୍ଡସ୍ ଜଳ ଚୁକ୍ତି ୧୯୬୦ ଅନୁଯାୟୀ ପାକିସ୍ତାନକୁ ସତଲେଜ, ରବି ଓ ବିଜ୍ ନଦୀର ପାଣି ପ୍ରବାହିତ ହେଉଛି I ଏହି ପାଣିକୁ ୩ଟି ପ୍ରୋଜେକ୍ଟ ମାଧ୍ୟମରେ ରୋକାଯାଇ ଯମୁନା ନଦୀକୁ ଛଡ଼ାଯିବ ବୋଲି ନୀତିନ ଗଡ଼କରୀ କହିଥିଲେ I

ଭାରତର ଏଭଳି ପଦକ୍ଷେପ ଯୋଗୁ ପାକିସ୍ତାନରେ ଜଳାଭାବ ଦେଖାଯିବା ଆଶଙ୍କା ରହିଛି । କାରଣ ଏମିତି ହେଲେ ପାକିସ୍ତାନ ମାଟିରେ ଜଳସ୍ରୋତ ଓ ଜଳସ୍ତର କମିବ ।

ଇଣ୍ଡସ୍ ଜଳ ଚୁକ୍ତି କଣ ?

ସ୍ୱାଧୀନତା ପରେ ୧୯୪୮ ମସିହାରେ ଭାରତ ପାକିସ୍ତାନକୁ ପ୍ରବାହିତ ସମସ୍ତ କେନାଲରେ ପାଣି ପ୍ରବାହକୁ ବନ୍ଦ କରିଦେଇଥିଲା I ଶେଷରେ ବିଶ୍ୱ ବ୍ୟାଙ୍କର ହସ୍ତକ୍ଷେପ ପରେ ଭାରତ ପାକିସ୍ତାନକୁ ଜଳ ଛାଡ଼ିଥିଲା I ସେବେଠୁ ଆରମ୍ଭ ହୋଇଥିଲା ଦ ଇଣ୍ଡସ୍ ଜଳ ଚୁକ୍ତି I ଇଣ୍ଡସ, ଚେନାବ,ଝେଲମ, ବିଜ୍, ରବି ଓ ସତଲେଜର ଜଳ ପ୍ରବାହକୁ ନେଇ ୨ ଦେଶ ମଧ୍ୟରେ ଇଣ୍ଡସ୍ ଜଳ ଚୁକ୍ତି ହୋଇଥିଲା I

୧୯୬୦ ମସିହାରେ ଭାରତର ପ୍ରଧାନମନ୍ତ୍ରୀ ଜବାହରଲାଲ ନେହରୁ ଓ ପାକିସ୍ତାନ ରାଷ୍ଟ୍ରପତି ଆୟୁବ ଖାଁଙ୍କ ନେତୃତ୍ୱରେ ଏହି ଚୁକ୍ତି ସ୍ୱାକ୍ଷରିତ ହୋଇଥିଲା I ବୁଝାମଣାର ପ୍ରାୟ ୯ ବର୍ଷ ପରେ ଏହି ଚୁକ୍ତିକୁ ବିଶ୍ୱ ବ୍ୟାଙ୍କ ରବ୍ଦ କରିଥିଲା I ଚୁକ୍ତି ଅନୁସାରେ ପୂର୍ବରେ ପ୍ରବାହିତ ବିଜ୍, ରବି ଓ ସତଲେଜ ଭାରତର ହୋଇଥିବା ବେଳେ ପଶ୍ଚିମରେ ପ୍ରବାହିତ ଇଣ୍ଡସ୍, ଚେନାବ ଓ ଝେଲମ ପାକିସ୍ତାନ ନିୟନ୍ତ୍ରଣରେ ଥିଲା I

')}