ଭାରତ-ଦକ୍ଷିଣ ଆଫ୍ରିକା ଟେଷ୍ଟ ସିରିଜ୍ ପୂର୍ବରୁ ଦକ୍ଷିଣ ଆଫ୍ରିକାକୁ ବଡ଼ ଝଟକା, ସିରିଜରୁ ବାହାରିଲେ ଏହି ଷ୍ଟାର ବୋଲର

ଜୋହାନର୍ସବର୍ଗ: ଆସନ୍ତା ଡିସେମ୍ବର ୨୬ରୁ ଆରମ୍ଭ ହେବାକୁ ଯାଉଛି ଭାରତ- ଦକ୍ଷିଣ ଆଫ୍ରିକା ଟେଷ୍ଟ ସିରିଜ୍ । ଏହି ତିନି ଟିକିଆ ଟେଷ୍ଟ ସିରିଜ ପୂର୍ବରୁ ଦକ୍ଷିଣ ଆଫ୍ରିକାକୁ ଲାଗିଛି ବଡ଼ ଝଟକା । ଦକ୍ଷିଣ ଆଫ୍ରିକା ଷ୍ଟାର ଦ୍ରୁତ ବୋଲର ଏନରିଚ୍ ନୋର୍କିଆ ଏହି ଟେଷ୍ଟ ସିରିଜରୁ ବାଦ ପଡ଼ିଛନ୍ତି । ଏହି ଟେଷ୍ଟ ସିରିଜ୍ ପାଇଁ ନୋର୍କିଆ ଦଳର ଚୟନ ପୂର୍ବରୁ ହିଁ ଆହତ ଥିଲେ । ତେବେ ଭାରତ ଦକ୍ଷିଣ ଆଫ୍ରିକା ଟେଷ୍ଟ ସିରିଜ୍ ପୂର୍ବରୁ ନୋର୍କିଆ ଫିଟ୍‌ ହୋଇପାରିନାହାନ୍ତି । ଯାହା ଫଳରେ ସେ ଏହି ଟେଷ୍ଟ ସିରିଜ ପୂର୍ବରୁ ଦକ୍ଷିଣ ଆଫ୍ରିକା ଦଳରୁ ବାହାର ଯାଇଛନ୍ତି ।

ଦକ୍ଷିଣ ଆଫ୍ରିକା ଦଳରେ ନୋର୍କିଆ ଗୁରୁତ୍ୱପୂର୍ଣ୍ଣ ଭୂମିକା ତୁଲାଉଥିଲେ । କଗିସୋ ରାବାଡାଙ୍କ ସହ ମିଶି ସେ ଦକ୍ଷିଣ ଆଫ୍ରିକା ଦଳକୁ ବହୁ ସଫଳତା ଦେଇଛନ୍ତି । କ୍ରିକେଟ ସାଉଥ ଆଫ୍ରିକା ଟ୍ୱିଟ କରି କହିଛି କି ଏନରିଚ୍ ନୋର୍କିଆ ତାଙ୍କ ପୂର୍ବ ଆଘାତ କାରଣରୁ ଟିମ୍ ଇଣ୍ଡିଆ ବିପକ୍ଷରେ ହେବାକୁ ଥିବା ତିନି ଟିକିଆ ଟେଷ୍ଟ ସିରିଜରୁ ବାଦ୍ ପଡ଼ିଛନ୍ତି ।

#Proteas Squad update ?

Anrich Nortje has been ruled out of the 3-match #BetwayTestSeries due to a persistent injury ?

No replacement will be brought in#SAvIND #FreedomSeries #BePartOfIt pic.twitter.com/5R8gnwdcpF

— Proteas Men (@ProteasMenCSA) December 21, 2021

କରୋନାର ନୂଆ ଭାରିଆଣ୍ଟ ଓମିକ୍ରନ ଫଳରେ ନୋର୍କିଆଙ୍କ ସ୍ଥାନରେ ଆଉ କୌଣସି ଖେଳାଳିଙ୍କ ରିପ୍ଲେସମେଣ୍ଟ କରାଯାଇନାହିଁ । ଦକ୍ଷିଣ ଆଫ୍ରିକାରେ କରୋନାର ନୂଆ ଭାରିଆଣ୍ଟ ଓମିକ୍ରନ ଦ୍ରୁତ ଗତରେ ସଂକ୍ରମଣ ହେଉଛି । ଯାହା ଫଳରେ ଉଭୟ ଦଳଙ୍କୁ କଡ଼ା ବାୟୋ ବବଲରେ ରଖାଯାଇଛି । ଚଳିତ ବର୍ଷ ନୋର୍କିଆ ୫ଟି ଟେଷ୍ଟ ମ୍ୟାଚ ଖେଳି ୨୫ ଓ୍ୱିକେଟ ଅକ୍ତିଆର କରିଥିଲେ । ଦକ୍ଷିଣ ଆଫ୍ରିକା ପାଇଁ ନୋର୍କିଆ ଏପର୍ଯ୍ୟନ୍ତ ୧୨ଟି ମ୍ୟାଚ ଖେଳି ୪୭ଟି ଓ୍ୱିକେଟ ହାସଲ କରିଛନ୍ତି ।