ଆଜିଠୁ ଦ୍ୱିତୀୟ ଟେଷ୍ଟ, ସିରିଜ୍ କବଜା ଲକ୍ଷ୍ୟରେ ଟିମ୍ ଇଣ୍ଡିଆ

ନୂଆଦିଲ୍ଲୀ: ଆଜିଠୁ ଭାରତ ଏବଂ ୱେଷ୍ଟଇଣ୍ଡିଜ୍ ମଧ୍ୟରେ ଶତକୀୟ ଟେଷ୍ଟ୍ ମୁକାବିଲା । ପୋର୍ଟ ଅଫ୍ ସ୍ପେନରେ ଏହି ମ୍ୟାଚ ଖେଳାଯିବ । ଏହି ଟେଷ୍ଟ୍ ଚଳିତ ଶୃଙ୍ଖଳାର ଦ୍ବିତୀୟ ତଥା ଅନ୍ତିମ ଟେଷ୍ଟ ମୁକାବିଲା। ପ୍ରଥମ ଟେଷ୍ଟରେ ବିଜୟ ସହ ଏହି ଦୁଇ ଟିକିଆ ସିରିଜରେ ୧-୦ରେ ଆଗୁଆ ରହିଛି ଭାରତ । ଭାରତ ଶୃଙ୍ଖଳା ଜିତିବା ସମ୍ଭାବନା ଅଧିକ ଥିବାବେଳେ ଘରୋଇ ଦଳ ନିଶ୍ଚିତ କିଛିଟା ଲଢ଼େଇ କରିବାକୁ ଆଶା ରଖିବ। ଡୋମିନିକାରେ ଭାରତୀୟ ସ୍ପିନ୍‌ ଯୋଡ଼ି ରବିଚନ୍ଦ୍ରନ ଅଶ୍ବିନ ଓ ରବୀନ୍ଦ୍ର ଜାଡେଜା ଚମତ୍କାର ପ୍ରଦର୍ଶନ କରିଥିଲେ । ତେବେ ଦ୍ୱିତୀୟ ଟେଷ୍ଟରେ ମଧ୍ୟ ଭାରତୀୟ ସ୍ପିନ ବୋଲରଙ୍କ ରାଜୁତି ରହିବା ସମ୍ଭାବନା ଅଧିକ । ସେପଟେ ପ୍ରଥମ ଟେଷ୍ଟ୍‌ରେ ୭୬ ରନ୍‌ କରିଥିବା ବିରାଟ କୋହଲିଙ୍କଠାରୁ ୨୦୧୮ ମସିହା ପରେ ବିଦେଶରେ ପ୍ରଥମ ଶତକ ଆଶା କରାଯାଉଛି। ସେହିପରି ଶୁବମନ ଗିଲଙ୍କଠାରୁ ଏକ ଆତ୍ମବିଶ୍ବାସ ଭରା ପାଳିର ଅପେକ୍ଷା ରହିଛି । ବିଗତ ୨୧ ବର୍ଷରେ ଭାରତ ବିପକ୍ଷରେ ୱେଷ୍ଟଇଣ୍ଡିଜ ଗୋଟିଏ ବି ଟେଷ୍ଟ ଜିତିପାରିନି ।