ଆଜି ବେଙ୍ଗାଲୁରୁରେ ଭାରତ-ନ୍ଯୁଜିଲାଣ୍ଡ ଟେଷ୍ଟ ସିରିଜ

ବେଙ୍ଗାଲୁରୁ : ଆଜିଠୁ ଭାରତ-ନ୍ଯୁଜିଲାଣ୍ଡ ଟେଷ୍ଟ ସିରିଜ । ୩ ଟିକିଆ ମ୍ଯାଚ ବିଶିଷ୍ଟ ସିରିଜର ପ୍ରଥମ ମ୍ଯାଚ ଆଜି ବେଙ୍ଗାଲୁରୁରେ ସକାଳ ସାଢେ ୯ଟାରୁ ଆରମ୍ଭ ହୋଇଛି । ରୋହିତ ଶର୍ମାଙ୍କ ଅଧିନାୟକତ୍ବରେ ପଡ଼ିଆକୁ ଓହ୍ଲାଇଛି ଟିମ୍ ଇଣ୍ଡିଆ । ଭାରତ ଏହି ଶୃଙ୍ଖଳାକୁ ଜିତିଲେ ବିଶ୍ବ ଟେଷ୍ଟ୍ ଚାମ୍ପିଅନସିପ୍ ଫାଇନାଲରେ ପ୍ରବେଶ ପ୍ରାୟତଃ ନିଶ୍ଚିତ ହୋଇଯିବ। ତେବେ ଭାରତର ଏହି ଅଭିଯାନରେ ବେଙ୍ଗାଲୁରୁର ପାଣିପାଗ ପ୍ରତିବନ୍ଧକ ସାଜିଛି । ପ୍ରଥମ ଟେଷ୍ଟ୍ ପୂର୍ବରୁ ଏଠାରେ ହୋଇଥିବା ଲଗାଣ ବର୍ଷା ଯୋଗୁଁ ମ୍ୟାଚ୍ ପୂର୍ବ ଦିନର ଅଭ୍ୟାସ ହୋଇପାରିନି। ଭାରତ ଲଗାତାର ୬ ଘରୋଇ ମ୍ୟାଚରେ ଅପରାଜେୟ ରହିଛି । ଅନ୍ଯପଟେ ଭାରତ ବିପକ୍ଷରେ ନ୍ଯଜିଲାଣ୍ଡ ଚାପରେ ରହିପାରେ । ନ୍ୟୁଜିଲାଣ୍ଡ ୧୯୮୮ ମସିହା ପରେ ଭାରତରେ ଟେଷ୍ଟ୍ ଶୃଙ୍ଖଳା ଜିତି ନଥିବାରୁ ଏହି ଶୃଙ୍ଖଳା ୩୬ବର୍ଷର ରେକର୍ଡ ଭାଙ୍ଗିବାର ସୁଯୋଗ ନେଇ ଆସିଛି । ବେଙ୍ଗାଲୁରୁ ପିଚରେ ଦ୍ରୁତ ବୋଲରଙ୍କ ଭୂମିକା ଅଧିକ ରହିପାରେ। ବାଂଲାଦେଶ ବିପକ୍ଷରେ ଶୃଙ୍ଖଳା ମୂଳପୋଛ କରିବା ପରେ ନ୍ୟୁଜିଲାଣ୍ଡ ବିପକ୍ଷରେ ରେଜଲ୍ଟ ରିପିଟ କରିବା ଆଶାରେ ରହିଛି ଟିମ୍ ଇଣ୍ଡିଆ ।