ରାଜକୋଟ: ଆଜିଠୁ ଭାରତ ଇଂଲଣ୍ଡ ମଧ୍ଯରେ ତୃତୀୟ ଟେଷ୍ଟ । ରାଜକୋଟରେ ସକାଳ ୯ଟା ୩୦ରୁ ଆରମ୍ଭ ହେବ ମ୍ଯାଚ୍ । ସିରିଜରେ ଉଭୟ ଗୋଟିଏ ଲେଖାଏଁ ମ୍ଯାଚ ଜିତି ୧-୧ରେ ବରାବର ରହିଛନ୍ତି । ୫ ଟିକିଆ ସିରିଜରେ ଆଜିର ମ୍ଯାଚ ଜିତି ଅଗ୍ରଣୀ ରହିବାକୁ ଉଭୟ ଦଳ ଲକ୍ଷ ରଖିଛନ୍ତି । ଏଥିପାଇଁ ଭାରତ ସ୍ବତନ୍ତ୍ର ରଣନୀତି କରିଛି । ତେବେ ସମ୍ପୂର୍ଣ୍ଣ ଫିଟ ହୋଇନଥିବାରୁ ମ୍ଯାଚରୁ କେ.ଏଲ ରାହୁଲ ବାଦ ପଡ଼ିଛନ୍ତି । ବିରାଟ କୋହଲି ମ୍ଯାଚ ଖେଳୁନଥିବାବେଳେ ରବୀନ୍ଦ୍ର ଜାଡେଜା ବି ବାଦ ପଡ଼ିଛନ୍ତି ।
ରାଜକୋଟ ପିଚ ପେସ ବୋଲିଂକୁ ସୁହାଇବ ବୋଲି କୁହାଯାଉଛି। ଏଥିପାଇଁ ଶୁଭମନ ଗିଲ, ଯଶସ୍ଵୀ ଜୟସ୍ଵାଲଙ୍କ ପ୍ରଦର୍ଶନ ଉପରେ ନଜର ରହିବ। ଏହାସହ ମହମ୍ମଦ ସିରାଜ, ଯଶପ୍ରୀତ ବୁମରା ଓ ଅନ୍ୟ ବୋଲରଙ୍କ ବୋଲିଂ ବେଶ୍ ଗୁରୁତ୍ଵପୂର୍ଣ୍ଣ ରହିବ। ଇଂଲଣ୍ଡଠାରୁ ସିରିଜର ପ୍ରଥମ ଟେଷ୍ଟ ୨୮ ରନରେ ହାରିବା ପରେ ଟିମ୍ ଇଣ୍ଡିଆ ଦ୍ଵିତୀୟ ଟେଷ୍ଟରେ ବଡ଼ ବିଜୟ ହାସଲ କରିଥିଲା। ତେବେ ତୃତୀୟ ଟେଷ୍ଟରେ ଇଂଲଣ୍ଡର ବୋଲରଙ୍କୁ ମୁକାବିଲା କରିବା ପାଇଁ ଭାରତୀୟ ବ୍ୟାଟରମାନେ ନିଜକୁ ପ୍ରସ୍ତୁତ କରୁଛନ୍ତି।
ହାଇଦ୍ରାବାଦରେ ଖେଳାଯାଇଥିବା ପ୍ରଥମ ଟେଷ୍ଟରେ ଇଂଲଣ୍ଡ ୨୮ ରନରେ ବିଜୟୀ ହୋଇଥିଲା। ବିଶାଖପାଟଣାରେ ଖେଳାଯାଇଥିବା ଦ୍ବିତୀୟ ଟେଷ୍ଟରେ ଭାରତ ଇଂଲଣ୍ଡକୁ ୧୦୬ ରନରେ ହରାଇ ସ୍ଥିତି ବରାବର କରିଥିଲା। ୨୩ ତାରିଖରୁ ସିରିଜର ଚତୁର୍ଥ ମ୍ଯାଚ ରାଞ୍ଚିରେ ଖେଳାଯିବାକୁ ଥିବାବେଳେ ଶେଷ ତଥା ଅନ୍ତିମ ଟେଷ୍ଟ ଧର୍ମଶାଳାରେ ମାର୍ଚ୍ଚ ୭ ତାରିଖରେ ଖେଳାଯିବ ।
