ଭାରତ-ଅଷ୍ଟ୍ରେଲିଆ ପ୍ରଥମ ଟେଷ୍ଟ, ଆଜି ଦ୍ୱିତୀୟ ଦିନରେ ଖେଳ ଆରମ୍ଭ କରିବ ଟିମ୍ ଇଣ୍ଡିଆ

ନାଗପୁର: ଭାରତ-ଅଷ୍ଟ୍ରେଲିଆ ପ୍ରଥମ ଟେଷ୍ଟର ଆଜି ଦ୍ବିତୀୟ ଦିନ । ଆଜି ୭୭ ରନରୁ ପାଳି ଆରମ୍ଭ କରିବ ଟିମ୍ ଇଣ୍ଡିଆ । ଗତକାଲି ପ୍ରଥମ ଦିନରେ ଭ୍ରମଣକାରୀ ଦଳ ଅଲଆଉଟ ହୋଇଯାଇଥିଲା । ବଡ଼ ସ୍କୋର କରିବାରେ ବିଫଳ ହୋଇଥିଲା ଅଷ୍ଟ୍ରେଲିଆ । ପ୍ରଥମେ ବ୍ୟାଟିଂ ବିପର୍ଯ୍ୟର ସମ୍ମୁଖୀନ ହୋଥିଲା ଦଳ । ରବିନ୍ଦ୍ର ଜାଡେଜା ଓ ଅଶ୍ବିନୀଙ୍କ ସ୍ପିନକୁ ସାମ୍ନା କରିପାରିନଥିଲା କଙ୍ଗାରୁ ଟିମ୍ । ଫଳରେ ପ୍ରଥମ ଦିନରେ ୬୩ ଓଭର ୫ଟି ବଲ ଖେଳି ୧୭୭ ରନରେ ଅଲଆଉଟ ହୋଇଥିଲା ଅଷ୍ଟ୍ରେଲିଆ । ଦଳ ପକ୍ଷରୁ ଲାବୁସାନେ ୪୯ ରନ କରିଥିବା ବେଳେ, ଷ୍ଟିଭ୍ ସ୍ମିଥ ୩୭, ଆଲେକ୍ସ କ୍ୟାରି ୩୬ ଓ ହାଣ୍ଡସକମ୍ବ ୩୧ ରନ କରିଥିଲେ ।

ଭାରତ ପକ୍ଷରୁ ରବିନ୍ଦ୍ର ଜାଡେଜା ସର୍ବାଧିକ ୫ଟି ଓ୍ବିକେଟ ଅକ୍ତିଆର କରିଛନ୍ତି । ଅଷ୍ଟ୍ରେଲିଆ ଅଲଆଉଟ ହେବା ପରେ ମଇଦାନକୁ ଓହ୍ଲାଇଥିବା ଭାରତ ଆରମ୍ଭରୁ ଦୃଢ଼ତାର ସହ ବ୍ୟାଟିଂ କରିଛି । ରୋହିତ ଶର୍ମା ଅର୍ଦ୍ଧଶତକ ହାସଲ କରିଛନ୍ତି । ପ୍ରଥମ ଦିନର ଖେଳ ଶେଷ ସୁଦ୍ଧା ଟିମ୍ ଇଣ୍ଡିଆ ଏକ ଓ୍ବିକେଟ ହରାଇ ୭୭ ରନ କରିଛି । ୨୦ ରନ କରି କେ.ଏଲ ରାହୁଲ ଆଉଟ ହୋଇଛନ୍ତି । ପ୍ରଥମ ଦିନର ଖେଳ ଶେଷ ସୁଦ୍ଧା ଅପରାଜିତ ଅଛନ୍ତି ରୋହିତ ଶର୍ମା ଓ ରବିଚନ୍ଦ୍ରନ ଅଶ୍ବିନୀ ।